როგორც ცნობილია, 2017 წლისთვის “უფასო ხვნა-თესვის პროგრამა” შეწყდა და თავისთავად, მოსახლეობამ საკუთარი ხარჯებით უნდა მოახერხოს სიმინდის თუ სხვა კულტურების დათესვა _ თუ გასულ წლებში, ბიუჯეტიდან ამ პროგრამაზე 50 მილიონ ლარამდე თანხა იხარჯებოდა, ახლა თანხა გათვალისწინებული აღარაა.
მიუხედავად მრავალწლიანი დახმარებისა, გაჩნდა საფუძვლიანი აზრი, რომ უფასო ხვნა-თესვამ წარმატებული შედეგი ვერ გამოიღო. ბუნებრივია, პროგრამის შეწყვეტის გამო მოსახლეობის უმრავლესობა მაინც უკმაყოფილოა. ამბობენ იმასაც, რომ საწვავის გაზრდილი ფასი და ხვნა-თესვის პროგრამის შეწყვეტა ძალზე მტკივნეულია. ამას თან დაერთო წვიმიანი აპრილი და მაისი, რამაც, დროში გაწელა თესვის პროცესი და ახლა როცა თოხნა დამთავრებული უნდა იყოს, მოსახლეობის უმრავლესობა თესვას აწი იწყებს. სავარაუდოდ, ძალიან ბევრი ოჯახი ვერ დათესავს სიმინდს, დარჩება დაუმუშავებელი მიწები და შესაბამისად, მომავალ წელს გასაჭირი მოიმატებს _ ასეთია გლეხების საკმაო ნაწილის აზრი.
მზია თავართქილაძე, სოფელი ჭანიეთი: “კარგი იქნებოდა, საწვავი მაინც მიეცათ ხალხისთვის. ახლა უფრო უჭირს ხალხს, ვიდრე სამი წლის წინ. ფულიც რომ უფრო ნაკლებია უბრალო ხალხში, ამას რა მიხვედრა უნდა?! ნახევარზე მეტი ვერ დათესავს ყანას. ამინდიც ადამიანის წინააღმდეგაა მიმართული. რომელი ერთი პრობლემა უნდა ჩამოთვალო? ყველამ ერთად მოიყარა თავი _ ბუნება, საწვავის შემომტანი თუ მთავრობა ერთად წაესია ადამიანს. ტრაქტორისტებმაც გააძვირეს დახვნის საფასური. თან ადრე ნისიად ხნავდნენ, ახლა უმეტესად ხელზე ფულს ითხოვენ. ყველა შიშობს, ვაითუ ვერ გადაგვიხადონო. აგერ იქნება და ნახეთ, წელს რამდენი საყანე ფართობი დარჩება დაუთესავი”.
დავით სალუქვაძე, სოფელი ლიხაური: “ყოველთვის არ იქნება დახმარების პროგრამა, ეს გასაგებია, მაგრამ ჯერ ხალხს მაინც ძალიან უჭირს და რაღაც კუთხით მაინც უნდა ყოფილიყო დახმარება. სიმინდის და მჭადის გარეშე, ასე თუ ისე, კაი ხანია არ დარჩენილა ხალხი და მომავალი წელი მართლაც გაჭირვების იქნება”.
მზია ქავთარაძე, სოფელი ქაქუთი: “რად უნდა თქმა, რომ ძალზე ცუდი ფაქტია დახმარების შეწყვეტა. ეს ადრე უნდა ეთქვათ. ხალხს მაინც იმედი ჰქონდა, რომ დაეხმარებოდნენ. გასაგებია, რომ არის გარკვეული რაოდენობა ადამიანებისა, რომელიც სიზარმაციდან ვერ გამოდის, მაგრამ უმრავლესობა ცოდვაა. საშუალო ფენა აღარ არის, ფაქტობრივად,. ყველა გაჭირვებულია”.
