რა პრეტენზიები აქვს ქალბატონს, რომელსაც სახლი ივანიშვილის დავალებით გადაუხურეს

ლანჩხუთის მუნიციპალიტეტის, სოფელ წყალწმინდაში მცხოვრები სვეტლანა იმნაძე „გურია ნიუსს“  დაუკავშირდა და იმ პრობლემის გასაჯაროება სთხოვა, რომელიც მის ოჯახს აწუხებს. მისი თქმით,  მიმდინარე წლის გაზაფხულზე, უშუალოდ ბიძინა ივანიშვილი დავალებით, საცხოვრებელი სახლი, სადაც წლების განმავლობაში წყალი ჩამოდიოდა,  გადაუხურეს. თუმცა, ამბობს, რომ ეს არასაკმაისია საიმისოდ, რომ ოჯახმა ამ სახლში ცხოვრება შეძლოს.

„პირადად შევხვდი ბიძინა ივანიშვილს და დახმარება ვთხოვე. პირობა მომცა, რომ დამეხმარებოდა, რაც მალევე შეასრულა კიდეც. სახლიც გადამიხურა, თან ძალიან კარგად და აფხაზეთში დაღუპული ძმის საფლავიც გამიკეთა. მადლობის მეტი რა მეთქმის მისი მისამართით, მაგრამ ჩემი პრობლემა ამით არ ამოწურულა“, _ ამბობს სვეტლანა იმნაძე, რომელიც პრეტენზიებს ავთანდილ რობაქიძის მისამართით გამოთქვამს, რომელსაც დავალებული ჰქონდა ადგილზე სამუშაოების წარმოება.

„იმ პიროვნებამ, ავთო რობაქიძემ, საქმე ბოლომდე არ მიიყვანა.  წლები სახლში, დამპალი სახურავიდან,  წყალი ჩამოდიოდა, რის გამოც ყველაფერი: ავეჯი, იატაკი, ჭერი  დალპა. ახლა სახლი კი გადახურეს, ერთი ოთახიც არ არის, სადაც ცხოვრებას შეძლებს ადამიანი. ვთხოვე ერთი ოთახი მაინც გამიკეთეთ, რომ იქ ცხოვრება შევძლო-მეთქი, მაგრამ არა, ცივი უარი მივიღე მისგან. კიდევ მინდოდა ივანიშვილთან შეხვედრა, მაგრამ ამ პიროვნებამ არ მიმიშვა“, _  პრეტენზიებს გამოთქვამს სვეტლანა იმნაძე.

„გურია ნიუსი“ კომენტარისთვის თავად ავთანდილ რობაქიძეს დაუკავშირდა, რომელმაც კატეგორიულად უარყო მისი მისამართით იმნაძის მხრიდან გაჟღერებული ბრალდება.

„ავთანდილ რობაქიძეს არავინ ეკითხება ბიძინა ივანიშვილთან მიშვება-არ მიშვებას, ამაზე საუბარიც არ შეიძლება.

რაც შეხება იმას, თითქოს საქმე ბოლომდე არ მივიყვანე, აბსურდია, გავაკეთე ყველაფერი, რაც დავალებული მქონდა.

ზოგადად, ცუდია უმადურობა. ეს ქალბატონი, პირიქით, ძალიან დიდი მადლობას უნდა ამბობდეს იმისთვის, რაც გაკეთდა მის ოჯახში. სახლი თავიდან ბოლომდე გადაიხურა, გამაგრებითი სამუშაოებიც ჩაუტარდა და  ბევრი სხვა რამეც, ახლა ოთახი რატომ არ გამირემონტესო, ამაზე საუბარი სირცხვილია“, _ გვპასუხობს ავთანდილ რობაქიძე.