ზღვის დონიდან 2050 მეტრზე მდებარე ბახმარო წელიწადის ნებისმიერ დროს იქცევს დამსვენებლების ყურადღებას უნიკალური ჰავის გამო, თუმცა, საქართველოს მთავრობის ამბიციური განაცხადის მიუხედავად, რომ ბახმარო ოთხი სეზონის კურორტად აქციოს, ჯერჯერობით საკურორტო სეზონი აქ კვლავ, დაახლოებით, 3-4 თვეს გრძელდება.
ზამთრის სეზონისთვის მოუმზადებლობა ნაკლები პრობლემაა, მთავარია, რომ ბახმარო უკანონო მშენებლობების და მიწის ნაკვეთების არნახული სტიქიური მიტაცების გამო, ყოფნა-არყოფნის ზღვარზე დგას. ეს კი ბახმაროს პოტენციალს აკნინებს და მას მომავალს უკლავს.
სანდო და ინფორმირებულ წყაროზე დაყრდნობით, ჩვენ უკვე ვწერდით, რომ ბახმაროში უკანონო მშენებლობის და მიწების მიტაცების საკითხების მოკვლევა ჯერ კიდევ 2019 წელს დაიწყო, ხოლო ცოტა ხნის წინ, პროკურატურამ ამ დანაშაულებებზე რეაგირების დოკუმენტები მერიიდან გაითხოვა. “გურია ნიუსი“ ოფიციალურად გამოთხოვილ დოკუმენტებს და ვრცელ მოკვლევას მალე შემოგთავაზებთ, მანამდე კი წლევანდელი ზამთრის სეზონის პრობლემების შესახებ, ახალ მერს ვესაუბრეთ.
ჩოხატაურის მუნიციპალიტეტის მერი, დავით შარაშიძე, ამბობს რომ ბახმაროში მეტი ტურისტების მოსაზიდად მუშაობს, მაგრამ კონკრეტულად, რის გახორციელებას აპირებს, ჯერჯერობით, კომენტარის გარეშე ტოვებს.
ინფორმაციისთვის, რამდენიმე დღის წინ ბახმაროში გაიმართა შეხვედრა მერსა და ტუროპერატორებს, ასევე, სასტუმროს მფლობელებს შორის. შეხვედრაზე დამსწრე მხარეებმა იმსჯელეს, პრობლემებზე, რაც ხელს უშლის სეზონის აქტიურად წარმართვას.
“15-ამდე ტუროპერატორს და სასტუმროს მფლობელებს შევხვდით. ტუროპერატორებს შევხვდით და განვიხილეთ, რა საჭიროებები აქვთ მათ, რაში სჭირდებათ ხელისუფლების ჩართულობა და ჩვენ რით შეგვიძლია, რომ დავეხმაროთ”,_ ამბობს შარაშიძე.
_ ბატონო დავით, რა პრობლემები გამოიკვეთა შეხვედრაზე?
_ გამოიკვეთა 2 ძირითადი პრობლემა. ერთ-ერთი არის გზის ჩაკეტვის საჭიროება თოვლის დროს, რადგან მსუბუქი ავტომობილები, მაღალი გამავლობის ავტომობილები, რომელსაც საბურავი ცუდ მდგომარეობაში აქვთ, ვერ ახერხებენ უკან დაბრუნებას და შუა გზაზე არიან ჩაკეტილები. ეს პრობლემა რომ არ იყოს, ამიტომ საჭირო იქნება გზის ჩაკეტვა.
დიდთოვლობის დროს შეუძლებელი იქნება ზევით ასვლა. ეს კი იმიტომ კეთდება, მოქალაქეებს საფრთხე არ შეექმნათ. მერია უზრუნველყოფს გზის ჩაკეტვას, ოღონდ, მხოლოდ დიდთოვლობის დროს.
მეორე პრობლემად კი დააყენეს გზის გაწმენდა ე. წ. ლაშემდე. ასე ჰქვია სოფელს, სადაც ახალაშენებული ფაცხებია; მაგ ტერიტორიამდე უნდათ, რომ მუნიციპალიტეტმა უზრუნველყოს გზის გაწმენდითი სამუშაოები.
_ აქამდე არ იწმინდებოდა აღნიშნული ტერიტორია?
_ აქამდეც იწმინდებოდა ეს ტერიტორია, ოღონდ სადამდეც ჰქონდათ მათ მოთხოვნა, იქამდე იწმინდებოდა. ამ შეხვედრაზე კი მოითხოვეს გზის გაწმენდა ლაშემდე და გავწმენდთ.
ეს არის ის ძირითადი 2 საკითხი, რომელიც გამოიკვეთა. ჩვენ ვისაუბრეთ ასევე, სამომავლო გეგმებზეც, რა პროექტებსაც ვფიქრობთ, რომ გავახორციელოთ.
_ რის გახორციელებას აპირებთ ბახმაროში?
_ ამ კითხვას უკომენტაროდ დავტოვებ. როდესაც გახორციელებას დავიწყებთ, შემდეგ ვისაუბროთ.
როდესაც საქმე ბახმაროს განვითარების შესახებ საუბარს ეხება, არ შეიძლება არ შევეხოთ უკანონო მშენებლობების საკითხს. დაბა ბახმაროში უკანონო მშენებლობების საკითხი წლებია, რაც გამოწვევაა.
მიუხედავად იმისა, რომ უკანონოდ ტერიტორიის შემოღობვა ჯარიმას ითვალისწინებს, მოქალაქეების ნაწილი ბახმაროს ტერიტორიის მითვისებას და სახლების აშენებას მაინც ცდილობს.
ჩოხატაურის ახლადარჩეული მერი დავით შარაშიძე ამბობს, რომ მის მიერ გადადგმულმა ნაბიჯმა უკანონო მშენებლობები შეაჩერა.
“როცა დაიწყო ჩემი უფლებამოსილება, 28-29 ოქტომბერს, მეორე დღესვე მე ავირჩიე ბახმარო ნომერ პირველ პრიორიტეტად ჩემს საქმეებში და დავიწყეთ ე,წ. უკანონო “კოლები” რასაც ჰქვია, უკანონო ბოძების დანგრევა, ტრაქტორით. ზედამხედველობის სამსახურთან ერთად ავდიოდით და ვამოწმებდით რომელი იყო კანონიერი, რომელი უკანონო და დავიწყეთ ამ ბოძების დანგრევა”, _ ამბობს შარაშიძე და აღნიშნავს, რომ გადადგმულმა ნაბიჯმა უკანონო სახლების მშენებლობა შეაჩერა.
“ნამდვილად შემიძლია გითხრათ, რომ უკანონო სახლების მშენებლობა ჯერ-ჯერობით შეჩერდა”,_ გვეუბნება მერი.
[sexy_author_bio]
