თბილისში, 13 ივნისს მომხდარმა სტიქიამ ზოოპარკის თითქმის ნახევარი გაანადგურა; 600 ბინადრიდან 300-მდე დაიხრჩო ან მოკლეს; ორ მტაცებელს – ზოლიან აფთარსა და ვეფხვს ამ დრომდე ეძებენ.
ზოოპარკის ადმინისტრაცია ჯერ კიდევ ვერ აკონკრეტებს რამდენი მტაცებელი ცხოველი იყო ზოოპარკის გარეთ, რადგან ვოლიერები, სადაც ვეფხვები ცხოვრობდნენ, 13 ივნისის ღამიდან მოყოლებული ამ დრომდე წყლით არის დაფარული და არ ჩანს ცხოველების საცხოვრებელი ბუნაგები. ამიტომაც, ზოოპარკის თანამშრომლების ნაწილი ვარაუდობს, რომ შესაძლოა, ვეფხვიც და აფთარიც ვოლიერებში იყოს დამხრჩვალი.
იცის თუ არა საზოგადოებამ სიმართლე ზოოპარკიდან გაქცეული ცხოველების შესახებ, რამდენი მტაცებელი ცხოველი ჰყავდა თბილისის ზოოპარკს და აქედან რამდენია დახოცილი, ზოოპარკში არსებულ სიტუაციასთან დაკავშირებით "გურია ნიუსი" ერთ-ერთ თანამშრომელს ესაუბრა, რომლის ვინაობას არ ვასახელებთ:
_ რა მდგომარეობაშია დღეს ზოოპარკი და გაწმენდილია თუ არა ის ვოლიერები, სადაც მტაცებელი ცხოველები იყვნენ?
_ ვოლიერების ნაწილია მხოლოდ გასუფთავებული, ზოგგან ისევ წყალი დგას და ამოტუმბვამდე ვერ შევდივართ სანახავად. მძიმე სიტუაციაა…
_ რაც შეეხება გაქცეულ ცხოველებს, არის თუ არა სიმართლე რომ მხოლოდ ერთ ვეფხვსა და ერთ აფთარს ვეძებთ? თქვენი ინფორმაციით, კიდევ რამდენ ცხოველზე არ გაქვთ ინფორმაცია?
_ ჩვენც ეგრე ვიცით, რომ ვეძებთ ვეფხვს, რომელიც ჩაკეტილ ვოლიერში იყო. რამდენიმე დღის წინ მივედით იმ ვოლიერთან, სადაც გვეგონა, რომ იქნებოდა; გავასუფთავეთ და იქ არ არის. სავარაუდოდ, ცხოველი ვოლიერზე ზემოდან გადავიდა, ვოლიერი გაღუნულია და იქ არის გამძვრალი. სულ 3 თეთრი ვეფხვი გვყავდა. ერთი ზოოპარკის ტერიტორიაზე მოკლული იყო. მეორე ის არის, მამაკაცი რომ დაგლიჯა და სპეცრაზმმა მოკლა; მესამეს კი ეძებენ.
_ზოოპარკის დირექტორი ამბობს, რომ ვეფხვი მცირე ზომისაა..
_არა, დიდი ზომისაა, სავარაუდოდ, ბაქსია, მამალი ვეფხვი…
_ თქვენ გქონდათ რაიმე ინფორმაცია, რომ ვეფხვები გაქცეულები იყვნენ?
_არანაირი ინფორმაცია არ გვქონდა. ცხოველებს ვერ ვპოულობდით, მაგრამ ვერც ვოლიერებთან მივდიოდით რომ გვენახა რა იყო დამხრჩვალი და რა გაქცეული. დიდი ალბათობით, ცხოველები, რომლებიც ღია ვოლიერებში იყვნენ, გაიქცეოდნენ, მაგრამ დახურული ვოლიერიდან ვეფხვის გაქცევას ნამდვილად არ ველოდით.
_ სულ რამდენი ვეფხვი იყო ზოოპარკში?
_ 3 თეთრი და 4 წითელი. ამ თეთრებიდან ორი მოკლულია, ერთი ზოოპარკის ტერიტორიაზე, მეორე აბრეშუმის ქარხნის ტერიტორიაზე, რომელმაც მამაკაცი მოკლა. ერთს კი ისევ ვეძებთ. 4 წითელი ვეფხვიდან კი, ორი ზუსტად ვიცი რომ მკვდარია, ფოტოებიც ვნახე.
_დანარჩენი ორი?
_ მათზეც ამბობენ, რომ დახოცილები არიან, მაგრამ არ ვიცი სიმართლეა თუ არა. ჩემი თვალით არ მინახავს. თანამშრომლები ამბობენ, რომ დახოცილები არიან.
_ შესაძლოა, ამ ინფორმაციას ზოოპარკის ადმინისტრაცია შეგნებულად არ ამხელდეს?
