“გურია ნიუსში” რამდენჯერმე გამოქვეყნდა სტატია ოზურგეთის მუნიციპალიტეტის სოფელ შემოქმედში მცხოვრებ შორენა სიმონიშვილის პრობლემის შესახებ.
ქალბატონი შორენას საკარმიდამო ნაკვეთში, კერძო საკუთრებაში, ჯერ კიდევ კომუნისტური მმართველობის დროიდან, გაყვანილია მაღალი ძაბვის ელექტროსადენები.
კომპანია “ენერგო-პრო ჯორჯია”, საჯარო ინტერესიდან გამომდინარე, სიმონიშვილის ეზოში მრავალწლოვანი ხეხილოვნებს ყოველწლიურად კაფავს, რაც, კომპანიის წარმომადგენელთა განმარტებით, უსაფრთხოების მიზნით ხდება _ რომ არ მოხდეს უბედური შემთხვევა და ასევე, შეუფერხებლად იქნას ელექტროენერგიის მიწოდება განსაზღვრული მიმართულებით.
მკითხველებს შევახსენებთ, რომ ჩვენ ვნახეთ თავის საკარმიდამო ნაკვეთში ატირებული მარტოხელა მოხუცი, რომელიც პატარა ბავშვივით საშველად მამას უხმობდა და დასტიროდა, როგორც თავად ამბობდა, ბაბუების მიერ დარგულ ვაზს და ხეხილოვნებს, რომელიც იქვე გაჩეხილი ეყარა:
_ შემოვიდნენ ამჯერადაც და ბალი, ვაშლი, ხურმა, მსხალი და თხილის ხეები დაუნდობლად გამიჩეხეს. დანომრეს თითქმის ასწლოვანი ხეები, ბებია-ბაბუების დარგული. აქ მაღალი ძაბვის ხაზები კომუნისტების დროსაა გაყვანილია. არც მაშინ უკითხავს ვინმეს ეს ჩვენთვის. სახელმწიფოს სჭირდებაო, _ უთქვამთ და მორჩა. კი, ბატონო, სჭირდებოდეს, არც კანონს ვეწინააღმდეგები, არც _ სახელმწიფოს, მაგრამ რა ვქნა მარტოხელა პენსიონერმა?! მარტო ამ გაჩეხილ ხეებს რომ ვეპატრონო, მუშა უნდა დავიქირავო, საამისოდ კი ორი თვის პენსია არ მეყოფა. უფასოდ ვინ იმუშავებს? მუშახელიც ჭირს სოფელში.
ნახეთ, ვენახი როგორ აჩეხეს! შაჰ აბასი თუ შვებოდა ამას, ალბათ… ჩემი უფლება არ ირღვევა? უფლებების დაცვაზე რომ ყვირის ყველა, ტელევიზორი ვერ ჩამირთავს, ვინაა პატრონი, გამაგებინეთ! ჩემს ეზოში დამაყენონ. თუ ჭრიან, ისე მოჭრან, აჩეხილისგან განსხვავდებოდეს და კომპენსაციას თუ არ მაძლევენ, ეს მაინც გაკაფონ და შეშა დამიყარონ. რა ვქნა, მითხარით?! _ გვითხრა მაშინ შორენა სიმონიშვილმა, რომელიც ისევ გვთხოვს, დავეხმაროთ თავისი საკუთრებისა და შელახული უფლების დაცვაში.
“გურია ნიუსი” უკვე წერდა სიმონიშვილის საკარმიდამო ნაკვეთში არსებული ზარალის შესახებ.
უფრო მეტიც, ჩვენ ვნახეთ გადაჭრილი ხის ტოტები, რომლებიც ჩამოკაფვის შემდეგ უფრო იყო ჩამოკიდული იყო ელექტროსადენებზე, ვიდრე ჩამოკაფვამდე და რომ არა ქალბატონის სიფრთხილე, შეიძლებოდა, უბედური შემთხვევაც მომხდარიყო. ამის შემდეგ, მასთან ისევ მივიდნენ კომპანიიდან და ტოტები გაკაფეს და დაფასოეს.
თუმცა, როგორც მაშინ, ახლაც “ენერგო-პრო ჯორჯიას ” მესვეურთა პასუხი კვლავ ოფიციალური და სიმონიშვილის სასარგებლოდ არაფრისმთქმელია. ისინი ამბობენ, რომ მაღალი ძაბვის ხაზების გასწვრივ, ათი მეტრის დაშორებით, არ უნდა არსებობდეს საფრთხის შემცველი წინაღობები, რაც ადამიანის თუ ცხოველის სიცოცხლის მოსპობას გამოიწვევს. ამავე დროს, შეაფერხებს ელექტროენერგიის მიწოდებას.
