25 ივნისს ოზურგეთის მუნიციპალიტეტის საკრებულოს მორიგი სხდომა შედგა.
დღის წესრიგით გათვალისწინებული შვიდი საკითხი, ტრადიციულად, საკრებულოს წევრებს, საკრებულოს თავმჯდომარემ დავით დარჩიამ გააცნო.
მან სხდომის დასაწყისში ერთიანობაზე გაამახვილა ყურადღება და მოუწოდა ყველას, რომ ერთი გუნდი ვართ და ერთად უნდა ვიმუშაოთო.
“სხვანაირად არ შეიძლება _ მიტანა–მოტანა დაღუპავს ერთიანობას. სახალხოდ ამას რომ ვამბობ, არაა კარგი, თუმცა, არ შეიძლება… ერთი გუნდი ვართ…” _ თქვა მან. თუმცა, არ დაუკონკრეტებია, ვინ რა და ვისთან “მიიტან-მოიტანა”.
ამასობაში საკრებულოს ერთ-ერთმა წევრმა თქვა, რომ პირდაპირ ეთერში იმყოფებოდნენ და ამ თემაზე საუბარი ახლა მიუღებელი იყო, შემდეგ კი სხდომა ჩვეულებრივ გაგრძელდა.
პირველი საკითხის ირგვლივ _ ოზურგეთის მუნიციპალიტეტის ტერიტორიაზე შინაური ბინადარი ცხოველების მოვლა-პატრონობის და ყოლის წესის შესახებ, დადგენილების თაობაზე, მერიის ადმინისტრაციის უფროსმა გენო მორჩილაძემ ისაუბრა.
მან თქვა, რომ დამტკიცდა შინაური ცხოველების მოვლა-პატრონობის და ყოლის წესი და ძალადაკარგულად ცხადდება 2018 წლის დადგენილება. ახალი დადგენილება კი, 1 ივლისიდან ამოქმედდება.
მორჩილაძემ ისაუბრა პროექტის მახასიათებელ ნიშნებზე და თვით პროექტის მიზანზე. ადამიანის და ცხოველის უსაფრთხო თანაარსებობის უზრუნველყოფაზე. პროექტი გავრცელდება ოზურგეთის მთელ ადმინისტრაციულ საზღვრებზე და აწესრიგებს ძაღლის და კატის ყოლასთან, მოვლა-პატრონობასთან და პოპულაციის მართვასთან დაკავშირებულ ურთიერთობებს. შინაურ ბინადარ ცხოველთა მართვის სფეროში, მუნიციპალიტეტის უფლებამოსილ ორგანოდ განსაზღვრულია ა(ა)იპ ოზურგეთის მუნიციპალიტეტის მომსახურების ცენტრი, რომელიც ახორციელებს ზედამხედველობას, პოპულაციის მართვას და მუნიციპალური თავშესაფრის ფუნქციონირებას.
ხალხი დიდი ხანია, ელოდება ამ წესის მიღებას და რამდენად ეფექტური და სრულყოფილი იქნება ის, ამ წლის პირველი ივლისის შემდეგ გამოჩნდება.
დეპუტატებმა უყოყმანოდ დაუჭირეს მხარი შინაური ცხოველების მოვლა-პატრონობის წესს.
ეკონომიკის სამსახურის უფროსმა ხათუნა სურგულაძემ ისაუბრა შემოქმედის ადმინისტრაციულ ერთეულში უძრავი ქონების სარგებლობის უფლებით გადაცემის და მუნიციპალური მოძრავი ქონების პრივატიზაციის გეგმის შესახებ, საკითხზე.
ეს საკითხი წარმოდგენილი იყო იმ ფორმით, რომ ოზურგეთის მუნიციპალიტეტის საკუთრებაში არსებული, ოზურგეთის მუნიციპალიტეტის შემოქმედის ადმინისტრაციულ ერთეულში მდებარე, 1 439 კვ.მ. არასასოფლო-სამეურნეო დანიშნულების მიწის ნაკვეთის უსასყიდლოდ, სარგებლობის უფლებით, აღნაგობის ფორმით, პირდაპირი განკარგვის წესით, 99 წლის ვადით, სსიპ “საქართველოს საპატრიარქოსთვის” გადასაცემად, ოზურგეთის მერს მიეცეს თანხმობა.
საკრებულოს წევრებმა მხარი დაუჭირეს განკარგულების მიღებას.
