აჭარის მთავრობის შენობასთან საარჩევნო ოქმები გამოფინეს

აჭარის მთავრობის შენობის წინ, იქ სადაც რამდენიმე დღეა საპროტესტო აქციები მიმდინარეობს, დღეს, 13 ნოემბერს, პოლიციასა და აქციის მონაწილეებს შორის სიტყვიერი დაპირისპირება და ფიზიკური შეხლა-შემოხლა იყო.

აქციის მონაწილეების განცხადებით, მათ პოლიცია აჭარის მთავრობის სახლის წინ, ხეებს შორის თოკის გაბმის საშუალებას არ აძლევდა, სადაც მათ იმ ოქმების ჩამოკიდება სურდათ, რომლებით, მათივე თქმით, გაყალბებულია.

„ათეულობით ოქმი მოვიტანეთ. აჭარის უმაღლესი საბჭოს არჩევნების ოქმებია ძირითადად აქ წარმოდგენილი, ციხეზე დაიკარგა 45 ბიულეტენი, ასევე არის მეორე უბანი, სადაც 400 ბიულეტენი გაატანეს და აქაც 45 ბიულეტენი დაკარგულია.  ეს არის ოქმები, სადაც ნათლად ჩანს, სად რამდენი ხმა არის მოპარული „ქართული ოცნების“ მიერ“- ამბობს გიორგი კირთაძე, „ნაციონალური მოძრაობის“ აჭარის ორგანიზაციის ხელმძღვანელი, რომელიც ამ დროისთვის აქციაზე იმყოფება.

აჭარის მთავრობის სახლის წინ ოპოზიცია კვირას ფართომასშტაბიან აქციას გეგმავს. თუმცა, მოქალაქეების ის ნაწილი, რომლებიც მიიჩნევენ, რომ საპარლამენტო არჩევნები გაყალბდა, არჩევნების შედეგების გამოქვეყნების დღიდან მართავენ აქციებს მთავრობის ადმინისტრაციული შენობის წინ. აქ აქციის მონაწილეები ღამითაც რჩებიან.

წყარო: “ბათუმელები”