მდინარაძის წასვლა და შეფასებები პოლიტიკურ სპექტრში

მმართველ პარტიაში მორიგი მსხვილი საკადრო და სტრუქტურული ცვლილებებია _ ვიცე–პრემიერმა და რეგიონული განვითარების მინისტრმა, მამუკა მდინარაძემ თანამდებობა დატოვა და პოლიტიკიდან წასვლის შესახებ ოფიციალურად განაცხადა.

10-წლიანი პოლიტიკური მოღვაწეობის შეჯამებისას მამუკა მდინარაძემ აღნიშნა, რომ ეს წლები მისთვის შრომისა და სამშობლოს ერთგულების პერიოდი იყო. მან მადლობა გადაუხადა “ქართული ოცნების” გუნდსა და პარტიის საპატიო თავმჯდომარეს, ბიძინა ივანიშვილს.

მან ხაზგასმით აღნიშნა, რომ პოსტის დატოვება მისი პირადი გადაწყვეტილება იყო და უარყო ეჭვები შიდა დაპირისპირებასა თუ კორუფციულ სქემებზე:

“ამ პოზიციიდან ჩემი გადადგომა იყო ნამდვილად ჩემი ინიცირებული. ამ დღეებში მოისმენთ დაახლოებით 100-მდე ვერსიას, მაგრამ მართლა ჩემი გულწრფელი სურვილი იყო. წუხელ პრემიერ–მინისტრს დიდი ხნის განმავლობაში ვესაუბრე, დღეს დილით _ პარტიის საპატიო თავმჯდომარეს. დამთანხმდნენ საბოლოო ჯამში. მადლიერი ვარ ამის და ვფიქრობ, სხვა სფეროშიც თუ მოვსინჯავ ძალებს, უკეთესი იქნება. კორუფციის წინააღმდეგ ბრძოლაში მე ჩემი გავაკეთე _ სადაც საჭირო ვიყავი, ყოველთვის იქ ვიყავი. შეუცვლელი არავინ არის“.

პრემიერ-მინისტრ ირაკლი კობახიძის განცხადებით, სცადეს მდინარაძისთვის აზრი შეეცვლევინებინათ, თუმცა, ამაოდ:

“ათი წლის განმავლობაში ის უამრავ რამეს აკეთებდა, რაც აისახა ქვეყნის განვითარებაზე და ჩვენი გუნდის გაძლიერებაზე. მას ეკუთვნის მხოლოდ და მხოლოდ მადლობა. ჩვენთვის სამწუხაროა ის გადაწყვეტილება, რომელიც მიიღო. გვქონდა შეხვედრა,  მათ შორის გვქონდა კონსულტაციები ბატონ ბიძინა ივანიშვილთან. ეს იყო მისი გადაწყვეტილება. ჩვენ ვცადეთ, ის დაგვერწმუნებინა საპირისპირო გადაწყვეტილებაში, თუმცა მას მყარი პოზიცია ჰქონდა. კიდევ ერთხელ მადლობას გადავუხდი მამუკა მდინარაძეს იმ ყველაფრისთვის, რაც გაკეთებული აქვს ქვეყნისა და გუნდისთვის“, _ ირაკლი კობახიძე.

მდინარაძის წასვლას უწყებრივი გადაწყობა მოჰყვა. პარლამენტის თავმჯდომარის, შალვა პაპუაშვილის განცხადებით, სახელმწიფო მინისტრის პოსტი აღარ შეიქმნება, ხოლო რეგიონული განვითარებისა და ინფრასტრუქტურის სამინისტროების გაერთიანება იგეგმება.

პაპუაშვილის განმარტებით, ძალოვანთა კოორდინაციისა და რეგიონული მიმართულებით პოსტების შექმნა მდინარაძის პირად პოლიტიკურ წონასა და გამოცდილებაზე იყო მორგებული, რისი საჭიროებაც მისი წასვლის შემდეგ აღარ არსებობს.

უწყებათა ხელახალ გაერთიანებასა და მდინარაძის ფაქტორს გამოეხმაურა პარლამენტის ვიცე-სპიკერი ნინო წილოსანიც:

“გასაკვირი არაფერია, რომ მამუკა მდინარაძის პოლიტიკიდან წასვლის შემდეგ, ეს ცვლილებები აღარ განხორციელდება _ ალბათ, ამ მასშტაბის ადამიანი, რომელიც ასეთ კოორდინაციას გაუწევს, ამ ეტაპზე აღარც იქნება მოაზრებული… გარკვეულწილად მივესალმები [სამინისტროების გაერთიანებას], რადგან ინფრასტრუქტურის და რეგიონული განვითარების სამინისტრო ერთად უფრო ქმედითი იყო. სამინისტროს გაყოფის შემდგომ პროცესმაც დაგვანახა, რომ ეფექტიანობა ამ კუთხით ნამდვილად არ გაზრდილა, ამიტომ პრემიერ–მინისტრის გადაწყვეტილება, რომ ეს სამინისტროები ისევ გაერთიანდეს, ალბათ, უფრო მოქნილი სისტემის შექმნას უკავშირდება“, — განაცხადა წილოსანმა.

