სახელმწიფო უსაფრთხოებისა და კრიზისების მართვის საბჭოს მდივნის მინდია ჯანელიძის ოჯახის საკუთრებაში 2 საცხოვრებელი სახლი, კომერციული ფართი, ავტოფარეხი და ავტომობილია.
ამის შესახებ ჯანელიძის ქონებრივ დეკლარაციაში წერია, რომელიც მან 2017 წლის 29 მარტს შეავსო.
დეკლარაციის თანახმად, მინდია ჯანელიძე ფლობს 2011 წელს, 65000,00-დოლარად ნაყიდ 115,00 კვ.მ-ის ფართობის საცხოვრებელ სახლს და ამავე წელს, 2000,00-დოლარად ნაყიდ ავტოფარეხს, თბილისში, ჩარგლის ქუჩაზე.
ასევე, მის საკუთრებაშია 2008 წელს, 21000,00-დოლარად შეძენილი 72,00 კვ.მ-ის ფართობის საცხოვრებელი სახლი თბილისში, მოსკოვის გამზირზე.
ხოლო მინდია ჯანელიძის მეუღლე, ეკატერინე ჯანელიძე ფლობს, 2013 წელს, 57000,00-დოლარად ნაყიდ 90,00 კვ.მ-ის კომერციულ ფართს, თბილისში, ფალიაშვილის ქუჩაზე. მის საკუთრებაშია ასევე 2016 წელს, 41000,00 ევროდ შეძენილი მსუბუქი ავტომანქანა BMW X4.
რაც შეეხება ოჯახის შემოსავლებს. დეკლარაციიდან ირკვევა, რომ ჯამში მათ 265 750 ლარი იყო. აქედან, მინდია ჯანელიძის შემოსავალი უსაფრთხოებისა და კრიზისების მართვის საბჭოს მდივნის პოზიციიდან 94 500 ლარი იყო, დანარჩენი 171 250 ლარი მისი მეუღლის, ეკატერინე ჯანელიძის გასული წლის შემოსავალია.
დეკლარაციის თანახმად, ეკატერინე ჯანელიძე ფლობს შპს “თრეველ პორტის” 100%-იან წილს, საიდანაც გასულ წელს, 156500,00 ლარის შემოსავალი აქვს მიღებული. ამავე შპს-ს დირექტორის თანამდებობისთვის კი მან 13500,00 ლარი მიიღო.
რაც შეეხება შპს “სან ჰაუსი”-ს, რომელიც 2016 წელს დაფუძნდა და 50%-იან წილს ეკატერინე ჯანელიძე ფლობს (თანაპარტნიორი ნინო იაშვილია), მას 1250,00 ლარი აქვს მიღებული.
დეკლარაციის შევსების მომენტში მინდია ჯანელიძეს “თი–ბი–სი” ბანკის სახელფასო ანგარიშზე 6900,00 ლარი ჰქონდა, ამავე ბანკის სახელფასო ანგარიშზე ეკატერინე ჯანელიძეს 8000,00 ლარი ერიცხებოდა.
მინდია ჯანელიძის სახელზე 50000,00-დოლარიანი იპოთეკური სესხია, რომელიც მას 2016 წელს აუღია და ვადა 2026 წელს ეწურება. გასულ წელს პროცენტის დასაფარად “საქართველოს ბანკისთვის” 7320,00 დოლარი გადაუხდია.
ეკატერინე ჯანელიძეს კი 2016 წელს (2021 წლამდე) 90 000,00-ლარიანი ავტოსესხი აუღია და “საქართველოს ბანკისთვის” 2200,00 ლარი აქვს გადახდილი.
