ოზურგეთის მუნიციპალიტეტის სოფელ მელექედურის მოსახლეობა კიდევ ერთხელ შეიკრიბა და სოფელში, ცენტრალურ გზაზე, მძიმეწონიანი ავტომანქანების გადაადგილება გააპროტესტა. მათ ჩაკეტეს გზა, საიდანაც ინერტული მასალით დატვირთული მძიმეწონიანი მანქანები ცენტრალურ გზაზე უნდა გასულიყვნენ. აქცია 4 საათის განმავლობაში გაგრძელდა. მოქალაქეები: მარეხი ბერაძე, ჯონი რუსიძე, მაყვალა ცხომელიძე, ნაზიკო შათირიშვილი, ქეთინო გიორგაძე, ლამარა ცხომელიძე, ვარდო ხინთიბიძე, მალხაზ ღლონტი, მაყვალა ღლონტი “გურია ნიუსთან“ გულისტკივილს გამოხატავდნენ. მათი თქმით, არ დაიშლებოდნენ მანამ და არ გაატარებდნენ მანქანებს, სანამ არ მიიღებდნენ ოფიციალურ პასუხს და პირობას, რომ მეორე დღეს აღნიშნული ავტომანქანები სოფელში აღარ გაივლიდნენ, წინააღმდეგ შემთხვევაში, ხელისუფლების წინააღმდეგ სხვა ზომებს მიმართავენ.
5-კილომეტრიან გზაზე ასფალტის საფარი ბოლო ორი წელია, რაც დაიგო, ის მელექედურის მოსახლეობას ქალაქ ოზურგეთთან, ასევე, სოფელ დვაბზუსა და კიდევ რამდენიმე სოფელთან აკავშირებს. აქ მცხოვრებლების თქმით, ცენტრალური გზა კარიერის გამო უკვე დაზიანდა, დაიბზარა, რამდენიმე ადგილას ჩაშვავდა, ასევე, საფრთხე ექმნება საცხოვრებელ სახლებს. აქ შეკრებილები ამბობდნენ, რომ 50-ტონიანი მანქანები ისეთი სიჩქარით მოძრაობენ, რომ ადვილი შესაძლებელია, ავტოსაგზაო შემთხვევაც მოხდეს.
“არ ვიცით, ვისია ეს კარიერი. ამბობენ, ისეთი მაფიაა ჩართული, თვითონ ადგილობრივი ხელისუფლებაც ვერ ჩაუჯდა წილშიო. 40 წელია ისეთ გზაზე დავდიოდით, გვერდები ჩალეწილი გვქონდა. ძლივს გვეღირსა და ახლა გვისპობენ? რატომ უფუჭებენ მოსახლეობას ძლივს დაგებულ ასფალტს, რატომ? როცა მძიმეწონიანი მანქანები დადიან, იცით, როგორ ძაგძაგებს სახლები? მერე არ ერიდებიან, მომატებული სიჩქარით, გადაჭარბებული წონით, ასეთ მჭიდრო დასახლებაში? ვიღაცა თავისი კეთილდღეობისთვის იკეთებს საქმეს და აქ მოსახლეობას უფუჭებს გზას, სხვას რა ენაღვლება? დაბზარულია უკვე გზა, აწი წყალი ჩადგება და დამთავრდა! 21-ე საუკუნეა და ამასთან ერთად არც წყალი გვაქვს და არც გაზი. შუქი ყოველ დღე ითიშება, პასუხის გამცემი არავინ არის, უპატრონოდ ვართ, ფეხებზე ხომ ჰკიდიათ, ჩვენც მასე გადავუხდით ამ არჩევნებზე“, _ ამბობდნენ აქციის მონაწილეები.
მოსახლეობასთან შესახვედრად რამდენიმე საათის განმავლობაში ადგილობრივი ხელისუფლების წარმომადგენლები არ გამოჩენილან. ისინი კი დაშლას არ აპირებდნენ. ბოლოს მოვიდნენ სოფლის დეპუტატი ლევან კილაძე და გამგებლის მოადგილე ბადრი გობრონიძე.
