“ცოტა ხანში ქვეყნებს შორის წავა ტაციაობა, თუ სად მოიხადოს სასჯელი სააკაშვილმა”

"ცოტა ხანში ქვეყნებს შორის წავა ტაციაობა, თუ სად მოიხადოს სასჯელი სააკაშვილმა და ამ სასჯელის მოხდის მერე რომელ ქვეყანას გადასცენ სასჯელის მოსახდელად, _ ამის შესახებ ჟურნალისტებს საქართველოს ლტოლვილთა და განსახლების მინისტრმა სოზარ სუბარმა განუცხადა.

სოზარ სუბარი დარწმუნებულია, რომ სააკაშვილს ქართული მართლმსაჯულების წინაშე წარდგომა მაინც მოუწევს.

„მიხეილ სააკაშვილის ექსტრადირება მოთხოვნილია, თუმცა, ის სხვა ქვეყნის მოქალაქეა. ცოტა ხანში ქვეყნებს შორის წავა ტაციაობა, თუ სად მოიხადოს სასჯელი სააკაშვილმა და ამ სასჯელის მოხდის მერე რომელ ქვეყანას გადასცენ სასჯელის მოსახდელად. სავარაუდოდ, როგორც საქართველოს, უკრაინასაც არ ექნება უფლება, თავისი მოქალაქე სხვა ქვეყანას გადასცეს, თუმცა, დარწმუნებული ვარ, სააკაშვილს მაინც მოუწევს ქართული მართლმსაჯულების წინაშე წარდგომა. იმაშიც დარწმუნებული ვარ, რომ უკრაინაში სულ მალე დაიწყება მის მიმართ სისხლის სამართლებრივი დევნა, ასე რომ რიგში მოგვიწევს ჩადგომა – ან ჩვენ ვიქნებით პირველი სადაც პასუხს აგებს, ან უკრაინა“, _ განაცხადა სუბარმა.

სუბარი ფიქრობს, რომ სააკაშვილის მიერ ოდესის გუბერნატორის პოსტის დატოვება მისი სურვილი არ იქნებოდა. სუბარის შეფასებით, სააკაშვილი ვერც ერთ ქვეყანაში გაამართლებს.

„მე არა მგონია, ეს სააკაშვილის გადაწყვეტილება ყოფილიყო. ის იძულებული გახდა ეს გაეკეთებინა და ამის შესახებ თავად უკრაინაშიც დიდი ხანია მიდის საუბარი. ვერ გაამართლა ერთ ქვეყანაში და ვერ გაამართლებს ვერც მეორე, მესამე, ან მეშვიდე ქვეყანაში მისი დიქტატორული ამბიციები. რაც ყველაზე მტკივნეულია, სააკაშვილის მმართველობის პერიოდში მისი მიზეზებით მოხდა საქართველოს ტერიტორიების 20%-ის დაკარგვა და შემდეგ რუსეთის მიერ მათი აღიარება. ეს არის დანაშაული და სააკაშვილი საქართველოს ისტორიაში შევა როგორც საქართველოს ტერიტორიების გამფლანგველი“, _ განაცხადა სუბარმა.