ქალაქ ოზურგეთის მუნიციპალიტეტის საკრებულოს სხდომაზე ექვსი საკითხი იქნა განხილული. სხდომა წუთიერი დუმილით დაიწყო.
"სამწუხაროდ, მოულოდნელად გარდაიცვალა საკრებულოს დეპუტატი გოჩა მგელაძე და ყველას ვთხოვ მის ხსოვნას პატივი მივაგოთ წუთიერი დუმილით." – თქვა საკრებულოს თავმჯდომარემ გელა კობალაძემ.
საკრებულოს ამავე სხდომაზე მიღებული იქნა ქალაქ ოზურგეთის მუნიციპალიტეტის საკრებულოს წევრის გოჩა მგელაძის უფლებამოსილების ვადამდე შეწყვეტის შესახებ – ქალაქ ოზურგეთის მუნიციპალიტეტის საკრებულოს მიერ ცნობად მიღების თაობაზე.
_ ეს არის პროცედურა, რომელიც აუცილებლად უნდა ჩატარებულიყო და სამწუხაროდ, მოგვიწია ამის გაკეთება, – თქვა დეპუტატმა, ირინა საჯაიამ.
საკრებულოს სხდომის დასასრულს გელა კობალაძემ დეპუტატ ნათია შარაშენიძის განცხადება წაიკითხა.
"2015 წლის 28 დეკემბერს ქალაქ ოზურგეთის მუნიციპალიტეტის საკრებულოს საპროცედურო-სამანდატო, იურიდიულ და ეთიკის კომისიის თავმჯდომარემ ირინა საჯაიამ სამუშაო საათებში, სამუშაო ოთახში განახორციელა ჩემს მიმართ სიტყვიერი შეურაცყოფა და მუქარა, ვფიქრობ მისი ქმედებები ეწინააღმდეგება არა მარტო ეთიკის ნორმებს, არამედ იმ თანამდებობასაც რომელიც უკავია ქალბატონ საჯაიას.
ყოველივე ზემოთქმულიდან გამომდინარე ,მოვითხოვ უახლოეს საკრებულოს სხდომაზე განხილული და შესწავლილი იქნას მისი თანამდებობაზე ყოფნის შესაბამისობის საკითხი."- წერია განცხადებაში.
შარაშენიძეს სხდომაზე კობალაძემ შემდეგ პასუხი გასცა.
" დღეს არ იმყოფება საკრებულოს სხდომაზე ნათია შარაშენიძე, მაგრამ მის წერილს გავცემ პასუხს.
საქართველოს ორგანული კანონის "ადგილობრივი თვითმმართველობის კოდექსი"-ს 37-ე მუხლის მე-3 ნაწილის და "ქალაქ ოზურგეთის მუნიციპალიტეტის საკრებულოს რეგლამენტის დამტკიცების შესახებ“ – ქალაქ ოზურგეთის მუნიციპალიტეტის საკრებულოს 2014 წლის 2 აგვისტოს #1 დადგენილებით დამტკიცებული რეგლამენტის 103-ე მუხლის 1-ლი პუნქტის თანახმად, მუნიციპალიტეტის საკრებულოს კომისიის თავმჯდომარის თანამდებობიდან გადაყენების საკითხი მუნიციპალიტეტის საკრებულოს წინაშე შეიძლება წერილობით დასვან მუნიციპალიტეტის საკრებულოს სიითი შემადგენლობის არანაკლებ ერთმა მეხუთედმა, შესაბამისი კომისიის შემადგენლობის ნახევარზე მეტმა და მუნიციპალიტეტის საკრებულოს თავმჯდომარემ.
მე, როგორც საკრებულოს თავმჯდომარეს მიმაჩნია, რომ თქვენსა და ირინა საჯაიას შორის არსებობს პიროვნული კონფლიქტი, გამომდინარე აქედან, თქვენი მოთხოვნა ვერ დაკმაყოფილდება, რომ განხილული იქნას საკრებულოს უახლოეს სხდომაზე, ქალაქ ოზურგეთის მუნიციპალიტეტის საკრებულოს სამანდატო-საპროცედურო, იურიდიულ საკითხთა და ეთიკის კომისიის თავმჯდომარის თანამდებობაზე ყოფნის შესაბამისობის საკითხი." – განაცხადა გელა კობალაძემ.
ნათია შარაშენიძის განცხადებაზე მცირე კომენტარი გააკეთა ირინია საჯაიამ.
" არ ვაპირებ მის განცხადებაზე კომენტარის გაკეთებას, რადგან სულ პროვოკატორობს ეს ქალბატონი. უბრალოდ მინდა ვთქვა, რომ შეურაცხყოფა თვითონ მომაყენა, როდესაც “ფეისბუქზე“ გაავრცელა კარიკატურა, სადაც მერის ქურთუკის ჯიბეში სამი დეპუტატი ვიყავით. ეს არ არის შეურაცხყოფა?" _ თქვა საჯაიამ.
ამ საკითხს გამოეხმაურა დეპუტატი გოჩა ძიმისტარაშვილი.
" რაც გავრცელდა ინტერნეტში, საუბარი მაქვს კარიკატურაზე, არის სიმართლე. ეს არის ის ხალხი, რომელიც დაახლოებულია მერთან." – თქვა გოჩა ძიმისტარაშვილმა.
საკრებულოს სხდომის დასასრულს ცნობილი გახდა, რომ ნათია შარაშენიძემ განცხადება ასევე ოზურგეთის რაიონულ პოლიციაში შეიტანა.
