სოფელ ბუკნარში შექმნილი სიტუაცია განმუხტულია. მუსლიმურ თემსა და ადგილობრივი ხელისუფლების წარმომადგენლებს შორის გამართული დიალოგის შედეგად გადაწყდა, რომ სამლოცველო იმ ტერიტორიაზე დარჩება, სადაც ამ დრომდე იყო.
ჩოხატაურის მერმა ირაკლი კუჭავამ შეხვედრის დასრულების შემდეგ განაცხადა, რომ შეთანხმება შედგა და სოფელ ბუკნარის მცხოვრებები ჩვეულებრივად გააგრძელებენ ცხოვრებას და ლოცვას.
“შედგა საკმაოდ ხანგრძლივი, მაგრამ კონსტრუქციული, ურთიერთდათმობის, ურთიერთგაგების ფონზე. ეს შეხვედრები გაგრძელდება, მაგრამ ახლა პირობითად ორივე მხარე, ერთი სოფლის მცხოვრებლები შეთანხმდნენ, რომ ისინი ჩვეულებრივად გააგრძელებენ ფუნქციონირებას და ლოცვას. არც არავის ხელი არ შეეშლება, ეს არის სეკულარული სახელმწიფო. ეს არის ადამიანის უფლებების დაცვის სახელმწიფო, ამიტომ თანასოფლელები ყოველგვარი ჩარევის გარეშე თანაცხოვრებას გააგრძელებენ და ამას მიეძღვნა ეს კონსტრუქციული შეხვედრა”, – თქვა კუჭავამ.
ბუკნარის მკვიდრი, მუსლიმი თემის წარმომადგენელი ბესიკ პაიჭაძე მედიასთან საუბრისას ასევე ამბობს, რომ შეთანხმება შედგა.
„რა თქმა უნდა, შეთანხმება შედგა. ჩვენ ძმურად ვცხოვრობდით და ასე გავაგრძელებთ, მერთან ერთად ხუთ-ხუთი კაცი ჩამოვივლით მთელ სოფელს და შევარიგებთ, ამის პრობლემა არ იქნება. რა თქმა უნდა, სამლოცველო იქნება. არ ყოფილა აქ საუბარი მეჩეთის გაფართოებაზე, არც მშენებლობაზე, ჩვენ გვყოფნის ის, რაც გვაქვს. გვინდა გარემონტება და გავარემონტებთ“,– ამბობს ბესიკ პაიჭაძე.
მუსლიმი თემის წარმომადგენლების ნაწილის თქმით კი, ეს საკითხი მხოლოდ სოფელ ბუკნარით არ შემოიფარგლება და მუსლიმ თემს პრობლემები აქვს მთელი საქართველოს მასშტაბით.
