ფრაქცია "თავისუფალი დემოკრატები" მოქალაქეებისთვის უიმედო საბანკო ვალების ჩამოწერის შესახებ საკანონმდებლო ინიციატივით გამოდიან.
ფრაქციის წევრმა დავით ონოფრიშვილმა მედიის წარმომადგენლებთან კანონპროექტის თაობაზე განმარტებები გააკეთა.
დავით ონოფრიშვილის განცხადებით, კანონპროქტის ამოქმედების შედეგად, ათასობით მოქალაქეს შესაძლებლობა ექნება, გათავისუფლდეს უიმედო სესხისა და სანქციის დაფარვის ვალდებულებისაგან, ფინანსური ინსტიტუტების მიერ შემუშავებული შიდა კრიტერიუმების დაკმაყოფილების შემთხვევაში. მეორე მხრივ, ფინანსურ ინსტიტუტს შესაძლებლობა მიეცემა, მის მიერ ნაპატიები სასესხო ვალდებულების ღირებულება ერთობლივი შემოსავლიდან გამოიქვითოს
პროექტის ინიციატორის განმარტებით, ეს შესაბამისი საგადასახადო შეღავათების დაწესების მეშვეობით გახდება შესაძლებელი. ფინანსური ინსტიტუტების მიერ, ფიზიკური პირებისთვის სასესხო ვალდებულების პატიების შედეგად მიღებული სარგებელი საშემოსავლო გადასახადისგან გათავისუფლდება (მოქმედი კანონმდებლობით, აღნიშნული თანხა ფიზიკური პირისთვის შემოსავალს წარმოადგენს, რაც გადასახადით დაბეგვრას ექვემდებარება).
არსებული მდგომარეობით, ფინანსური ინსტიტუტების მიერ, ამგვარი სესხების ერთობლივი შემოსავლიდან გამოქვითვას ან უიმედო ვალად აღიარებას გარკვეული პროცედურები და ხარჯები სჭირდება, ხოლო პატიების შემთხვევაში, ნაპატიები სესხი კანონმდებლობის თანახმად, დაბეგვრას ექვემდებარება.
დეპუტატის თქმით, მოსახლეობას სესხების გასტუმრებაში პრობლემები 2008 წლის ომმა, ფინანსურმა კრიზისმა შეუქმნა და არც შემდგომი წლები იყო ამ თვალსაზრისით მარტივი.
"ჩვენ ვთვლით, რომ ამით გადაიდგმება ის პრინციპული ნაბიჯი,რომ ბევრ ჩვენს თანამოქალაქეს მრავალი წელია აქვთ სესხი, რომლის ჯარიმებიც მატულობს. მათ აქვთ ეს პრობლემა და და ისინი გადახდისუუნაროები არიან სხვადასხვა მიზეზთა გამო.
კანონროექტი ასეთ ადამიანებს შესაძლებლობას მისცემს მიმართონ ბანკებს და ბანკები თუ ჩათვლიან საჭიროდ, მათ მიერვე ჩამოყალიბებული კრიტერიუმების შესაბამისად, ამ სესხს ჩამოაწერენ", _ განაცხადა დავით ონოფრიშვილმა.
"საგადასახადო კოდექსში" ცვლილებების პროექტი, პარლამენტში გუშინ დარეგისტრირდა.
