პერსონალურ მონაცემთა დაცვის ინსპექტორი თამარ ქალდანი მოსახლეობას პირადი ინფორმაციის გაცემასთან დაკავშირებით რჩევებს აძლევს.
ქალდანის განცხადებაში აღნიშნულია, რომ მოსახლეობა არ არის ვალდებული გასცეთ პირადი მონაცემები და არავის აქვს უფლება მათი გამჟღავნება გაიძულოთ.
როგორც პერსონალურ მონაცემთა დაცვის ინსპექტორის აპარატის განცხადებაშია ნათქვამი, მოქალაქის არჩევანია, მიაწვდის თუ არა ვინმეს მის შესახებ ინფორმაციას.
"არჩევნების მოახლოვებასთან ერთად ამომრჩევლის პერსონალური მონაცემების შეგროვების საკითხი სულ უფრო აქტუალური ხდება. მოქალაქეები საუბრობენ იმაზე, რომ მათგან სხვადასხვა პირები პერსონალური მონაცემების მოპოვებას ცდილობენ, ეკითხებიან პირადი ნომერს, ასაკს, სთხოვენ ხელმოწერას სხვადასხვა დოკუმენტზე ან იმის თქმას, თუ ვის აძლევენ ხმას.
თუ ასეთი თხოვნით თქვენც მოგმართეს, იცოდეთ, რომ, არ ხართ ვალდებული გასცეთ მონაცემები და არავის აქვს უფლება გაიძულოთ მათი გამჟღავნება. თქვენი არჩევანია, მიაწვდით თუ არა ვინმეს თქვენ შესახებ ინფორმაციას და რა მოცულობით. ამ გადაწყვეტილების მიღებისას, კი მნიშვნელოვანია გაითვალისწინოთ, რომ: ინფორმაციის გაცემამდე გაქვთ უფლება მოითხოვოთ განმარტება, ვინ და რა მიზნით აგროვებს თქვენს მონაცემებს და რისთვის აპირებს მომავალში მათ გამოყენებას.
თუ დოკუმენტზე ხელმოწერას გთხოვენ, თქვენ გაქვთ უფლება გაეცნოთ სრული ტექსტს და შესაბამისად მიიღოთ გადაწყვეტილება;
თქვენ გაქვთ უფლება არ გაამჟღავნოთ ოჯახის წევრებისა და ახლობლების მონაცემები მათთან შეთანხმების გარეშე," _ ნათქვამია განცხადებაში.
ამასთან პერსონალურ მონაცემთა დაცვის ინსპექტორის აპარატი მოქალაქეებს მოუწოდებს, რომ თუ მიიჩნევენ, რომ მათი მონაცემები შეიძლება უკანონოდ გამოიყენონ, დაუკავშირდეს ინსპექტორის ოფისს: თბილისი ვაჩნაძის ქუჩა #7, ტელ: 2 42 1000, ელ-ფოსტა office@pdp.ge
