ასოციაცია "მომავლის იმედის" თავმჯდომარე თამარ ხაჭაპურიძე რამოდენიმე წლის განმავლობაში უშედეგოდ ცდილობს ხელისუფლების ყურადღება ე. წ. "ჩვილების საქმისკენ" მიმართოს. ის სოციალური ქსელების საშუალებით პერმანენტულად ავრცელებს ვიდეორგოლებს, რომლებშიც ამ საქმესთან დაკავშირებული მასალების გასაჯაროებას ცდილობს. როგორც თავად აცხადებს, ხელისუფლება მის ყველა მცდელობას დუმილით პასუხობს.
ირაკლი შოთაძის მთავარ პროკურორად დამტკიცებისას, თამარ ხაჭაპურიძემ მოახერხა პარლამენტის სხდომათა დარბაზში შესვლა. მან მაშინ პირობა მიიღო შოთაძისგან, რომ მთვარ პროკურორად დანიშვნის შემთხვევაში, ის პირად კონტროლზე აიყვანდა ამ საქმეს. სოციალურ ქსელში დღეს ხაჭაპურიძის განცხადება გავრცელდა, რომელსაც უცვლელად გთავაზობთ:
"საქმე, რომლითაც ირაკლი შოთაძემ მთავარი პროკურორის რანგში მისი პირველი სამუშაო დღე დაიწყო, კვლავ უსაფუძვლოდ ჭიანურდება.
პარლამენტში მის მიერ გამოთქმული ინიციატივის თანახმად, ბატონი ირაკლი შოთაძე მართლაც შემხვდა პირველივე სამუშაო დღეს. შეხვედრაზე დაბარებული ჰყავდა თავის მოადგილეები, ქ.თბილისის პროკურორი, ე.წ. ჩვილების საქმის პროკურორი და გამომძიებელი. იმავე დღეს ი.შოთაძემ ქ.თბილისის პროკურატურას ჩამოართვა საქმე და მთავარ პროკურატურაში გადაიტანა. რამოდენიმე დღეში, ასევე ბატონი ირაკლის ინიციატივით შევხვდი მის პირველ მოადგილეს ბ-ნ მამუკა ვასაძეს, საქმის ახალ პროკურორს, ზედამხედველ პროკურორს და გამომძიებელს. კვლავ განვიხილეთ საქმის დეტალები.
აღნიშნული შეხვედრების შემდეგ კიდევ უფრო მტკიცედ შემიძლია განვაცხადო, რომ პროკურატურას საქმეზე აბსოლუტურად ყველა მტკიცებულება გააჩნია და პარლამენტში დასმულ ჩემს შეკითხვაზე – თუ რა მტკიცებულება დარჩათ მოსაპოვებელი, მათ პასუხი არ აქვთ.
მაშ, რაღატომ არ უყენებენ ბრალს დამნაშავეებს? მთავარ პროკურორთან შეხვედრა 2015 წლის 30 ნოემბერს შედგა, მას შემდეგ უკვე საკმაო დროც გავიდა და ამასობაში სავარაუდო მთავარი დამნაშავე ოჯახიანად საზღვარგარეთ საცხოვრებლადაც გაუშვეს.
საყურადღებოა, რომ ზემოდასახელებულ შეხვედრებზე კიდევ ერთი საკითხი იყო ძალზედ აქტუალური და იქნებ მთავარიც. მათ აინტერესებდათ რა აუდიო-ვიდეო მასალა გამაჩნდა სახელმწიფო დაცვის უფროსის, ანზორ ჩუბინიძის კავშირზე ჩვილების საქმის გამოძიების შეფერხებასთან. შესაძლოა გარკვეულ წრეებში ა.ჩუბინიძის ავტორიტეტის უსაფრთხოება უფრო მნიშვნელოვანია, ვიდრე ქვეყნიდან ყალბი დოკუმენტებით გაყვანილი ჩვილი ბავშვების საკითხი. ცნობისათვის: ანზორ ჩუბინიძე ბიძინა ივანიშვილის პირადი დაცვის უფროსი იყო წლების განმავლობაში.
მიუხედავად მთავარი პროკურორის საფუძვლიანი დაინტერესებისა და მის მიერ პარლამენტის ტრიბუნიდან ჩვილების საქმესთან მიმართებაში პირადი შეცდომის აღიარებისა, ზემოჩამოთვლილი ზოგიერთი გარემოება მიჩენს ეჭვს, რომ ჩვილების საქმის გამოძიების დასრულება და დამნაშავეთათვის ბრალის წარდგენა არც ამჯერადაა გეგმაში.
ამრიგად, პარლამენტის იურიდიულ საკითხთა კომიტეტის პირველი და საჯარო დავალება ახალი მთავარი პროკურორისადმი შესაძლოა არც შესრულდეს. "-აცხადებს ასოციაცია "მომავლის იმედის" თავმჯდომარე.
"გურია ნიუსი" დაუკავშირდა საქართველოს მთავარი პროკურატურის პრესცენტრს, სადაც განაცხადეს, რომ გაეცნობოდნენ ხაჭაპურიძის განცხადებას და მხოლოდ ამის შემდეგ გააკეთებდნენ განმარტებას. საკმაო ლოდინის შემდეგ ჩვენ ისევ ვცადეთ მთავარ პროკურატურასთან დაკავშირება, სადაც ჩვენს ზარებს აღარ უპასუხეს.
მთავარი პროკურატურის პოზიციას ამ საქმესთან დაკავშირებით, მოპოვებისთანავე შემოგთავაზებთ.
