გუშინ, 25 თებერვალს, ჩოხატაურის მუნიციპალიტეტის სოფელ ახალშენში სოფლის კრება გაიმართა. ადგილობრივი მოსახლეობა მერის წარმომადგენელს ზურა მათითაიშვილს პრობლემებზე სასაუბროდ შეხვდა.
როგორც მერის წარმომადგენელმა აღნიშნა, ახალშენში პრობლემების მოსაგვარებლად ბიუჯეტიდან წელს 12 000 ლარია გამოყოფილი, შესაბამისად, სოფლის მაცხოვრებლებმა უნდა მიიღონ გადაწყვეტილება, თუ რის გაკეთება ურჩევნიათ აღნიშნული თანხით.
„ჩემი ინიციატივა იყო შეგხვედროდით და ჩამოვყალიბებულიყავით, რა მოთხოვნა წაგვეყენებინა მერთან. განვიხილოთ, რა გვაწუხებს და საერთო გადაწყვეტილებით ჩამოვყალიბდეთ“, _ თქვა მერის წარმომადგენელმა ხიდისთავის თემში.
როგორც ცნობილია, ძირითადი შეხვედრა, რომელსაც მერიც დაესწრება, 2 მარტს 12 საათსა და 30 წუთზე გაიმართება.
შეხვედრაზე მოსახლეობამ სხვადასხვა პრობლემა წამოჭრა.
ადგილობრივთა ნაწილი _ გარეგანათების გაკეთებას, ნაწილი გზის და წყლის მოწესრიგებას, ნაწილი ეზოს წინ არსებული პრობლემის მოგვარებას, ნაწილი კი, ნაგავშემკრები კონტეინერის დამატებას ითხოვდა.
„ერთი სანაგვე ურნა გვინდა. გახედვა მრცხვენია, ისეთი რამ ხდება. ნაგავს ყრიან. ღელე გასაწმენდია “,_ თქვა ერთ-ერთმა მცხოვრებმა.
ამაზე მათითაიშვილმა უპასუხა, რომ ურნის დამატება დასუფთავების სამსახურზეა დამოკიდებული _ შევა თუ არა აღნიშნულ ტერიტორიაზე ნაგავმზიდი მანქანა.
„შესათანხმებელია, შემოვა თუ არა დასუფთავების სამსახურის მანქანა. რომ შეგპირდე და მანქანა ვერ შემოვიდეს?“ _ უთხრა მერის წარმომადგენელმა.
შეხვედრაზე მყოფთა ნაწილი ამბობდა, რომ უკვე თვეებია, სასმელ წყალს ხიდისთავიდან ეზიდებიან. სოფელში არც სასმელი წყალია და არც _ გზა.
„წყალი არ გვაქვს. ვიტანჯებით ხალხი. სასმელ წყალს ხიდისთავიდან ვეზიდებით. გზა გაფუჭებულია. არ გაივლება ტბები დგას. წყალმა გააფუჭა გზა და აღარც წყალი გვაქვს და აღარც _ გზა“,_ ამბობდნენ ისინი.
ერთ-ერთმა ქალბატონმა კი გაფუჭებულ გზასთან დაკავშირებით ერთი შემთხვევა გაიხსენა:
„გზა რომ არაა, ჩვენი წინა გამგებელი, ბატონი დათო „იამკაში“ ჩავარდა“.
მერის წარმომადგენელს არც ამ ვნებათაღელვის ჩაცხრობა გასჭირვებია.
ზურა მათითაიშვილმა თქვა, რომ წყლის პრობლემის მოსაგვარებლად ამინდის გამოსვლას ელოდებიან.
„წყლის პრობლემა მოგვარდება, როგორც კი ამინდები გამოვა. კომპანიას ვალდებულება აქვს აღებული, ჩამოვლენ და გააკეთებენ. ხვალიდან დარები რომ წავიდეს, ზეგ ჩამოვლენ“,_ უპასუხა მათითაიშვილმა.