საუბრობენ იმაზეც, რომ მცირემიწიან ფერმერებს ამ წლების მანძილზე ჰქონდათ შესაძლებლობა, რომ დახმარების პირობებში უკეთ დაეგეგმათ სამომავლო საქმე _ “აგრობარათით” შეიძლებოდა სამუშაო იარაღების და სანერგე მასალის ყიდვაც, რაც მერე შეღავათს მისცემდა ადამიანს, თუმცა მოტივირებულად არ გამოიყენეს შეთავაზებული დახმარება.
ოზურგეთის მუნიციპალიტეტის გამგეობის ეკონომიკის და სოფლის მეურნეობის სამსახურის უფროსი გიგა ხარაბაძე “გურია ნიუსთან” საუბარში საკუთარ მოსაზრებას გამოთქვამს:
_ წლევანდელი გაზაფხული განსაკუთრებით ცივი და წვიმიანი იყო, რამაც, ფაქტობრივად, შეაჩერა საგაზაფხულო ხვნა-თესვა. იყო სტიქიაც. მიუხედავად ამისა, საქმე დაიძრა. კარგი ამინდები უკვე დადგა. ოზურგეთის მუნიციპალიტეტში ოთხი ათასი ჰექტარი ფართობიდან უკვე დახნული და დათესილია 1 700 ჰა. ხვნა-თესვის პროგრამას რაც შეეხება, იგი შეწყდა. ბუნებრივია, ყველა პროგრამა მუდმივად არ მუშაობს. ვისაც უნდა მუშაობა, არის მოტივირებული, აუცილებლად გამონახავს დროს და საშუალებას, დათესოს და მოიწიოს მოსავალი. კომუნისტური ეპოქა დასრულდა, კარგა ხანია. ნუ შევქმნით ტრაგედიას, რომ ვიღაცამ ყანა არ დათესა. 4-5დღეა, ამინდი შეიცვალა უკეთესობისკენ, ხალხი უფრო ამოძრავდა, ყველა ჩქარობს და მოასწრებენ კიდეც დახვნას თუ დათესვას.
ხვნა-თესვის პრობლემების პარალელურად, მოსახლეობა ხშირად კითხულობს თხილის პლანტაციების შეწამვლის დაწყების შესახებ. შიშობენ, რამდენად უსაფრთხო იქნება მავნებელ აზიური ფაროსანას წინააღმდეგ გახორციელებული ღონისძიებები შინაური პირუტყვისა თუ ფრინველისთვის, ფუტკრისთვის, _ ამბობს ხარაბაძე.
როგორც სურსათის ეროვნული სააგენტოს გურიის რეგიონულ სამმართველოში გვითხრეს, მონიტორინგი გახორციელდა, საჭერები დაიდგა. როცა აზიური ფაროსანას პირველი ნიმფა დაფიქსირდება, შემდეგ დაიწყება შეწამვლა.
_ დღეისთვის ხუთ სოფელში უკვე აღჭურვილია ჯგუფები სოლო აპარატებით, უსაფრთხოების კომბინიზონებით, ნიღბებით, ხელთათმანებით _ ერთ სოლო-აპარატზე ორი კაცი იმუშავებს.
შეწამვლა ნებაყოფლობითია. იმის გამო, რომ საფრთხე არ შეექმნას ფუტკარს, აუცილებლად უნდა გაიცელოს თხილის პლანტაციები, რომ სადმე ყვავილოვან ბალახს მწერი არ დააჯდეს. წინააღმდეგ შემთხვევაში, სურვილის მიუხედავად, სათხილე არ შეიწამლება. უსაფრთხოების ღონისძიება მაქსიმალურად გატარდება. ყველა ფრთხილობს ასეთ დროს. მთავარია, ხალხმა გაითავისოს და გვერდით დაგვიდგნენ ამ საქმის კეთებაში, _ გვითხრეს რეგიონული სამსახურის თანამშრომლებმა.
