დონალდ ტრამპმა, კორონავირუსის გავრცელებასთან დაკავშირებით, აშშ-ში ევროპის ქვეყნებიდან ფრენებზე შეზღუდვები დააწესა. ამის შესახებ ინფორმაციას BBC წერს.
როგორც, დონალდ ტრამპმა, სატელევიზიო მიმართვისას განაცხადა შენგენის ზონის სახელმწიფოებიდან ყველა მოგზაურობა 30 დღით შეჩერდება, მკაცრი ზომები კი პარასკევიდან ამოქმედდება.
აშშ-ს პრეზიდენტის თქმით, შეზღუდვა არ შეეხება გაერთიანებულ სამეფოს, სადაც კორონავირუსის 460 შემთხვევაა დაფიქსირებული.
„იმისთვის, რომ ჩვენი ნაპირები ახალი შემთხვევების შემოსვლისგან დავიცვათ, ევროპიდან ყველანაირ მოგზაურობას შევაჩერებთ. ახალი წესები პარასკევს, შუაღამეს ამოქმედდება“, – განაცხადა ტრამპმა.
CNN-მა კი იმ ევროპული ქვეყნების სია გამოაქვეყნა, რომელზეც აშშ-მა შეზღუდვები დააწესა.
შეზღუდვები შენგენის ზონის შემდეგ ქვეყნებს ეხება: ავსტრია, ბელგია, ჩეხეთი, დანია, ესტონეთი, ფინეთი, საფრანგეთი, გერმანია, საბერძნეთი, უნგრეთი, ისლანდია, ლატვია, იტალია, ლიხტენშტეინი, ლიეტუვა, ლუქსემბურგი, მალტა, ნიდერლანდები, ნორვეგია, პოლონეთი, პორტუგალია, სლოვაკეთი, სლოვენია, ესპანეთი, შვედეთი და შვეიცარია.
დონალდ ტრამპის განმარტებით, მისთვის ყველაზე მნიშვნელოვანი ამერიკის კეთილდღეობაა.
„ჩვენ ვირუსთან ბრძოლის კრიტიკულ პერიოდში ვართ. სასიცოცხლოდ მნიშვნელოვანი ნაბიჯები გადავდგით ჩინეთთან მიმართებაში. ახლა ასე უნდა მოვიქცეთ ევროპასთან. ამას არ გადავდებთ. არადროს შევყოვნდები მივიღო უმნიშვნელოვანესი გადაწყვეტილებები, რომ ამერიკელების სიცოცხლე, ჯანმრთელობა და უსაფრთხოება დავიცვა. ჩემთვის უპირველესი ამერიკის კეთილდღეობაა“, _აღნიშნა დონალდ ტრამპმა.
მისივე თქმით, ამერიკა ამ ბრძოლიდან უფრო ერთიანი და ძლიერი გამოვა.
„თანაგრძნობითა და სიყვარულით ჩვენ დავეხმარებით მათ, ვინც ავად არის, მოვუვლით, ვისაც ეს სჭირდება, ჩვენ ჩვენს მოქალაქეებს დავეხმარებით და ამ ბრძოლიდან უფრო ძლიერი და ერთიანი გამოვალთ, ვიდრე ოდესმე“, _ განაცხადა ტრამპმა.
აშშ-ში კორონავირუსით 38 ადამიანი გარდაიცვალა, დადასტურებულია ინფექციის 1 135 შემთხვევა.
