საკონსტიტუციო სასამართლოს ახლადარჩეულმა თავმჯდომარემ მედიასთან პირველი კომენტარი გააკეთა.
„დიდი მადლობა მინდა გადავუხადო საკონსტიტუციო სასამართლოს თითოეულ წევრს, რომლებმაც გამომიცხადეს დიდი ნდობა. ეს არის ძალიან დიდი პასუხისმგებლობა და დიდი პატივი. რაც შეეხება იმას, თუ რა იქნება პრიორიტეტები, პრიორიტეტები იქნება, რა თქმა უნდა, საკონსტიტუციო სასამართლოს წინაშე არსებულ ყველა გამოწვევაზე ადეკვატური რეაგირება. არსებული საქმეები, რომელსაც სჭირდება, რაც შეიძლება სწრაფად მიხედვა, რათა ქვეყანაში უზრუნველყოფილი იყოს ადამიანის ძირითადი უფლებების და თავისუფლებების დაცვა. ასევე ხელისუფლებებს შორის ბალანსის გარანტირებული დაცვა", _ განაცხადა თავაძემ.
ჟურნალისტის კითხვაზე რამდენად დამოუკიდებელი იქნება ის ხელისუფლებისგან და ხომ არ მოექცევა მთავრობის გავლენის ქვეშ, თავაძემ აღნიშნა, რომ გამოტანილი გადაწყვეტილებები გამოაჩენს იმას, თუ რამდენად დამოუკიდებელია სასამართლო:
„ამაზე მაქვს ძალიან მოკლე პასუხი: „საქმემან შენმან გამოგაჩინოს შენ“, ლაკმუსის ქაღალდი იმისა, არის თუ არა სასამართლო დამოუკიდებელი, იქნება ჩვენი გადაწყვეტილებები. რაც შეეხება მაღალი საზოგადოებრივი ინტერესის მქონე საქმეებს, ჩვენთვის ყველა საქმე არის პრიორიტეტული და ვიმოქმედებთ კანონით დადგენილი ვადების მიხედვით. თქვენ ნახავთ ჩემი თავმჯდომარეობის პერიოდში როგორი იქნება არასამთავრობოებებთან ურთიერთობა, ყველა კითხვას ჩვენი გადაწყვეტილებებით გაეცემა პასუხი. ჩვენ საზოგადოებასთან საუბარს სწორედ გადაწყვეტილებებით ვაპირებთ და არა კამერებით.“- განაცხადა თავაძემ.