“გურია ნიუსი” “ენერგო-პრო ჯორჯიას” საზოგადოებრივ სამსახურს დაუკავშირდა, საიდანაც პროტოკოლური წესის დაცვით შედგენილი წერილი მივიღეთ:
“ენერგო-პრო ჯორჯიამ” გადაბელვითი სამუშაოები განახორციელა კანონმდებლობით გათვალისწინებულ ფარგლებში. დაცვის ზონებში ხეებისა და ტოტების მოჭრის უფლება მთავრობის 366 დადგენილებით არის განსაზღვრული. არსებული სიტუაცია უსაფრთხოების ნორმების დარღვევის რისკებს შეიცავდა. გადაბელვითი სამუშაოები წარმოადგენდა აუცილებლობას, რადგან ხის ტოტები ედებოდა მაღალი ძაბვის გადამცემ ხაზს, რაც საფრთხეს უქმნიდა ადამიანთა უსაფრთხოებას და აღნიშნული სოფლის ენერგომომარაგებას. აღნიშნული საფრთხეების თავიდან აცილების მიზნით, გახორციელდა მაღალი ხეების ტოტების მოჭრა. გადაბელვითი სამუშაოების შესახებ ინფორმირებული იყო აბონენტი. ხელი აქვს მოწერილი თანხმობის დოკუმენტზე. სამუშაოების შესრულების პროცესს აკვირდებოდა თავად ქალბატონი შორენა, ადგილზე მას არ გამოუხატავს წინააღმდეგობა. კომპანიის წარმომადგენელმა აბონენტის თხოვნის საფუძველზე ნარჩენი ტოტები დაამუშავა და მის მიერ მითითებულ ადგილზე დატოვა”, _ წერია ჩვენთვის გამოგზავნილ პასუხში.
თუმცა, კომპანიის წარმომადგენლებმა ნარჩენი ტოტები, მხოლოდ “გურია ნიუსის” სტატიის გამოქვეყნების შემდეგ დაამუშავეს. ჩვენ ადგილზე ვნახეთ გაჩეხილი, დასხეპილი მრავალწლოვანი ხეები და ვაზი, რომელიც ეზოში იყო მოფანტული. აღნიშნულის ფოტომტკიცებულება დართული აქვს სტატიებს და უფრო მეტი რაოდენობით ინახება რედაქციაში.
შორენა სიმონიშვილს ენერგოკომპანიის წარმომადგენლებმა საზღაურად, კეთილი ნების გამოსახატავად, ელექტროენერგიის ერთი წლის საფასურის გადახდაც შესთავაზეს. თუმცა, ამაზე თავად ქალბატონმა თქვა უარი:
_ რამდენ ელექტროენერგიას ვხარჯავ, რომ გადასახადი მნიშვნელოვანი იყოს? 6-7 ლარს აღწევს ჩემი გადასახადი თვეში. წელიწადში 80 ლარამდე თანხა, ერთჯერადად, ჩემთვის რაიმეს ნიშნავს? 80 ლარის ბალს ორ დღეში ვყიდდი და თავს ვირჩენდი. აბა, ჩემი პენსია მხოლოდ წამლებს სჭირდება, _ ამბობს სიმონიშვილი.
“გურია ნიუსი” ესაუბრა სახალხო დამცველის ოფისის წარმომადგენელს გურიაში, თამარ ოგანოვას, რომელიც შეხვდა ქალბატონ შორენა სიმონიშვილს და მოისმინა მისი გულისტკივილი:
_ ჩვენ ვესაუბრეთ დაზარალებულ ქალბატონს. აქ არის ერთი მნიშვნელოვანი დეტალი. ქალბატონი შორენა ამბობს, რომ მის ეზოში კომუნისტების დროს არის გაყვანილი მაღალი ძაბვის სადენები. თუმცა, როგორც თავად გვითხრა, ერთი ბოძი 2016 წელს დაუმატეს. ეს უკვე ხელჩასაჭიდი თემაა. არსებობს მთავრობის სპეციალური დადგენილება სადავო საკითხის შესახებ. ჩვენთან განცხადებით შემოსვლას აპირებს, როგორც მოთხრა და შესაძლებლობის ფარგლებში, მაქსიმალურად დავეხმარებით. მარტოხელა პენსიონერი, რომლის საკუთრების უფლება არაერთხელ ხელჰყვეს, სახელმწიფომ უნდა დაიცვას, _ გვითხრა თამარ ოგანოვამ.
საქართველოს ახალგაზრდა იურისტთა ასოციაციის ოზურგეთს ოფისის იურისტმა, თამაზ ტრაპაიძემ გვითხრა, რომ ქალბატონმა სიმონიშვილმა უნდა მოიწვიოს კომისია, რომელიც ზარალს დაითვლის და ამის შემდეგ, უნდა მოხდეს მისი გადახდა.
“გურია ნიუსი” ექსპერტს, სამართალმცოდნეს, არჩილ კაიკაციშვილს ესაუბრა:
_ როგორც გავიგე, სამართლებრივი საკითხია, ზიანის საკითხია. რამდენიმე მიმართულებით შეიძლება დაიცვა ქალბატონი. შესაძლოა, ყოველწლიური კომპენსაციის გადახდის მოთხოვნა. არის მეორე მომენტი _ ზიანი, რომლის ცვლადობა არის ძნელი დასამტკიცებელი. მაგალითად, მარცვლეულია თუ სხვა კულტურა, უნდა იყოს ფაქტი, რამდენია განადგურებული. ფაქტების კონსტანტაცია უნდა მოხდეს _ ვთქვათ, შარშან ხუთი ძირი ტყემლის ხე მოიჭრა და წელს არ დგას. ვიმეორებ, საუბარია საკუთრების უფლების დაცვაზე. უნდა მოხდეს მსჯელობა, დროებითი სარგებლობის ღირებულების განსაზღვრაც არის შესაძლებელი. მოკლედ, ვცადოთ, დავეხმაროთ ამ ქალბატონს, _ გვითხრა კაიკაციშვილმა.
ავტორი: მარინა ჩიხლაძე
