7 ივნისს, ოზურგეთის მუნიციპალიტეტის საკრებულოს სხდომა გაიმართა, სადაც ათი საკითხი წარმოადგინეს. მეტ-ნაკლები სიმწვავის მქონე საკითხებს, დროც ასევე მეტ-ნაკლები დაუთმეს.
პირველი საკითხი _”ოზურგეთის მუნიციპალიტეტის 2017 წლის ბიუჯეტის დამტკიცების შესახებ”, ოზურგეთის მუნიციპალიტეტის საკრებულოს 2016 წლის 23 დეკემბრის დადგენილებაში ცვლილების შეტანის თაობაზე” _ საფინანსო სამსახურის უფროსმა გია მამაკაიშვილმა წარმოადგინა.
მან განმარტა, რომ შემოსავლების ნაწილში გაზრდილია გრანტები. კერძოდ: საქართველოს მთავრობის 2017 წლის 24 მარტის განკარგულებით, მავნებელ აზიური ფაროსანას წინააღმდეგ გასატარებელი ღონისძიებების ფარგლებში, ოზურგეთის მუნიციპალიტეტს თანხა გამოეყო.
_ ოზურგეთის მუნიციპალიტეტს მავნებელი მწერის, აზიური ფაროსანას წინააღმდეგ ღონისძიების გასატარებლად, გამოეყო გრანტი 823 716 ლარის ოდენობით. მხოლოდ ამ თანხით გაიზრდება ჩვენი ბიუჯეტი, დანარჩენი კი შიდა გადაადგილებებია, _ თქვა მამაკაიშვილმა.
დადგენილებაში ცვლილების შეტანას ყველა დეპუტატმა დაუჭირა მხარი.
საკითხის _ ოზურგეთის მუნიციპალიტეტში იმ დასახლებული ტერიტორიების განსაზღვრის შესახებ, სადაც ვრცელდება საქართველოს კანონის”ნარჩენების მართვის კოდექსის” 33-ე მუხლის პირველი ნაწილით გათვალისწინებული პასუხისმგებლობა”, ოზურგეთის მუნიციპალიტეტის საკრებულოს დადგენილების მისაღებად, საჯარო ადმინისტრაციული წარმოების დაწყების თაობაზე, მუნიციპალიტეტის გამგებლის მოადგილემ არჩილ ყაზაიშვილმა ისაუბრა. მან თქვა, რომ პრევენციული ხასიათის ღონისძიების გატარებისთვის იბრძვიან და არა დაჯარიმებისთვის.
დეპუტატმა ეროდი გორდელაძემ გამოთქვა საკუთარი მოსაზრება მოქალაქეთა პასუხისმგებლობის შესახებ.
_ უპასუხისმგებლობა ჩანს, არღვევენ ღობეებს, სკოლაა თუ სტადიონი და ეზოში უშვებენ პირუტყვს. ეს ყოვლად დაუშვებელია. არავის დაჯარიმებას არ ვითხოვ, მაგრამ უნდა არსებობდეს მექანიზმი, რაც ამას ხელს შეუშლის, _ თქვა გორდელაძემ.
ანალოგიური მოსაზრება გამოთქვა სოფელ ცხემლისხიდის საჯარო სკოლის დირექტორმა, ამავე სოფლის მაჟორიტარმა საკრებულოში, ლალი სიჭინავამ:
_ სოფელში რომ შემოხვალ, იქ არის ადმინისტრაციული შენობა, სკოლა. როგორი სანახავია, როცა შენობის ეზოში პირუტყვი დადის? როცა შიგ უშვებენ, რით გაუწევ წინააღმდეგობას, თუ მექანიზმი არ გვექნა? ეს არ არის უმნიშვნელო საკითხი. მიჩვეული არიან, თითქოს, ეს ჩვეულებრივი ამბავი იყოს. ვის მოეწონება, როცა სკოლის თუ ადმინისტრაციული შენობების ეზოში საქონელი დადის? _ თქვა მან.
დეპუტატებმა მხარი დაუჭირეს აღნიშნულ საკითხზე საჯარო ადმინისტრაციული წარმოების დაწყებას.
არჩილ ყაზაიშვილმა ააიპ “ოზურგეთის მუნიციპალიტეტის მომსახურების ცენტრში” ადმინისტრაციულ სამართალდარღვევათა საქმის წარმოებისთვის დოკუმენტების ტიპიური ფორმებისა და მათი აღრიცხვა-ანგარიშგების წესის დამტკიცების შესახებ”, საკრებულოს დადგენილების მისაღებად საჯარო ადმინისტრაციული წარმოების დაწყების თაობაზე ისაუბრა.
მისი თქმით, 2016 წელს მოსაკრებლის ამოღების ხვედრითი წილი ცოტა იყო. ახლა ღონისძიება პრევენციის მიზნით ტარდება და არა დასაჯარიმებლად: “ვეცდებით, გაიზარდოს წილი. ეს ორგანიზაცია სუბსიდიაზეა დამოკიდებული და ამიტომ, ამოღების წილის გაზრდა კარგი იქნება”, _ აღნიშნა ყაზაიშვილმა.
ყაზაიშვილმა ისაუბრა “ოზურგეთის მუნიციპალიტეტში გარევაჭრობის რეგულირების შესახებ”, საკრებულოს დადგენილებით საჯარო ადმინისტრაციული წარმოების დაწყების თაობაზეც:
_ გარევაჭრობის მოწესრიგება არის აუცილებელი, რადგან სარეკრეაციო ტერიტორიაზე გახორციელებული და გასახორციელებელი პროექტების შედეგად, მთავარი შემოსავლების შემომტანი არის ჩვენი სარეკრეაციო ტერიტორია. პრობლემის მოგვარების წინაპირობა, ესკიზების შესაბამისად, შენობების მოწესრიგებაა, რომელიც აჭრელებული არ იქნება. ხუთ ივლისამდე, იმედია, წარმოადგენენ შენიშვნებს.
საკრებულოს თავმჯდომარემ დავით დარჩიამ იმედი გამოთქვა, რომ ამ საკითხის განხილვაში საზოგადოება აქტიურ მონაწილეობას მიიღებს.
იურიდიულ საკითხთა კომისიის თავმჯდომარემ, ეროდი გორდელაძემ წარმოადგინა საკითხი: “სსიპ ოზურგეთის მუნიციპალიტეტის სოფელ კონჭკათის საჯარო სკოლისთვის კურსდამთავრებულის იური სიორიძის სახელის მინიჭების შესახებ”, ამავე საჯარო სკოლის სამეურვეო საბჭოს მიერ წარმოდგენილი ინიციატივის განხილვის შესახებ.
მან გაიხსენა კრიმინალურ სამყაროსთან ბრძოლაში დაღუპული პოლიციელი და განმარტა ისიც, რომ კონჭკათის საჯარო სკოლას, დიდი ხნის წინ მიენიჭა იური სიორიძის სახელი. შემდეგ, როცა საჯარო სკოლის სტატუსი დამკვიდრდა, არ მოიხსენიებოდა ამ წოდებით და ახლა სკოლის სამეურვეო საბჭომ საკითხი განსახილველად ამიტომაც წარმოადგინა.
ეროდი გორდელაძის მიერ წარმოდგენილ საკითხს საკრებულომ მხარი დაუჭირა. საბოლოო გადაწყვეტილებას კი განათლებისა და მეცნიერების სამინისტრო მიიღებს.