დედაქალაქში მიმდინარე პროცესებს ოპოზიციური პარტიების წარმომადგენლები აქტიურად გამოეხმაურნენ.

პარტია “ახალის” ჩოხატაურის ორგანიზაციის ხელმძღვანელი, ბაჩო ახალაძე მიიჩნევს, რომ პროცესი ხელისუფლების ჩამოშლის ნიშანია:

“რაც დღეს “ქართულ ოცნებაში” ხდება, ხელისუფლების ჩამოშლის ბოლო სტადიის ერთ–ერთი ყველაზე მკაფიო ნიშანია. როდესაც მმართველი გუნდის ერთ–ერთი ყველაზე გავლენიანი ფიგურა პოლიტიკიდან მიდის და გადაწყვეტილებას პრემიერ–მინისტრთან და ბიძინა ივანიშვილთან წინასწარ განიხილავს, ეს უკვე უბრალოდ პირადი გადაწყვეტილების ამბავი აღარ არის.

ეს არის სისტემის შიდა რღვევის, ძალაუფლების ცენტრში დაგროვილი პრობლემებისა და პოლიტიკური რესურსის ამოწურვის სიმპტომი. ოლიგარქიულ მმართველობაში, სადაც გადაწყვეტილებების მთავარი ცენტრი ივანიშვილია, ერთი ფიგურის წასვლა აჩენს კითხვას _ რამდენად მყარად დგას მთლიანად ხელისუფლების ვერტიკალი.

ეს ის ეტაპია, როდესაც გარედან სისტემა ჯერ კიდევ მყარად ჩანს, მაგრამ შიგნით უკვე იწყება ნაპრალები და პოლიტიკური გუნდის დაშლის ნიშნები. ასეთ დროს ყველაზე მნიშვნელოვანი კითხვა აღარ არის, ვინ შეცვლის მამუკა მდინარაძეს. მთავარი კითხვაა _ ვინ იქნება შემდეგი და რამდენ ხანს შეძლებს ეს სისტემა არსებული ფორმით შენარჩუნებას“.

“ძლიერი საქართველო – ლელოს” ლანჩხუთელი ლიდერი, გოჩა ჯანაშია კი მიიჩნევს, რომ გადაწყვეტილება ექსკლუზიურად ივანიშვილს ეკუთვნის და სამინისტროების გაერთიანებით რეალურად არაფერი შეიცვლება:

“რა თქმა უნდა, ჩვენს სახელმწიფო სისტემაში რომ სტრუქტურები გაბერილია, ამას ლაპარაკი არც უნდა. ნორმალურ ქვეყანაში შესაძლოა ჩვეულებრივი მოვლენაც კი იყოს, თუმცა, ჩვენთან ამას დიდი მნიშვნელობა არ აქვს _ პროექტები და თანხები ისევ წამოვა, მართვაც ისე გაგრძელდება, როგორც ეს რუსული ტიპის მმართველობის ქვეყანას შეეფერება.

რაც შეეხება მდინარაძის წასვლას, რეალურად, ხდება ისეთი რამ, რაც ბიძინა ივანიშვილს არ მოეწონა. სწორედ ეს ადამიანი წყვეტს, ვინ ავა პოლიტიკურ სცენაზე და ვინ დატოვებს მას. შესაძლოა, მდინარაძემ ისეთი შეცდომა დაუშვა, რასაც ივანიშვილი ვერ იტანს და უბრალოდ უთხრა, რომ უნდა წასულიყო.

ახლა უამრავი ვერსია ჩნდება, თუ რას შეეწირა მისი კარიერა. ჩემთვის შეუძლებელია იმის დაჯერება, რომ ადამიანი, რომელმაც ასეთი წოდებები მიიღო, თავისი ნებით წავიდოდა. როდესაც ის პირველად “ჩამოაჩოჩეს“, უკვე ცნობილი იყო, რომ წინ დაღმასვლა ელოდა. ვფიქრობ, უახლოეს პერიოდში გამოიკვეთება, თუ რა შემხებლობა აქვს მას კორუფციულ სქემებთან, თუ კორუფციული დავალების მცდელობებთან  და რა დავალება ვერ შეასრულა“.

მმართველი გუნდის შიდა პროცესებსა და შესაძლო შედეგებზე ამახვილებს ყურადღებას პარტიის “გახარია საქართველოსთვის” წევრი, გიგა ფარულავაც.

“მამუკა მდინარაძე თავის თავს არ ეკუთვნოდა. ისევე როგორც არსაიდან მოსულა, დღეს არსაით გაუშვეს კონკრეტული ადამიანის გადაწყვეტილებით. თავის დროზე ეს პოზიციები სწორედ მდინარაძისთვის შეიქმნა და რაკი ის წავიდა, შენარჩუნების საჭიროებაც აღარ არის“.

