საქართველოს პარლამენტის წევრის, ელდარ-ლუკა კურტანიძის საკუთრებაში 4 ბინა და 4 მიწის ნაკვეთია.
ამის შესახებ კურტანიძის ქონებრივ დეკლარაციაშია აღნიშნული, რომელიც მან 2016 წლის 22 აპრილს შეავსო.
დეკლარაციის მიხედვით, უძრავ-მოძრავი ქონება კურტანიძის 100%-იან საკუთრებაშია. კერძოდ, ლუკა კურტანიძე ფლობს 4 ბინას თბილისში: აბაშიძის ქუჩაზე 160.00 კვ.მ, ჯანაშიას ქუჩაზე ფართობი – 48.00 კვ.მ, გორგასლის ქუჩაზე, ფართობი – 31.00 კვ.მ და ქეთევან დედოფლის გამზირზე, ფართობი – 57.00 კვ.მ;
ასევე, 4 მიწის ნაკვეთს: ბორჯომში, სოფელი სადგერი, ფართობი – 260.00 კვ.მ; მცხეთა-მთიანეთი, ბულაჩაური, ფართობი – 810.00; კვ.მ; წყნეთი, ქეთქეთების 11, ფართობი – 846.00 კვ.მ; ბორჯომში, თორი, ფართობი – 987.00 კვ.მ;
გარდა ამისა, კურტანიძის საკუთრებაშია 2005 წელს გამოშვებული მსუბუქი ავტომობილი NISSAN PATHFINDER.
რაც შეეხება დეპუტატის ფინანსურ მდგომარეობას, როგორც დეკლარაციაშია აღნიშნული კურტანიძემ 2015 წლის განმავლობაში ჯამში 79 242 ლარი მიიღო.
საქართველოს შინაგან საქმეთა სამინისტროს პოლიციის აკადემიიდან, სადაც ის ინსტრუქტორია 26995.65 ლარი აქვს მიღებული, ხოლო საქართველოს პარლამენტის წევრობისთვის 52247.00 ლარი.
დეკლარაციის შევსების მომენტში კი, მის საბანკო ანგარიშზე "ქართუ" ბანკში 8344.41 ლარი, ხოლო "თი–ბი–სი" ბანკში 489.81 ლარი იყო.
დეპუტატის სახელზე არ არის საბანკო სესხები, რაც შეეხება მის გასავალს, 2015 წელს ელდარ კურტანიძემ სარემონტო-სამშენებლო სამუშაოებისთვის 23000 დოლარი დახარჯა.
აღსანიშნავია ისიც, რომ 2015 წელს შევსებულ დეკლარაციაში ლუკა კურტანიძის უძრავი ქონება 5 მიწის ნაკვეთითა და 3 ბინით შემოიფარგლებოდა. თუმცა, 2016 წელს შევსებულ ქონებრივ დეკლარაციაში თბილისში, დიღმის სასწავლო საცდელი მეურნეობის ტერიტორიაზე არსებული 700.00 კვ.მ-ის ფართობის მიწის ნაკვეთი აღარ წერია. გაასხვისა თუ არა ეს მიწის ნაკვეთი კურტანიძემ უცნობია.
ასევე, 2016 წლის დეკლარაციაში აღნიშნულია, რომ კურტანიძე ფლობს თბილისში, ქეთევან დედოფლის გამზირზე მდებარე 57.00 კვ.მ-ის ფართობის ბინას. დეკლარაციაში არ არის აღნიშნული რა დაუჯდა ეს ბინა კურტანიძეს ან როდის შეიძინა.
ასევე აღსანიშნავია, რომ 2014 წელს, კურტანიძემ სამშენებლო-სარემონტო სამუშაოებში 21 000 დოლარი დახარჯა.
"გურია ნიუსი" აღნიშნულ საკითხთან დაკავშირებით ლუკა კურტანიძის კომენტარს მოგვიანებით შემოგთავაზებთ.
