ქართულ პოლიტიკურ წრეებში მწვავე განხილვის საგნად იქცა “ქართული ოცნების” ხმოსნების მიერ არჩეული პრეზიდენტის, მიხეილ ყაველაშვილის ვიზიტი ირანის ისლამურ რესპუბლიკაში. ყაველაშვილი თეირანში უზენაესი ლიდერის, აიათოლა ალი ხამენეის დაკრძალვის ოფიციალურ ცერემონიას დაესწრო და ქვეყნის პრეზიდენტს შეხვდა.
აღნიშნულ ნაბიჯს ადგილობრივ ოპოზიციურ სპექტრში მკაცრი კრიტიკა მოჰყვა, სადაც ვიზიტის მიზანშეწონილობასა და მისგან გამომდინარე პოლიტიკურ რისკებზე საუბრობენ, თავად ყაველაშვილი კი აქცენტს რეგიონულ სტაბილურობასა და კეთილმეზობლობაზე აკეთებს.
ხელისუფლების ამ ნაბიჯს მკაცრად აფასებენ ოპოზიციურ პარტიებში. ოპონენტების მთავარი არგუმენტი ქვეყნის საგარეო კურსს, დასავლურ ინტეგრაციასა და იმ გზავნილებს უკავშირდება, რომლებსაც საქართველო საერთაშორისო ასპარეზზე აგზავნის.
პარტია “ახალის” ჩოხატაურის ორგანიზაციის ლიდერმა, ბაჩო ახალაძემ “გურია ნიუსთან” საუბრისას აღნიშნა, რომ დღევანდელ რთულ გეოპოლიტიკურ ვითარებაში მსგავსი დონის ვიზიტები მძიმე შეცდომაა:
“როდესაც საქართველო ევროკავშირის კანდიდატი ქვეყანაა და მისი მომავალი დასავლურ ოჯახში უნდა წყდებოდეს, ასეთ დროს ირანში მსგავსი დონის ღონისძიებაზე ქვეყნის სახელით ჩასვლა მძიმე პოლიტიკური შეცდომაა. პოლიტიკაში სიმბოლოებს უზარმაზარი მნიშვნელობა აქვს. ეს არ არის უბრალოდ დაკრძალვაზე დასწრება, ეს არის გზავნილი, რომელსაც მთელი მსოფლიო კითხულობს”.
ბაჩო ახალაძის თქმით, მაშინ, როდესაც ქვეყანა ისედაც იმყოფება პარტნიორების ყურადღების ცენტრში, მსგავსი გადაწყვეტილებები კითხვებს აჩენს სახელმწიფოს მიმართულებასთან დაკავშირებით:
“დღეს, როცა საქართველო ისედაც მუდმივად იმყოფება დასავლელი პარტნიორების კრიტიკის ცენტრში, მსგავსი ნაბიჯები კიდევ უფრო აჩენს კითხვებს: საით მიდის ჩვენი ქვეყანა? სახელმწიფოს ინტერესები უნდა იყოს დასავლური კურსის განმტკიცება და არა ისეთი გადაწყვეტილებების მიღება, რომლებიც ჩვენს სტრატეგიულ პარტნიორებს გაუგებარ სიგნალებს უგზავნის. საქართველოს ხელისუფლებას მეტი პასუხისმგებლობა და პოლიტიკური გონიერება მართებს, რადგან ასეთი შეცდომების ფასს საბოლოოდ მთელი ქვეყანა იხდის”.
ვიზიტის კრიტიკის პარალელურად, ოპოზიციის ნაწილი აქცენტს თავად მიხეილ ყაველაშვილის პოლიტიკურ სტატუსსა და ლეგიტიმურობაზე აკეთებს _ “ნაციონალური მოძრაობის” ლანჩხუთის ორგანიზაციის თავმჯდომარე, კახა ასკურავა მიიჩნევს, რომ ყაველაშვილის ქმედებები ქართველი ხალხის ნებას არ ასახავს, თუმცა აღიარებს, რომ მისი ოფიციალური სტატუსი ქვეყნის იმიჯზე მაინც ახდენს გავლენას:
“მე არ ვაღიარებ ყაველაშვილს საქართველოს პრეზიდენტად. ის არ ახმოვანებს ქართველ ხალხს. არის მიტაცებული საპრეზიდენტო სკამის მფლობელი, რომელიც დროებითაა გამაგრებული პრეზიდენტის სასახლეში. ასე რომ, ყაველაშვილი სად ივლის, ჩემთვის ეს არ არის პრიორიტეტი _ შეუძლია წავიდეს პუტინთან მოსკოვში. თუმცა, ქვეყნის იმიჯისთვის ეს არის ძალიან ცუდი, რადგან მის სტატუსს ქვეშ აწერია პრეზიდენტი. პრეზიდენტად ყაველაშვილის მოხსენიება იუმორის ჟანრი უფროა, ვიდრე რეალობა”.
მიხეილ ყაველაშვილი განმარტავს თეირანში მისი ჩასვლის მიზნებსა და გამართული შეხვედრების შინაარსს. გავრცელებულ განცხადებაში იგი აღნიშნავს, რომ ვიზიტი ემსახურებოდა რეგიონულ დეესკალაციას და მეზობელ სახელმწიფოსთან კეთილმეზობლური კავშირების შენარჩუნებას.
ყაველაშვილის თქმით, დაკრძალვის ცერემონიის გარდა, მან შეხვედრა გამართა ირანის ისლამური რესპუბლიკის პრეზიდენტთან, მასუდ ფეზეშქიანთან:
“თეირანში ვიზიტის ფარგლებში, აიათოლა ალი ხამენეის დაკრძალვის ცერემონიას რეგიონისა და მსოფლიოს სხვადასხვა ქვეყნების ლიდერებთან ერთად დავესწარი. ვიზიტის ფარგლებში, ირანის ისლამური რესპუბლიკის პრეზიდენტს, მასუდ ფეზეშქიანს შევხვდი. კიდევ ერთხელ გამოვხატე სამძიმარი ირანში განვითარებული ტრაგიკული მოვლენების გამო და პატივი მივაგე დაღუპულთა ხსოვნას”.
ყაველაშვილმა ხაზგასმით აღნიშნა, რომ ირანულ მხარესთან საუბრისას ყურადღება გამახვილდა საქართველოს სუვერენიტეტსა და რეგიონში მშვიდობის უზრუნველყოფაზე:
“შეხვედრისას აღვნიშნე, რომ საქართველო მხარს უჭერს ყველანაირ ძალისხმევას, რომელიც რეგიონში მშვიდობის, სტაბილურობისა და დეესკალაციის მიღწევას ემსახურება. ჩვენს ქვეყნებს შორის ურთიერთობები პატივისცემასა და ეროვნული ინტერესების გათვალისწინებას ეფუძნება. პრეზიდენტ ფეზეშქიანს მადლობა გადავუხადე საქართველოს სუვერენიტეტისა და ტერიტორიული მთლიანობის მხარდაჭერისთვის. დარწმუნებული ვარ, კეთილმეზობლობაზე დაფუძნებული თანამშრომლობა მომავალშიც ხელს შეუწყობს ჩვენი ქვეყნების ურთიერთობების განვითარებასა და ჩვენი რეგიონის სტაბილურ და მშვიდობიან მომავალს”.
ინფორმაციისთვის. აიათოლა ალი ხამენეი მიმდინარე წლის 28 თებერვალს, ირანზე ისრაელისა და აშშ-ის ერთობლივი საჰაერო იერიშების დროს დაიღუპა.
ავტორი
