საქართველოს იუსტიციის სამინისტრომ 2012 წელს თანამშრომლებზე გაცემული პრემიები მთავრობასთან 2013 წელს შეათანხმა, პრემიის ოდენობა კი 220%-მდე გაზარდა, _ ამის შესახებ სახელმწიფო აუდიტის დასკვნაშია აღნიშნული.
შესაბამისობის აუდიტის დასკვნის მიხედვით, შრომის ანაზღაურების მუხლით გაწეული გადასახდელების მაღალი ხვედრითი წილი სამინისტროს მთლიან შრომის ანაზღაურებასთან მიმართებაში მოდის საქართველოს პროკურატურაზე-სამივე წელზე საშუალოდ 65% და სამინისტროს აპარატზე-16%.
რაც შეეხება სამინისტროს აპარატის მოსამსახურეთა რიცხოვნობას, 2011-2012-2013 წლებში, ფინანსთა სამინისტროში წარდგენილი განაცხადების მიხედვით, განსაზღვრული იყო 316 ერთეულით -2011 წელს-4,569.8 ათასი, 2012 წელს- 4,629 ათასი და 2013 წელს-4,628.9 ათასი ლარის შრომის ანაზღაურების ფონდით (საპრემიო ფონდის გარეშე), რაც შესაბამისი წლების მიხედვით სახელმწიფო ბიუჯეტის კანონით დამტკიცდა.
ამავე განაცხადების მიხედვით, აპარატის საშტატო ნუსხა გაწერილია (გაშლილია) სრული საშტატო რიცხოვნობის (316 ერთეული) თითოეულ პოზიციაზე კონკრეტული კანამდებობრივი სარგოს მითითებით, ისე, რომ ჯამები შრომის ანაზღაურების ფონდს შეადგენს.
აღსანიშნავია, რომ სამინისტროს მიერ 2012 წლის 28 თებერვლის #27 ბრძანებით დამტკიცებული ცენტრალური აპარატის თანამდებობრივი სარგოები, რაც მთავრობასთან შეთანხებას საჭიროებდა, სამინისტროს მიერ მხოლოდ 2013 წლის 24 აგვისტოს არის შეთანხმებული.
წლების მიხედვით დამტკიცებული – 316 ერთეული საშტატო ნუსხის ფარგლებში კი, ვაკანსიების საშუალო ოდენობა შეადგენდა 2011 წელს-161, 2012 წელს-144 და 2013 წელს – 147 ერთეულს, რაც წლების განმავლობაში მოსამსახურეთა პრემირებაზე აისახებოდა.
რაც შეეხება პრემიის ხელფასთან თანაფარდობას, აუდიტის დასკვნის მიხედვით, 2011 წლის განმავლობაში მერყეობს 39%-დან 134%-მდე, 2012 წელს – 39%-დან 136%-მდე, 2013 წელს – 35%-დან 226%-მდე.
პასუხისმგებელი პირების ზეპირი განმარტებით, წლების მანძილზე აღნიშნული ტენდენცია პრემირებასთან დაკავშირებით განპირობებულია კვალიფიციური კადრების შენარჩუნების და მოზიდვის მოტივით.
აუდიტის დასკვნის მიხედვით, სამინისტროს მიერ საქართველოს მთავრობასთან შეთანხმებული ფორმის მიხედვით საშტატო განრიგი წარმოდგენილია მხოლოდ პოზიციების და თანამდებობრივი სარგოების 5 საფეხურიანი შკალის რანგირებით და მასში მითითებული არ არის საშტატო რიცხოვნობა. ხოლო, სამინისტროს მიერ შიდა ბრძანებით დამტკიცებული საშტატო ნუსხა წარმოდგენილია აპარატის სტრუქტურული ერთეულების მიხედვით საშტატო რიცხოვნობის მითითებით (თანამდებობრივი სარგოების გარეშე). აქედან გამომდინარე, მიზანშეწონილია სამინისტროს აპარატის საშტატო ნუსხა, რომელიც თანხმდება მთავრობასთან და აგრეთვე შესაძლებელია დამტკიცდეს შიდა ბრძანებითაც, წარმოდგენილი იყოს სრულყოფილი სახით. კერძოდ, სრული საშტატო რიცხოვნობის და თითოეულ პოზიციაზე თანამდებობრივი სარგოს მითითებით.
ცნობისთვის, სახელმწიფო აუდიტის სამსახურმა საქართველოს იუსტიციის სამინისტროს (აპარატის) მიერ 2011 წლის 1 იანვრიდან 2014 წლის 1 იანვრამდე გაწეული საქმიანობის შესაბამისობის აუდიტი ჩაატარა, რომელიც მოიცავს: ფინანსური ოპერაციების მოქმედ კანონმდებლობასთან შესაბამისობას; არაფინანსური აქტივების მიღება–გასვლის ოპერაციების კანონთან შესაბამისობას; შესყიდვების პროცედურების კანონთან შესაბამისობას და სახელშეკრულებო პირობების დაცვის უზრუნველყოფის საკითხებს.
