ოზურგეთის მუნიციპალიტეტის სოფელ მერიაში სამკერვალო ფაბრიკის მშენებლობის დაწყება აჭარის ავტონომიური რესპუბლიკის მთავრობის ყოფილმა თავმჯდომარემ ლევან ვარშალომიძემ და ოზურგეთის ყოფილმა მაჟორიტარი დეპუტატობის კანდიდატმა რამაზ ნიკოლაიშვილმა 2012 წლის 28 სექტემბერს დაანონსეს.
ოფიციალურ შეხვედრას, რომელიც სოფელ მერიაში "ნაციონალური მოძრაობის" წევრებმა მოაწყვეს, ინვესტორი, "ეკო ტექსტილის" მფლობელი ოზკან სუმერი და ოზურგეთში მცხოვრები ინდმეწარმეები და ბიზნესმენები ესწრებოდნენ.
თურქული კომპანია "ეკო ტექსტილის" "შვილობილი კომპანია "ეკო ჯორჯია" ფაბრიკის მშენებლობისთვის მილიონ დოლარიანი ინვესტიციის გახორციელებას გეგმავდა.
უახლესი ტექნიკით აღჭურვილი სამკერვალო ფაბრიკა 3000 კვ.მ ტერიტორიაზე უნდა განთავსებულიყო და 600-მდე ადგილობრივი უნდა დაესაქმებინა.
"სამკერვალო ფაბრიკაში ცნობილი ბრენდების "მარკ სპენსერის" და "ვიქტორია სეკრეტის" ტანსაცმელი შეიკერება"_ აღნიშნეს შეხვედრაზე წინა ხელსიუფლების წარმომადგენლებმა.
თითქმის სამი წელი გავიდა, შენობიდან კი, სადაც ინვესტორს სამკერვალო ფაბრიკა უნდა გაეხსნა, მხოლოდ კედლებია დარჩენილი.
პროექტი არ განხორციელდა.
ოზურგეთის რაიონულ სასამართლოში კი სსიპ "სახელმწიფო ქონების ეროვნულ სააგენტოსა" და შპს " EKO GEORGIA" შორის სასამართლო პროცესი, რამდენიმე დღეში უნდა გაიმართოს.
მოსართლე გიორგი ზვიადაძე იქნება.
სასამართლოდან გამოთხოვილი ოფიციალური დოკუმენტების საფუძველზე, დავის ფაქტობრივ გარემოებებში ირკვევა, შპს "EKO GEORGIA" –ს სააგენტოს სასარგებლოდ უნდა დაეკისროს ხელშეკრულებით გათვალისწინებული ვალდებულებების შეუსრულებლობის გამო, პირგასამტეხლოს გადახდა 546 500 ლარის ოდენობით.
"სსიპ "სახელმწიფო ქონების ეროვნულ სააგენტოსა და შპს " EKO GEORGIA"–ს შორის 2013 წლის 9 იანვარს გაფორმდა ნასყიდობის ხელშეკრულება, რომლის საფუძველზეც "EKO GEORGIA" –ს პირდაპირი მიყიდვის ფორმით საკუთრებაში გადაეცა ოზურგეთის მუნიციპალიტეტში, სოფელ მერიაში მდებარე 9 386 კვ.მ. არასასოფლო -სამეურნეო დანიშნულების მიწის ნაკვეთი, მასზე განთავსებული შენობა- ნაგებობებით, განაშენიანების ფართობით – 1272 კვ.მ.
ნასყიდობის ხელშეკრულების 3.1.2; 3.1.3 და 3.1.8 მუხლების თანახმად, მყიდველის მიერ ნაკისრ ვალდებულებებს წარმოადგენდა ხელშეკრულების პირველი მუხლით გადაცემულ მიწის ნაკვეთზე სამკერვალო ქარხნის აშენება და ამოქმედება ხელშეკრულების გაფორმებიდან 10 (ათი) თვის ვადაში.
ხელშეკრულების 3.1.2. მუხლით გათვალისწინებული საპრივატიზებო პირობის შესრულების მიზნით, არანაკლებ 500 000 აშშ დოლარის ეკვივალენტი ლარის ინვესტიციის განხორციელება.
