ის, რომ 2019 წელს ლანჩხუთის მესამე საჯარო სკოლაში სრული სარეაბილიტაციო სამუშაოები გახორციელდებოდა, ჯერ კიდევ 2018 წელს, საპრეზიდენტო არჩევნების მეორე ტურის წინ დაანონსდა მერიის ოფიციალურ ფეისბუქგვერდზე. მერიის მიერ მაშინ გავრცელებულ ინფორმაციაში, რომელსაც თან ფოტომასალაც ერთვის და 2018 წლის 21 ნოემბრითაა დათარიღებული, ვკითხულობთ, რომ სსიპ საგანმანათლებლო და სამეცნიერო ინფრასტრუქტურის განვითარების სააგენტოს უფროსი ზვიად როსტომაშვილი, საქართველოს პარლამენტის მაჟორიტარი დეპუტატი ლანჩხუთსა და ჩოხატაურში ნინო წილოსანი და მუნიციპალიტეტის მერი ალექსანდრე სარიშვილი მესამე საჯარო სკოლაში იმყოფებოდნენ.
მერიის ფეისბუქგვერდზე გავრცელებულ ინფორმაციაში იქვე პარლამენტის ლანჩხუთელი მაჟორიტარის განცხადებაცაა დაფიქსირებული, სადაც დეპუტატი მთავრობის გადაწყვეტილებას აანონსებს.
“სულ ცოტა ხნის წინ ვიყავი ამ სკოლაში. ფაქტია, შენობის ორივე კორპუსი საჭიროებს სარემონტო სამუშაოებს. მთავრობის გადაწყვეტილებით, 2019 წელს მესამე საჯარო სკოლას სრული რეაბილიტაცია ჩაუტარდება”, _ ვკითხულობთ ნინო წილოსანის მიერ საპრეზიდენტო არჩევნების მეორე ტურის წინ გაკეთებულ ამ განცხადებაში.
იქვე მუნიციპალიტეტის პირველი პირის, ალექსანდრე სარიშვილის პოზიციაცაა დაფიქსირებული, რომელიც მადლობას სწირავს დეპუტატს ამ საშური საქმისთვის.
“ჩვენთვის მნიშვნელოვანია მოსწავლეები როგორ პირობებში ისწავლიან. მოხარული ვარ, რომ ქალბატონი ნინოს უშუალო დახმარებითა და ხელშეწყობით გადაწყდა ამ სკოლის რეაბილიტაცია”, _ ამბობდა მაშინ სარიშვილი.
დიდი იყო მოლოდინი, რომ დეპუტატის მიერ დაანონსებული მთავრობის გადაწყვეტილება აღსრულდებოდა და 2019-20 წლების სასწავლო პროცესს მესამე საჯარო სკოლის მოსწავლეები და მასწავლებლები რეაბილიტირებულ საკლასო ოთახებში დაიწყებდნენ.
სხვათა შორის, მიმდინარე წელს ამ სკოლაში რომ ინფრასტრუქტურული სამუშაოები გახორციელება იგეგმებოდა, ამის თაობაზე ამავე სკოლის მასწავლებლების მხრიდან მშობლებიც იყვნენ ინფორმირებულები. თავიდან ითქვა, რომ სარეაბილიტაციო სამუშაოები აქ 2019 წლის გაზაფხულიდან დაიწყებოდა და სასწავლო პროცესის გაგრძელება სხვა სკოლის შენობაში მოუწევდათ. მოგვიანებით თქვეს, რომ სამუშაოები საზაფხულო არდადეგების პერიოდში გახორციელდებოდა. თუმცა, ფაქტია, რომ ყველა ეს ვადა ამოიწურა და მესამე საჯარო სკოლაში ახალი სასწავლო პროცესი ისევ ძველ გარემოში იწყება.
იმის გასარკვევად, თუ რა ბედი ეწია მთავრობის იმ გადაწყვეტილებას, რომელიც მესამე საჯარო სკოლაში სრული სარეაბილიტაციო სამუშაოების გახორციელებას ითვალისწინებდა, “გურია ნიუსი” კომენტარისთვის სკოლის დირექტორს მაია ჯიმშელეიშვილს დაუკავშირდა. ჯიმშელეიშვილის თქმით, პირველ ეტაპზე ჩატარდა საექსპერტო გამოკვლევა და სამუშაოების დაწყების ვადების გადაწევა სწორედ ექსპერტიზამ გამოიწვია, ამ ეტაპზე პროექტზე მიმდინარეობს მუშაობა.
აღნიშნულ საკითხთან დაკავშირებით, ფაქტობრივად, იგივე განმარტება გააკეთეს ლანჩხუთის მერიაშიც. მერიის პრესასთან ურთიერთობის განყოფილების ხელმძღვანელის, მაკა სულაბერიძის თქმით, მიმდინარეობს, როგორც ქალაქის მესამე საჯარო სკოლის, ასევე, ლესის საჯარო სკოლის საპროექტო სამუშაოები.