სოფლის მაჟორიტარი დეპუტატი ლევან კილაძე ჟურნალისტის კითხვებმა გააღიზიანა და აგრესიულობა ვერ დამალა: „თქვენზე უფრო მტკივა გული მე, მოსახლეობას გაზი რომ უნდა და წყალი, ვიცი. ნუ ინტრიგნობთ, ნუ მუხტავთ აქციას! ჩემს თავს ვერ შეაძულებთ ამ სოფელს, აქ გაზრდილი ვარ მე, თქვენ ნუ წამოწევთ კითხვებს, მხოლოდ გააშუქეთ მოსახლეობის აზრი, ნუ სვამთ კითხვებს, შორიდან გადაიღეთ და ისე დააფიქსირეთ“, _ მოგვმართა დეპუტატმა და მოსახლეობას სთხოვდა, რომ მანქანები გაეტარებინათ, რაზედაც იქ შეკრებილები უარს ეუბნებოდნენ და კარიერზე პასუხისმგებელ პირს ელოდებოდნენ.
„დეპუტატი რომ ხარ, გამოცოცხლდი და გადაწყვიტე პრობლემები, არ გავუშვებთ ამ მანქანებს, თქვენ დაიცავით ჩვენი ინტერესები, ვალდებულება გაქვთ“.
მაყვალა ცხომელიძე: “არც გაზი გვაქვს, წლებია მოყვანილია სოფლის ცენტრში და ეს ადგილი დატოვეს. ალბათ, სოფლის დაცლა უნდათ მოსახლეობისგან. აბა, რას უნდა ნიშნავდეს ეს?! რომელი საუკუნეა, ამ ცენტრალურ დასახლებაში, გაზი არ უნდა იყოს? ყურადღებას არავინ გვაქცევს. 40 წელია გზა არ გაკეთებულა, გააკეთეს და ახლა ძალით ანადგურებენ. ისიც არჩევნები იყო, თორემ ვინ რას გააკეთებდა. არც წყალი გვაქვს, შუქი არ გვაქვს, ითიშება ძალიან ხშირად. მიცვალებული გვყავდა და გუშინ ტანსაცმელი ვერ ჩავაცვით უშუქობის გამო. ახალგაზრდა კაცი იყო გარდაცვლილი, არავინაა ამბის მკითხველი. ამ კარიერების გამო ჭებში წყალი დაშრა. არავინაა ჩვენი პატრონი. მაგათ არც ხმას ვაღირსებთ! ჩემი ყანა სულ წაღებულია, თურმე უნდა გავჩერდეთ, ენა არ ამოვიღოთ. ერთ ტრაქტორ ხრეშს აძლევენ, რომ გარდაიცვლება ოჯახში ვინმე. არ გვინდა სიკვდილი, კაცო! არ სამსახურია ჩვენთვის ჩვეულებრივი ადამიანისთვის, არავინ არაფრად რომ არ გვთვლის!“
მარეხი ბერაძე: “ბავშვებს სკოლაში ვერ გაუშვებ, ასეთ პატარა გზაზე პირველკლასელმა ბავშვი თხრილებში რომ გადავარდეს, ვინ არის პასუხისმგებელი? გადაკეტილი გვაქვს სასიცოცხლო ყველაფერი, გაიხედავ იქეთ თხრილია, აქეთ _ თხრილი“.
როგორც “გურია ნიუსმა“ გაარკვია, აღნიშნული კარიერი, ეკუთვნის შპს “გურია რესურს ჯგუფს“. დირექტორი გია დუმბაძე მოსახლეობას შეხვდა და პირობა მისცა, რომ არსებულ პრობლემას მოსახლეობასთან და ხელისუფლებასთან ერთად გადაჭრიდა. ამ პირობით დაიშალნენ შეკრებილებიც.