ხელშეკრულების გაფორმებამდე წარმოდგენილი უპირობო და გამოუხმობი საბანკო გარანტიის ბე-ს თანხის ოდენობის შემცირების შემთხვევაში, 1 თვის ვადაში შევსება სრულ ოდენობამდე.
ნაკისრი ვალდებულებების შეუსრულებლობისათვის, ხელშეკრულებების 5.2.2 , 5.2.3 და 5.2.4 მუხლების საფუძველზე, 17.12.2014 წ. ჩათვლით შპს “ EKO GEORGIA“–ს ეკისრება შემდეგი პირგასამტეხლო – 500 ლარის ოდენობით დარღვევის დღიდან (10.11.213წ) ყოველ გადაცილებულ დღეზე (403 დღე ), რაც შეადგენს 201 500 აშშ დოლარის ეკვივალენტ ლარს.
3.1.8. მუხლით ნაკისრი ვალდებულების შესრულება უნდა განხორციელებულიყო არაუგვიანესს 06.03.2014წ 500 ლარის ოდენობით დარღვევის დღიდან ყოველ ვადაგადაცილებულ დღეზე 287 დღე, რაც შეადგენს 143 500 ლარს.
შპს " EKO GEORGIA" –ს სააგენტოს სასარგებლოდ დაეკისროს ხელშეკრულებით გათვალისწინებული ვალდებულებების შეუსრულებლობის გამო, პირგასამტეხლოს გადახდა 546 500 ლარის ოდენობით."
"გურია ნიუსი" დაუკავშირდა "EKO GEORGIA" ინტერესების დამცველს დავით ტუკვაძეს, რომელიც აღნიშნავს, რომ სასამართლოში მათ წინააღმდეგ სარჩელის შეტანის შესახებ საქმის კურსში არ იყო.
"ჩემთვის უცნობია სასამართლო საქმესთან დაკავშირებით ეს ინფორმაცია. არ ვიცოდით, რომ მოსარჩელემ მიმართა სასამართლოს. ალბათ აწი გვაცნობებენ ამასთან დაკავშირებით. პირიქით , ჩვენ გვაქვს ადმინისტრაციული სარჩელი შეტანილი ეკონომიკის სამინისტროს წინააღმდეგ“_ აღნიშნავს ადვოკატი და დასძენს, რომ ინვენსტორს ჰქონდა ინტერესი, რომ აღნიშნული პროექტი განეხორციელებინა, თუმცა გარკვეული მიზეზების გამო ვერ მოხერხდა, თუმცა კონკრეტულად რა მიზეზებზეა საუბარი, ადვოკატი არ საუბრობს.
"სამუშაოების ჩატარება რომ ამ ეტაპამდე ვერ მოხერხდა, ეს ფაქტიც სახეზეა"_ამბობს ტუკვაძე.
ჩვენ დავუკავშირდით "სახელმწიფო ქონების ეროვნულ სააგენტოს" მარკეტინგისა და საზოგადოებასთან ურთიერთობის სამსახურის თანამშრომელს ხათუნა ტეტუნაშვილს, რომელმაც გვითხრა, რომ კომენტარს მხოლოდ სასამართლოს შემდეგ გააკეთებს:
"ჩვენი პოზიცია ისაა, რომ უკვე სარჩელი გვაქვს შეტანილი სასამართლოში, სასამართლო რა გადაწყვეტილებას მიიღებს ეს უკვე სხვა საქმეა, ამის შემდეგ შეგვიძლია გავაკეთოთ კომენტარი" _ამბობს ტეტუნაშვილი.
ადგილობრივების თქმით, აღნიშნული ტერიტორია და შენობა, შეძენილი აქვს წარმოშობით ოზურგეთელ ბიზნესმენს, რომელსაც ამავე სოფელში ბიზენსთან დაკავშირებით პირადი ინტერესები აქვს.
აღნიშნულ საქმესთან დაავშირებით სასამართლო პროცესი ჯერ ჩანიშნული არ არის.