_ სხვა დროს ასეთი შემთხვევა არ ყოფილა, მაგრამ ახლა რამდენად ზუსტ ინფორმაციას გვეუბნებიან, ვერ გეტყვით.
_ რაც შეეხება ლომებს, თეთრი ლომების ოჯახის გარდა, რომელიმე გადარჩა?
_ ლომები ყველა დახოცილია. სულ 6 იყო შუმბას ჩათვლით. სამი დახურულ ვოლიერში იყო, სამივე მკვდარია. დანარჩენები დახოცეს.
_ ვრცელდებოდა ინფორმაცია, რომ ასევე ეძებდით მგლებსაც. სულ რამდენია მოკლული, რამდენს ვეძებთ და რამდენი გადარჩა?
_ ორი გადარჩა მხოლოდ და უსაფრთხოდ არიან ვოლიერებში. დანარჩენები მკვდარია. რაც შეეხება აფთრებს, სულ სულ 4 აფთარი და ერთი აფრიკული ძაღლი გვყავდა. აქედან სტიქიას ფაქტიურად გადარჩენილები იყვნენ ორნი, ტრანკვილიზატორით დაძინებულები გადმოვიყვანეთ ვოლიერებში, მაგრამ სტრესს ვერ გაუძლეს და დაიხოცნენ. ერთს ვეძებთ ისევ, თუმცა, ის დაკარგული აფთარი ნამდვილად არ არის საშიში ადამიანისთვის; თავს არ ესხმის…
_ მტაცებელი ცხოველებიდან კიდევ რა გადარჩა?
_დათვები… ერთი გვყავს ზოოპარკში, ორი თავშესაფარში გადაიყვანეს.
_ ვრცელდებოდა ინფორმაცია, რომ ცხოველების ნაწილი სპეცრაზმმა ვოლიერებში დახოცა…
_ვოლიერებში არა, გარეთ იყვნენ გამოსული, ზოოპარკის ტერიტორიაზე, წყლიდან ნაპირზე ამოსვლას ცდილობდნენ და ხოცავდნენ. შესაძლებელი იყო მათი დაძინებაც. მაგალითად, ტახი საშიში არ იყო და მაინც მოკლეს. დაბმული მგელი გვყავდა და ისიც მოკლული ვიპოვეთ.
_ საკმარისი ტრანკვილიზატორები გქონდათ გაქცეული ცხოველების დასაძინებლად?
_ ამის შესახებ არაფერი ვიცი, ვეტერინარებს უნდა ჰკითხოთ, იყო თუ არა ტრანკვილიზატორების საკმარისი რაოდენობა ზოოპარკში. ამასთან, ვაქცინა წამიერად არ აძინებს ცხოველს, დაახლოებით, 10-15 წუთი სჭირდება სანამ დაეძინება.
_ გადარჩენილ ცხოველებს როგორი მდგომარეობა აქვთ?
_ ბეგი ხელით შევიყვანეთ ვოლიერში, გადარჩა. სპილომდე წყალი არც მისულა. არც ეგზოტარიუმს შეხებია სტიქია. ყველა გველი შიგნით არის, შედით და ნახეთ. ცრუ ინფორმაცია გავრცელდა ავაზასთან დაკავშირებით, ავაზა ზოოპარკში საერთოდ არ გვყოლია. იაგუარი გვყავდა სამი და სამივე დახურული ვოლიერიდან დახოცილები ამოვიყვანეთ. არცერთი ადამიანის ხელით არ არის მოკლული, როგორც ჩანს დაიხრჩვნენ. შლამმა გადაუარა, ვოლიერები რომ გავჭერით, მაშინ ვნახეთ.
_არის ვოლიერი დარჩენილი, რომელიც ჯერ არ გაგიხსნიათ?
_თითქმის არცერთი ვოლიერი აღარ არის გაუხსნელი, ყველა ვნახეთ. ზემოდან გავჭერით, მაგრამ ქვემოთ ჯერჯერობით წყალი და ტალახია, ვერ ჩავდივართ.
_ სტიქიიდან მეორე დღესვე გავრცელდა ინფორმაცია, რომ თბილისის რამდენიმე უბანში დათვის ბელები იპოვეს – ნუცუბიძის პლატოზე და ვაზისუბანში…
_ეს ბელები ზოოპარკს არ ეკუთვნოდა. ბელები ზოოპარკში საერთოდ არ გვყოლია. თავშესაფრიდან იყვნენ სავარაუდოდ გაქცეულები, თუმცა, ზუსტი ინფორმაცია არ მაქვს.
შენიშვნა: "გურია ნიუსი" ცდილობს ზოოპარკის თანამშრომლის ინტერვიუში მოყვანილი ფაქტები ადმინისტრაციასთან კიდევ ერთხელ გადაამოწმოს.
