27 მაისს, ოზურგეთში მუნიციპალიტეტის საკრებულოს სხდომა შედგა. დღის წესრიგით გათვალისწინებული თორმეტი საკითხი საკრებულოს წევრებს, ტრადიციულად, თავმჯდომარემ დავით დარჩიამ გააცნო.
მნიშვნელოვანი საკითხი, ოზურგეთის ბიუჯეტის 2026 წლის პირველი კვარტლის ანგარიშის შესახებ, საფინანსო სამსახურის უფროსმა, პავლე ჭყონიამ ისაუბრა და გააკეთა შემოსულობების ანალიზი.
მისი განმარტებით, ოზურგეთის მუნიციპალიტეტის 2026 წლის პირველი კვარტლის ბიუჯეტის შემოსულობებმა, 2025 წლის გარდამავალი ნაშთების გარეშე, შეადგინა 12 050,7 ათასი ლარი, რაც წლიური გეგმის 21,73%-ია.
წლიური დაზუსტებული გეგმა კი არის 55 442,3 ათასი ლარი. 2026 წლის პირველი კვარტლის შემოსავლებიდან, პროცენტულად შესრულება ყველაზე ნაკლებია ქონების გადასახადის კუთხით _1,07%-ით. (წლიური გეგმა 9 700,0 ათასი ლარი, შესრულება 103,4 ათასი ლარი.) . პროცენტულად ყველაზე მეტი შესრულება არის არაფინანსური აქტივების გაყიდვიდან, 81,3 პროცენტით (წლიური გეგმა 550,0 ათასი ლარი, შესრულება 447, 2 ათასი ლარი).
2026 წლის პირველი აპრილის მდგომარეობით, ფინანსური დახმარება ტრანსფერის სახით არის 2 584,0 ათასი ლარი. მათ შორის: სტიქია _23,4 ათასი ლარი. მიზნობრივი ტრანსფერი _ 225,5 ათასი ლარი. მოსწავლეთა ტრანსპორტირება _ 478,2 თასი ლარი. საქართველოს რეგიონებში გასახორციელებელი პროექტების ფონდიდან გამოყოფილი თანხები _ 1 856,9 ათასი ლარი.
როგორც პავლე ჭყონიამ თქვა, ამ წლის ბიუჯეტით, გადასახდელების დაზუსტებულმა გეგმამ, 1 აპრილის მდგომარეობით, შეადგინა 55 442,3 ათასი ლარი. ფაქტიურმა საკასო ხარჯებმა 2026 წლის 1 აპრილამდე შეადგინა 20 068,8 ათასი ლარი, რაც წლიური გეგმის 36,19%-ია. 9 915,6 ათასი ლარი შეადგინა ინფრასტრუქტურის მშენებლობამ, რეაბილიტაციამ და ექსპლუატაციის დაფინანსებამ. საგანმანათლებლო ღონისძიებების დაფინანსებამ შეადგინა 3 612,5 ლარი, რაც წლიური გეგმის 36,4% არის. სოციალური და ჯანდაცვის პროგრამების დაფინანსებამ შეადგინა 754,6 ათასი ლარი, რაც წლიური გეგმის 23,89%-ია.
პავლე ჭყონიამ, ასევე, ისაუბრა სარეზერვო ფონდიდან თანხის ხარჯვის შესახებ. მან თქვა, რომ 2026 წლის 1 იანვრიდან 2026 წლის 31 მარტის მდგომარეობით, სარეზერვო ფონდის ხარჯებმა შეადგინა 7 399 ლარი. მან კონკრეტული ღონისძიებების ჩამონათვალი წაიკითხა, თუ რა მიზნით იქნა გამოყოფილი თანხა:
სხვადასხვა სამედიცინო დაწესებულებებში, მკურნალობის ხარჯების თანადაფინანსება, მათ შორის, მუნიციპალიტეტის მერიის მიერ გაცემული საგარანტიო წერილების საფუძველზე _ 3 899 ლარი. მედიკამენტების შესაძენად მოქალაქეთა პირად ანგარიშებზე ჩარიცხულია 500 ლარი. განათლების ღონისძიებებზე _ 1 000 ლარი, სარიტუალო ხარჯებისთვის გაწეული დახმარება შეადგენს 500 ლარს.
საკრებულოს წევრმა (“ქართული ოცნება”) ლევან კილაძემ კითხვა დაუსვა პავლე ჭყონიას, :გასული წლის ბიუჯეტით რატომ იყო გაცილებით მეტი თანხა დახარჯული სარეზერვო ფონდიდან, ვიდრე წელს.
_ ეს თანხა 6 899 ლარია (სარიტუალო ხარჯის, 500 ლარის გამოკლებით) _ აღნიშნა მან, _ ეს იმას ნიშნავს, რომ, სავარაუდოდ, ადრე უფრო ხელგაშლილად იხარჯებოდა თანხა სარეზერვო ფონდიდან, ვიდრე ახლა.
პავლე ჭყონიამ განმარტა, რომ წინა წლებში მეტი თუ იხარჯებოდა, ობიექტური მიზეზებიც მეტი იყოო:
_ პირიქით, დადებით მოვლენად უნდა განვიხილოთ, რომ ნაკლებია ხარჯი, _ თქვა მან.
თუმცა, საკითხავია, თუ მეტი იხარჯებოდა, მაშინ უარყოფითი მოვლენა ყოფილა. თუ არადა, რატომაა დადებითი მოვლენა, თუ ნაკლები დაიხარჯა? უამრავი პრობლემა აქვთ ადამიანებს, რომლებიც აცხადებენ, რომ მხოლოდ სოციალური პროგრამით და პენსიით უჭირთ საკმარისი წამლის შეძენა. იმის მტკიცება, რომ ნაკლებად სჭირდება დღეს დახმარება ხალხს, სხვადასხვა აუცილებელი მდგომარეობიდან გამომდინარე, რბილად რომ ვთქვათ, ალოგიკურია.
ამავე სხდომაზე, მეტ-ნაკლები დროის შუალედით, მიიღეს განკარგულებები, დაიწყო არაერთ საკითხზე საჯარო ადმინისტრაციული წარმოება.
ოზურგეთის მუნიციპალიტეტის საკრებულოს გადაწყვეტილებით, ოზურგეთის ცენტრალურ სტადიონს, ცნობილი ოზურგეთელი ფეხბურთელის, ,ქართული ფეხბურთის ღირსეული წარმომადგენლის, კოტე (კოტიკო) გოგატაძის სახელი მიენიჭა.
საკრებულოს წევრმა დავით ჭაკნელიძემ წარმოადგინა საკითხი ასევე, დაბა ურეკში ნომერ მეორე ქუჩისთვის ეწოდებინათ ეგნატე ნინოშვილის სახელი, რის შესახებაც მიიღეს განკარგულება.
ავტორი