ხოლო “ერთიანობა-ნაციონალური მოძრაობის” წევრი, ლაშა ფარულავა უწყებათა გადაწყობას შემდეგნაირად აფასებს:

“ეს არის კონკრეტული მაგალითი იმისა, რომ “ოცნება” სამთავრობო კაბინეტებს არა ხალხის საჭიროების, არამედ პირადი კეთილდღეობის მიხედვით ანაწილებს. შეიქმნა კაბინეტი კონკრეტული პირისთვის, ახლა აღარ არის მდინარაძე და აღარც სამინისტრო იქნება. ეს რეჟიმი მხოლოდ საკუთარ ინტერესებზე ზრუნავს“.

პოლიტოლოგი გია ხუხაშვილი კი გადაცემაში “ფორმულას დღე” ამბობს, რომ მდინარაძე პოლიტიკიდან დიდი ხანია წასულია, გადადგომის შესახებ გაკეთებული განცხადებით კი უბრალოდ ფორმალურად  გაფორმდა მისი წასვლის საკითხი:

“მდინარაძე დიდი ხანია წასული პოლიტიკიდან, რაც სახელმწიფო უსაფრთხოების სამსახურიდან გამოიყვანეს. ასე ნაწილ –ნაწილ მისი ჩამოქვეითება კი იმიტომ მოხდა, რომ ძირითადი სამიზნე კობახიძეა“, _ ამბობს ხუხაშვილი.

დედაქალაქში მიმდინარე პოლიტიკურ გადაადგილებებსა და მამუკა მდინარაძის წასვლას ადგილობრივი მოსახლეობაც გამოეხმაურა. გურიის მცხოვრებთა მოსაზრებები, როგორც მოსალოდნელი იყო, ორად იყოფა. მოსახლეობის ნაწილი მიიჩნევს, რომ 10 წელი პოლიტიკაში ყოფნა მცირე დრო არ არის და თუ დაიღალა და დასვენება სურს, ეს მისი უფლებაა. ნაწილს კი მიაჩნია, რომ მდინარაძის წასვლით არც არაფერი შეიცვლება და მთავარია, მოსახლეობის წინაშე არსებული პრობლემები მოგვარდეს.

ინფორმაციისთვის, მდინარაძე “ოცნების” ხელისუფლებაში 10 წელია სხვადასხვა თანამდებობას იკავებდა. მათ შორის თავდაპირველად საკანონმდებლო, შემდეგ კი აღმასრულებელ ხელისუფლებაში იყო.

მამუკა მდინარაძე “ოცნების” სიიდან არჩეულ იქნა სამი მოწვევის პარლამენტში. კერძოდ: 2016-2020 და 2020-2024 წლებში იყო “ოცნების” დეპუტატი, ასევე იკავებდა სხვადასხვა დროს საპარლამენტო უმრავლესობის ლიდერის, ასევე ფრაქცია “ქართული ოცნების” თავმჯდომარის თანამდებობას. მდინარაძე მე-11 მოწვევის პარლამენტშიც იყო 2024 წლიდან 2025 წლის სექტემბრამდე.

2025 წლის 3 სექტემბრიდან 2026 წლის 21 აპრილამდე კი მამუკა მდინარაძე სახელმწიფო უსაფრთხოების სამსახურის უფროსის თანამდებობას იკავებდა. აღნიშნულ პერიოდში მან მიიღო რამდენიმე წოდება, კერძოდ:

2025 წლის 3 სექტემბერს მას სახელმწიფო უსაფრთხოების ლეიტენანტის წოდება მიენიჭა; 23 ოქტომბერს _ უფროსი ლეიტენანტის წოდება; 25 დეკემბერს _ სახელმწიფო უსაფრთხოების კაპიტნის წოდება; 26 დეკემბერს _ სახელმწიფო უსაფრთხოების მაიორის; 2026 წლის 9 მარტს მას სახელმწიფო უსაფრთხოების ვიცე-პოლკოვნიკის წოდება მიენიჭა; 8 აპრილს _ სახელმწიფო უსაფრთხოების პოლკოვნიკის წოდება; 2026 წლის 20 აპრილს კი სახელმწიფო უსაფრთხოების გენერალ-მაიორის წოდება.

2026 წლის 21 აპრილიდან 29 ივლისამდე მამუკა მდინარაძე წელს შექმნილ სტრუქტურას სამართალდამცავ უწყებათა კოორდინაციის საკითხებში სახელმწიფო მინისტრის აპარატს” ედგა სათავეში. მის ფუნქციებს სუს-ს; შსს-სა და პროკურატურას, ასევე სახელმწიფო აუდიტის სამსახურს შორის კოორდინაციის გაუმჯობესება წარმოადგენდა. თუმცა, აქედან დაახლოებით სამ თვეში, პრემიერმა კობახიძემ განაცხადა, რომ აღნიშნული სამსახური არსებობას აღარ გააგრძელებდა, მდინარაძე კი ახალ თანამდებობაზე დაინიშნებოდა.

29 ივლისვე გახდა ცნობილი, რომ მდინარაძე ერთი თვით რეგიონული განვითარების მინისტრად დაინიშნებოდა, ხოლო სექტემბრიდან ახალი უწყების _ რეგიონული პოლიტიკის საკითხებში სახელმწიფო მინისტრის თანამდებობაზე უნდა ემუშავა.