“სხვადასხვა მედიასაშუალებებით გავრცელებული ინფორმაცია, რომ “გურიის რწმუნებულის აპარატი მოლაპარაკებების პროცესში კომპანია “ორბთან” და სხვა ნებისმიერ ინვესტორთან ჩართული არ არის” სიმართლეს არ შეესაბამება, _ აღნიშნულია განცხადებაშ, რომელიც სახელმწიფო რწმუნებულმა გურიაში ზურაბ ნასარაიამ რამდენიმე წუთის წინ გაავრცელა.
ნასარაია “მამლის ყივილამდე” ამტკიცებს, რომ “აღნიშნული უძრავი ქონების განკარგვამდე, ლანჩხუთის, ოზურგეთისა და ჩოხატაურის სახელმწიფო რწმუნებულის აპარატს სააგენტოსგან ეცნობა კურორტ ბახმაროში, ტურისტული ინფრასტრუქტურის მოწყობის მიზნით, მათ შორის სასტუმროების, კვების ობიექტების, სპორტული მოედნების და სხვა კურორტის განვითარებისთვის საჭირო ობიექტების მოსაწყობად, სახელმწიფოს საკუთრებაში არსებული მიწის ნაკვეთბის საპრივატიზებოდ მომზადების შესახებ”.
“სასიხარულოა, რომ აღნიშნული კომპანია ბახმაროში 50 მილიონის ინვესტიციას განახორციელებს, რაც ტურიზმის განვითარებას შეუწყობს ხელს.
მივესალმებით „ორბი ჯგუფის“ სურვილს, ბახმაროში თანამედროვე სტანდარტების, უმაღლესი ხარისხის მრავალფუნქციური კომპლექსი ააშენოს. სახელმწიფოს და აღნიშნული კომპანიის მიზანია, ბახმარო 4-სეზონიან კურორტად გადაიქცეს. შეიქმნას თანამედროვე, მაღალი ხარისხის ინფრასტრუქტურა, რაც საშუალებას მოგვცემს, ტურისტები მსოფლიოს სხვადასხვა ქვეყნიდან მოვიზიდოთ. ამასთან, აღსანიშნავია, რომ ბახმაროს ნებისმიერი მშენებლობა ხორციელდება მთავრობის განკარგულებით დამტკიცებული სარეკრეაციო ტერიტორიის ქალაქთმშენებლობითი დოკუმენტაციის ფარგლებში, რომლითაც ბახმაროში მაღალსართულიანი საცხოვრებელი ბინების მშენებლობა აკრძალულია.
მოხარულები ვართ, რომ ამდრომდე მსგავსი მასშტაბის პროექტი ბახმაროში არ განხორციელებულა და ეს არის პირველი პრეცედენტი“, _ წერია ნასარაიას განცხადებაში.
არადა, გასულ კვირას ტელეკომპანია “რუსთავის 2” -ისთვის მიცემულ ინეტრვიუში სახელმწიფო რწმუნებული, ჟურნალისტის კითხვაზე, რითი მოხიბლა “ორბის” წინადადებამ ასე პასუხობს: “მე არ მოვუხიბლივარ არც ერთ და არც მეორეს. უბრალოდ, ჩვენ ჩართული ამ პროცესში არ ვიყავით”.
ამ ყველაფრის ფონზე კი, ნასარაიას დღევანდელი განცხადება ერთ ძველ, ქართულ ანდაზას ესადაგება _ “ფიცი მწამს, ბოლო მაკვირვებს” და ამყარებს გავრცელებულ ინფორმაციას იმის თაობაზე, რომ “რუსთავი 2′-ისთვის მიცემული იმტერვიუს გამო, სახელმწიფო რწმუნებლს ზევით “ყური აუწიეს”.
შეგახსენებთ, რომ საქართველოს მთავრობის #1098 განკარგულების თანახმად, შპს „ორბი ჯგუფ ბახმაროს“ პირდაპირი მიყიდვის ფორმით, დაბა ბახმაროში, გურიის ქუჩაზე, სახელმწიფო საკუთრებაში არსებული 43,269 კვ.მ არასასოფლო-სამეურნეო დანიშნულების მიწის ნაკვეთი და მათზე განთავსებული შენობა-ნაგებობები 1 ლარად მიჰყიდა.
როგორც მოგვინებით გაირკვა და ზურაბ ნასარაიამ ინტერვიუშიც დაადასტურა, ამის შესახებ მხარის ხელისუფლება საქმის კურსში არ იმყოფებოდა. ინფორმაციას “ორბისთვის” გადაცემული მიწის თაობაზე არც ჩოხატაურის მუნიციპალიტეტში ფლობდნენ.
ამავე თემაზე: 43,269 კვ.მ მიწა 1 ლარად და “ორბი ჯგუფის” გეგმები ბახმაროში