შემდეგ, ოზურგეთის მუნიციპალიტეტის 2026 წლის ბიუჯეტით გათვალისწინებული ჯანმრთელობის დაცვის და სოციალური დახმარების გაცემის და მიღების წესის დამტკიცების შესახებ, ოზურგეთის მუნიციპალიტეტის საკრებულოს 2025 წლის დადგენილებაში ცვლილების შესახებ, სოციალური სამსახურის უფროსმა, მარიამ დარჩიამ ისაუბრა.
ცვლილება კონკრეტულად შეეხო დღის ცენტრის დაფინანსებას. პროგრამა ითვალისწინებს ოზურგეთის მუნიციპალიტეტში რეგისტრირებულ 6-დან 18 წლამდე ბავშვების თანადაფინანსებას, რომლებიც სარგებლობენ სოციალური ადაპტაციის ფარგლებში, დღის ცენტრის მომსახურებით. პროგრამის მიზანია, ყოველთვიური დაფინანსება არა უმეტეს 225 ლარისა პროგრამის გამახორციელებელი ორგანიზაციის მიერ, ერთ ბენეფიციარზე გათვლილი გაწეული მომსახურების შესახებ, წარმოდგენილი დოკუმენტაციის შესაბამისად. პროგრამა, ასევე, უზრუნველყოფს, დღის ცენტრით მოსარგებლე ბენეფიციართათვის, საკურორტო სეზონზე, წლის განმავლობაში ერთჯერადად, არაუმეტეს, 525 ლარით დასვენების თანადაფინანსებას. პროგრამით სარგებლობისთვის პროგრამის გამახორციელებელმა ორგანიზაციამ, ოზურგეთის მუნიციპალიტეტის მერიამ უნდა წარმოადგინოს ორგანიზაციის იურიდიული რეგისტრაციის დამადასტურებელი დოკუმენტაცია. ორგანიზაციის მიერ სოციალური რეაბილიტაციისა და ბავშვზე ზრუნვის სახელმწიფო პროგრამის განსახორციელებლად რეგისტრაციის დამადასტურებელი დოკუმენტაცია. ასევე პროგრამის გახორციელების ადგილის/ფართის შესაბამისი აკრედიტაციის დამადასტურებელი დოკუმენტაცია. არ უნდა იყოს რეგისტრირებული მოვალეთა რეესტრში. აგრეთვე არ უნდა გაჩნდეს ოზურგეთის მუნიციპალიტეტის მერიის წინაშე ფინანსური ან სხვაგვარი შეუსრულებელი ვალდებულებები.
საკითხის ირგვლივ ადმინისტრაციული წარმოების დაწყებას, მხარი დაუჭირეს დეპუტატებმა.
საბოლოოდ, ოზურგეთის მუნიციპალიტეტის საკრებულოს მორიგ სხდომაზე
დამტკიცდა შემდეგი პროექტები:
ოზურგეთის მუნიციპალიტეტის ტერიტორიაზე შინაური ბინადარი ცხოველების მოვლა-პატრონობისა და ყოლის წესის დამტკიცების შესახებ;
ოზურგეთის მუნიციპალიტეტის შემოქმედის ადმინისტრაციულ ერთეულში მდებარე უძრავი ქონების სარგებლობის უფლებით გადაცემაზე, ოზურგეთის მუნიციპალიტეტის მერისთვის თანხმობის მიცემის თაობაზე;
ოზურგეთის მუნიციპალიტეტის საკუთრებაში არსებული მოძრავი ქონების საპრივატიზაციო ობიექტების ნუსხის დამტკიცების შესახებ;
ოზურგეთის მუნიციპალიტეტის საკუთრებაში არსებული მოძრავი ქონების პრივატიზაციის გეგმის დამტკიცების თაობაზე.
საჯარო ადმინისტრაციული წარმოება დაიწყო:
“ოზურგეთის მუნიციპალიტეტის 2026 წლის ბიუჯეტით გათვალისწინებული ჯანმრთელობის დაცვის და სოციალური დახმარების გაცემისა და მიღების წესის დამტკიცების შესახებ”, დადგენილებაში ცვლილების შეტანის თაობაზე.
ასევე, საკრებულომ მოისმინა და ცნობად მიიღო შემდეგი საკითხები:
ინფორმაცია ოზურგეთის მუნიციპალიტეტის მერიის ადმინისტრაციული სამსახურის და იურიდიული განყოფილების მიერ გაწეული საქმიანობის შესახებ;
ოზურგეთის მუნიციპალიტეტში ონკოლოგიური დაავადების მქონე პირთა დახმარების პროგრამის მიმდინარეობის თაობაზე;
მუნიციპალიტეტში განათლების მიღების ხელმისაწვდომობის გაზრდის, მერის სტიპენდიის გაცემის საქმეში არსებული მდგომარეობის შესახებ.
ავტორი