შეხვედრაზე მოსახლეობამ აღნიშნა ისიც, რომ ხიდია გასაკეთებელი.
„ხიდზე დიდი მოძრაობაა, გორას და სხვა სოფლებს უკავშირდება და აღარ ვარგა. ჩავარდება ვიღაც და მართლა რაღაც მოხდება. პირველ რიგში, ხიდი ჭირდება სოფელს. ხიდს ჯებირი საერთოდ გამოთხრილი აქვს“,_ ითქვა კრებაზე.
აღსანიშნავია, რომ ხიდის გაკეთება დიდ თანხებთან არის დაკავშირებული. კაპიტალური თემაა და ამ 12 000-ით ხიდი ვერ გაკეთდება,_ ეს პასუხი გაისმა შეხვედრაზე.
აღინიშნა ისიც, რომ სანიაღვრე სისტემაა გასაკეთებელი.
„სანიაღვრე სისტემა უნდა იყოს. ჭიშკრები გადმოაქვთ წინ და გზა შეღობეს“,_ თქვა ერთმა იქ მყოფმა.
სხვამ კი აღნიშნა, რომ სანიაღვრე სისტემა მოსახლეობამ თვითონ უნდა გაიკეთონ.
„ერთ მხარეს არის გაზი, მეორე მხარეს _ წყალი. სად იმუშავებს ტრაქტორი, რომ სანიაღვრე გააკეთოს?! ერთმა მოსახლემ უნდა დაიწყოს არხის გათხრა მისი ჭიშკრის წინ და სხვამ გააგრძელოს. ყველამ თავისი ეზოს წინ უნდა გააკეთოს“,_ თქვა ერთ-ერთმა ქალბატონმა.
შეხვედრაზე მყოფმა ქალბატონმა ლალი შანიძემ განაცხადა, რომ მის ეზოში წყალი ჩადის, რაც საცხოვრებელ სახლს დანგრევის საფრთხეს უქმნის.
„არ მიყვარს სიარული და ნუ მიმიყვანთ მთავრობაში. გვჭირდება არხი, ტრაქტორი და რამე რომ მილი გავიდეს. დამინგრევს წყალი სახლს. ეზოში არ გაივლება. 40 წელია ვცხოვრობ და არაფერი გვითხოვია. გზა ჩვენი ფულით გავიკეთეთ, არავინ ჩარეულა. 4 მოსახლის წყალი ჩამოდის ჩემს ეზოში. მინდა მოგვარდეს, რომ ჩემს ეზოში წყალი აღარ დადგეს!“_ თქვა შანიძემ.
კიდევ ერთმა მოსახლემ განაცხადა, რომ უკვე რამდენიმე წელია, ეზოში ვერ ახერხებს ჩალის და სიმინდის შეტანას და მიმდებარე ტერიტორია მოსაწესრიგებელია. თხოვნით ადგილობრივ ხელისუფლებას ადრეც მიმართა, მაგრამ დაპირების მიღების მიუხედავად, შედეგი ვერ დადგა.
„ეზოში ჩასასვლელი გათხარეს და დამიტოვეს „იამკად“. სიმინდი და ჩალა ვერ მიმაქვს. ნათქვამი მქონდა და არ გამიკეთეს. როგორც გააფუჭეთ ისე გააკეთეთ!“_ ითხოვდა ის.
საბოლოოდ, მერის წარმომადგენელმა თქვა, რომ შეხვედრის მთავარი მიზანი პრიორიტეტის გამოკვეთა და შეჯერება იყო.
„ამ შეხვედრის ძირითადი მიზანია, რომ შევჯერდეთ. მოვა მერი, მოვა დეპუტატი და დაპროექტება მოხდება. ამ 12 000 ლარით ბოლომდე მივიყვანოთ განათებები, მაგას დავთვლით რამდენი ნათურაა, სადაც ბოძებია დასამატებელი დავამატოთ. რაც თანხა დარჩება, იმით სხვა პრობლემას მივხედოთ, _ თქვა მათითაიშვილმა.
