ხვიჩა კვარაცხელიას „ნაპოლი“ ჩემპიონთა ლიგის მერვედფინალურ სტადიაზეა. ნეაპოლელებმა საკუთარ კედლებში პორტუგალიური „ბრაგა“ დაამარცხეს – 2:0 და რამდენიმე დღეში ჩემპიონთა ლიგის ფლეი ოფის პირველ ეტაპზე მომავალი მეტოქის ვინაობას შეიტყობენ.
„ნაპოლის“ მთავარმა მწვრთნელმა ვალტერ მაძარიმ „ბრაგასთან“ მატჩის შემდეგ შემდეგი განცხადება გააკეთა:
„ჩვენთვის ფუნდამენტურია კვარაცხელიას და ოსიმენის მომატება, ძალიან მნიშვნელოვანია. ზოგადად, დღეს კმაყოფილი ვარ, რადგან პროგრესი დავინახე. გუნდმა დაიწყო კომპაქტურად თამაში და ნაკლები კონტრშეტევა მივიღეთ. ბევრ რაღაცაში პროგრესი დავინახე. დარწმუნებული ვარ, როცა მეტი დრო მექნება გუნდთან სამუშაოდ, უფრო კარგ რაღაცებს გავაკეთებთ“.
ცნობილმა იტალიელმა მწვრთნელმა ფაბიო კაპელომ ნეაპოლურ გუნდზე ისაუბრა:
„კარგი „ნაპოლი“ ვნახეთ, მაგრამ ამ გუნდთან მუშაობა ჯერ კიდევ საჭიროა, რადგან ძალიან ბევრ სახიფათო სიტუაციას იღებენ საკუთარ კართან. მწვრთნელს ამ ასპექტზე ძალიან ყურადღებით მუშაობა მოუწევს. სხვა, უფრო ძლიერ გუნდთან არ ვიცი, როგორ დასრულდებოდა თამაში. „ნაპოლი“ დროდადრო თამაშს აკონტროლებდა, მაგრამ დაცვა მოიკოჭლებდა. შარშან კიმმა დაცვის ხაზს მეტი თავდაჯერება შესძინა, დღეს კი დაცვას რაღაც აკლია“.
„ნაპოლის“ კაპიტანმა ჯოვანი დი ლორენცომ „ბრაგასთან“ მატჩის შემდეგ პერსონალურად ხვიჩა კვარაცხელიაზე ილაპარაკა:
„არავის აქვს მისი გაკრიტიკების უფლება იმიტომ, რასაც აკეთებს და რაც გასულ სეზონში გააკეთა. ხალხი მიმოხილვებით მსჯელობს, მაგრამ თამაშს თუ უყურებთ, დაინახავთ, რომ ჩვენთვის ძალიან მნიშვნელოვან საქმეს აკეთებს. მას უბრალოდ გოლი აკლია, რათა საბოლოოდ განთავისუფლდეს, მაგრამ ის განსაკუთრებული ბიჭი და ფეხბურთელია. არავინ უნდა მისცეს თავს მისი გაკრიტიკების უფლება. გვიხარია, რომ ჩვენი თანაგუნდელია და მასთან ახლოს ვართ“.
„ბრაგასთან“ შეხვედრის შემდეგ იტალიურმა მედიამ ხვიჩა კვარაცხელიას თამაში შეაფასა.
Tuttonapoli 6.5 ქულა – „პირველი მეტოქის მოტყუება პრობლემა არასდროსაა, მაგრამ ზოგჯერ აჭარბებს. ბრწყინვალება ისევ აქვს, როცა მცველს უმიზნებს, შესაბამისად, მას მხოლოდ სიმშვიდის დაბრუნება სჭირდება“.
Tuttomercatoweb 6 ქულა – „იმის ნაცვლად, რომ შემოიფარგლოს იმით, რასაც კარგად აკეთებს, ზოგჯერ აჭარბებს. ის არ არის მშვიდი და ამიტომ, ბურთთან ყოველთვის ერთით მეტ შეხებას აკეთებდა“.
Calciomercato 5.5 ქულა – „იუვესთან“ გადამწყვეტი შეცდომის მიუხედავად ახერხებდა სახიფათოდ თამაშს, რაც დღეს საღამოს ვერ გააკეთა. ჩვეულებრივზე მეტი შეცდომა დაუშვა და აგრძელებდა დრიბლინგებს, რომლებიც არ გამოსდიოდა“.
OaSport 6 ქულა – „ხშირად ცდილობდა გაბრწყინებას თავისი აფეთქებებით, მაგრამ ხშირად ორმაგი მეურვეობის წინააღმდეგ თამაში უწევდა. ჯოჯოხეთურად ცდილობს გოლს გატანა, მაგრამ მეორე ტაიმში მათეუსმა გააჩერა“.
საქართველოს ნაკრებისა და ესპანური „ვალენსიას“ მეკარე გიორგი მამარდაშვილი კი ტურინის „იუვენტუსის“ ინტერესის სფეროში მოექცა.
იტალიური მასმედიის მტკიცებით, ქართველ კარის დარაჯს ტურინული გუნდი სერიოზულად აკვირდება, რადგან ვოიცეხ შჩესნის პოტენციურ შემცვლელთა სიაში ჰყავს. ისინი ხაზს უსვამენ იმ გარემოებასაც, რომ ქართველით ინგლისური კლუბები, „ტოტენჰემი“, „ნიუკასლი“ და „მანჩესტერ იუნაიტედიც“ არიან დაინტერესებული.
გიორგი მამარდაშვილს „ვალენსიასთან“ კონტრაქტი 2027 წლამდე აკავშირებს. ესპანური გუნდი მის სანაცვლოდ დაახლოებით 30 მილიონ ევროს ითხოვს.
ავტორი
