დღეს, ოზურგეთის მუნიციპალიტეტის საკრებულოს რიგგარეშე სხდომა შედგა, სადაც მხოლოდ ერთი საკითხი განიხილეს, თუმცა, თემა ხმაურიანი აღმოჩნდა.
საკითხზე _ "საქართველოს სახელმწიფო ბიუჯეტით გათვალისწინებულ რეგიონებში გასახორციელებელი პროექტების ფონდიდან დაფინანსების მისაღებად, მუნიციპალიტეტის გამგეობის მიერ წარმოდგენილი საპროექტო წინადდებების დამტკიცების შესახებ“, ოზურგეთის მუნიციპალიტეტის საკრებულოს განკარგულების მიღების თაობაზე, _ ისაუბრა ოზურგეთის მუნიციპალიტეტის გამგებლის მოადგილემ ბადრი გობრონიძემ.
მან აქცენტი გააკეთა რეგიონში გასახორციელებელი პროექტების თანადაფინანსებაზე, რომელსაც ოზურგეთის მუნიციპალიტეტი გაუწევს მთავრობის მიერ განსაზღვრულ პრიორიტეტულ პროექტებს.
_ აქ წარმოდგენილია პროექტების ჩამონათვალი, რომელიც 2017 წელს უნდა გახორციელდეს ოზურგეთის მუნიციპალიტეტში. რეგიონში გასახორციელებელი ფონდის დაფინანსებით. წლევანდელი რეგფონდის მთლიანი მოცულობა არის 4 მილიონ 916893 ლარი, ხოლო მუნიციპალიტეტის თანადაფინანსება შეადგენს ერთი მილიონ 246293 ლარს, რაც სულ არის 25%, _ თქვა გობრონიძემ.
"ნაციონალური მოძრაობის" წევრმა დეპუტატები _ დავით მჟავანაძე და ბესო ქათამაძე დაინტერესდნენ, რატომ ხდება 25%-იანი თანადაფინანსება, ეს ხომ არ არის ნაშთი, რომელიც დაუხარჯავი დარჩა და 2017 წელში გადმოვიდა.
თავის მხრივ, მუნიციპალიტეტის გამგებლის მოადგილემ ბადრი გობრონიძემ უპასუხა ოპოზიციონერ დეპუტატებს, რომ ოზურგეთის მუნიციპალიტეტი შეყვანილია მაღალშემოსავლიანი მუნიციპალიტეტების სიაში. სწორედ ამიტომ ხდება 25%-იანი თანადაფინანსება.
_ საიდან არის ეს შემოსავლები? ჩვენ ვარეგისტრირებთ მიწებს, სასოფლოა ეს თუ არასასოფლო, ვყიდით. ეს შემოსავლებია. ასევე, ნახეთ, მშენებლობებია შეკვეთილში, ურეკში, იხდიან ქონების გადასახადს. მხოლოდ ქონების შემოსავლების გადასახადი არ არის ის ოთხი მილიონი, რომელიც წელს შემოვიდა, _ თქვა გობრონიძემ.
_ ვერც ხარჯავთ და ვერც გეგმავთ, _ არ ცხრებოდა დეპუტატი ბესო ქათამაძე. დავით მჟვანაძემ კი ყოველივე ამას დემაგოგია უწოდა.
_ რა არის დემაგოგია? პასუხის გაცემის ნუ შეგვეშინდება ასეთ კითხვებზე. ისეთი კითხვები დასვით, რომელიც დღეს განსახილველ საკითხს ეხება. თუ ისეთ კითხვებს სვამთ, რომელიც ბიუჯეტის ელემენტარულ ანატომიას ეხება, დარჩით სხდომის შედეგ და აგიხსნით, _ უთხრა მათ ოზურგეთის მუნიციპალიტეტის გამგებლის მოადგილე დიმიტრი კვერღელიძემ და განმარტა, რომ მუნიციპალიტეტის მოვალეობაა გაზარდოს ბიუჯეტი (რაც ყველამ უნდა იცოდეს). ის შედგება საგადასახადო, არასაგადასახადო და ჯარიმების გადასახადისგან. რას ეძახით დემაგოგიას? _ ჰკითხა მან ოპოზიციონერ დეპუტატებს.
კამათის დასრულებას ხელი შეუწყო საკრებულოს თავმჯდომარის, დავით დარჩიას მიმართვამ _ საკითხზე საუბარი ამით ამოიწურა, განკარგულების მიღებას მხარი დავუჭიროთ, _ თქვა დარჩიამ, რაზეც ოპოზიციონერი დეპუტატების გარდა, ყველა დაეთანხმა.
_ ჩვენ არც წინააღმდეგი წავსულვართ და არც მხარს ვუჭერთ ამ საკითხს. რაც კეთდება, კარგი პროექტებია. თუმცა, ჩვენი ინფორმაციით, აქ ამოღებულია ორი პროექტი. სწორედ ამიტომ არ ვეთანხმებით საბოლოოდ. ახლა ვაპირებთ, საკრებულოს მივწეროთ ამის შესახებ და შემდეგ თქვენვე გაცნობებთ, _ თქვა სხდომის დასრულების შემდეგ „გურია ნიუსთან“ საუბრისას ნასაკირალის მაჟორიტარმა დეპუტატმა ბესო ქათამაძემ.
საკრებულოს რიგგარეშე სხდომაზე განხილული ერთადერთი საკითხის მიხედვით, 2017 წელს ოზურგეთის მუნიციპალიტეტში დაგემილია შემდეგი პროექტები: საავტომობილო გზების რებილიტაცია სოფლებში: ნაგომარი, გაღმა დვაბზუ და ვაკიჯვარი-მთისპირის დამაკავშირებელი გზის. ასევე, მოხდება სოფელ ბოხვაური-შემოქმედის დამაკავშირებელი გზის ასფალტ-ბეტონის საფარის მოწყობა და დაიწყება კურორტ გომისმთის წყალმომარაგების სისტემის მშენებლობა.
