სახელმწიფო პროგრამამ _ „ზრუნვა სოფელზე და ფერმერებზე“, რომელიც ითვალისწინებს სასოფლო-სამეურნეო საქონლის და ხვნის მომსახურების სუბსიდირებას, მოსახლეობაში დადებითი განწყობა შექმნა, თუმცა, როცა ფერმერები გააქტიურდნენ და იმის გარკვევა მოინდომეს, ვინ დაეხმარება მათ დახვნა-დათესვაში, როგორ მოხდება სუბსიდირება და ა.შ. პასუხი ვერსად მიიღეს _ მათ “ცხელ ხაზზე“ არავინ პასუხობს და როგორც ისინი ამბობენ, ყველა მიმართულებით ყრუ კედელს აწყდებიან.
ფერმერები იმასაც ამბობენ, რომ გურია ბოლო ადგილზეა „მოსროლილი“ და პასუხის გამცემი იმიტომ არ ჩანს არსად, სათქმელიც არაფერი აქვთ და გამოცხადებული კარგი პროგრამის შემსრულებელი არავინაა _ არ არსებობს არათუ რეგიონის, რამდენიმე სოფლის საკმარისი ტექნიკა. ამიტომ მიიჩნევენ, რომ სიხარული მეტად ნაადრევია და ანტიკრიზისული გეგმა შეიძლება ჩანასახშივე განწირული აღმოჩნდეს.
დაბნეული ფერმერები შველას ჟურნალისტებისგან ითხოვენ, რეკავენ „გურია ნიუსის“ რედაქციაში და სურთ, გაერკვნენ, რატომ არ პასუხობენ არსად.
ჩვენ ვეცადეთ, პასუხი გაგვეცა მოსახლეობაში დაგროვილ კითხვებზე, თუმცა, როგორც ფერმერებს, ჩვენც არავინ გვიპასუხა ჩვენ მიერ მოპოვებულ შესაბამის კონკრეტულ ნომრებზე; „ცხელი ხაზი“ კი გამუდმებით მუსიკალურ ტალღაზე იყო მომართული და შიგადაშიგ მოგვიწოდებდა, მოგვენახულებინა კონკრეტული ვებგვერდი, საიდანაც ვერაფრით გაიგებს ჩოხატაურელი, ლანჩხუთელი თუ ოზურგეთელი ფერმერი, ვის მიაკითხოს ტრაქტორისთვის იმ დროს, როცა დღითიდღე გვიანდება ხვნა-თესვის დაწყება ან რა ქნას დარეგისტრირებულ-დასარეგისტრირებელმა ფერმერმა, რომელსაც სათიბი და საძოვარი კი არა, დასამუშავებელი მიწა აქვს სახელმწიფოსგან იჯარით მიღებული.
სოფლისა და სოფლის მეურნეობის განვითარების სააგენტოს გურიის რეგიონულ სამსახურში გვითხრეს, რომ ბევრი დეტალი მათთვისაც უცნობია.
_ ბენეფიციარებისგან გროვდება კითხვები, პროგრამა დამტკიცებულია სამთავრობო დონეზე, თუმცა, პარლამენტში უნდა გაიაროს რამდენიმე მოსმენა. ამიტომ უმჯობესია, საზოგადოებასთან ურთიერთობის სამსახურს მიმართოთ, _ გვითხრეს სააგენტოს გურიის რეგიონულ სამსახურში.
„გურია ნიუსი“ სოფლისა და სოფლის მეურნეობის განვითარების სააგენტოს, საზოგადოებასთან ურთიერთობის სამსახურის ხელმძღვანელთან, გიორგი ავალიანთან დაკავშირებას არა ერთხელ ეცადა, თუმცა, უშედეგოდ _ მან ჩვენს არც ერთ სატელეფონო ზარს არ უპასუხა. ამ სამსახურიდან “გურია ნიუსისთვის“ წუხელ გამოგზავნილი ინფორმაცია კი სამინისტროს ვებგვერდზე განთავსებული ინფორმაციის იდენტურია და სიახლეს ან დეტალების განმარტებას არ შეიცავდა.
ამის შემდეგ სააგენტოს გურიის რეგიონულ სამსახურში გვირჩიეს „ცხელ ხაზზე“ დარეკვა, თუმცა, „ცხელი ხაზის“ „შესაშურ ოპერატიულობაზე“ ზემოთ უკვე გესაუბრეთ.
„გურია ნიუსი“ შპს „მექანიზატორის“ (დისლოკაციის ადგილი სოფელი მერია, ოზურგეთი) ხელმძღვანელ ბესიკ გოგიტიძეს ესაუბრა, რომელიც საკმაოდ აღელვებული ჩანდა.
მისგან მხოლოდ გულისტკივილი მოვისმინეთ არსებული მდგომარეობის გამო _ როცა გურიას მხოლოდ რვა ტრაქტორი გააჩნია: 4 _ ოზურგეთისთვის, 4 _ ლანჩხუთისთვის, ჩოხატაურისთვის კი _ არცერთი, ბუნებრივია, ხვნა-თესვა გადაუჭრელი პრობლემის წინაშე დადგება, ასევე, ეჭვის ქვეშ დადგება ახალი სახელმწიფო პროგრამის გახორციელებაც.
შპს „მექანიზატორს“ შარშანდლამდე 45 ტრაქტორი ჰყავდა და როგორც გურულები მწარედ ხუმრობენ , „უგზოუკვლოდ გაყიდეს“, სავარაუდოდ, კახეთში, აქაოდა, აქ ამდენი ტრაქტორის საჭიროება არ არსებობსო…
_ არ დაგიმალავთ, რომ მე გუშინ ვიყავი თბილისში _ შპს „ლოჯისტიკის და სერვისცენტრის კომპანიაში“. ახალ სახელმწიფო პროგრამასთან დაკავშირებით, ჩემთვის უფრო ინფორმაცია არ მოუწოდებიათ.
საკმაოდ დაძაბული საუბარი მქონდა _ ჩვენ გვყავს მხოლოდ რვა ტრაქტორი; ერთი გაფუჭებულია და უნდა გაკეთდეს. რემონტის გამკეთებელი ხელოსანიც არ მყავს. შეუძლებელია, 1 500 ჰა ფართობი 8 ტრაქტორით დაიხნას _ ეს ტექნიკა არანაირად სამყოფი არ არის.
მე ვითხოვდი დახმარებას, რაზეც პასუხი ვერ მივიღე. გეტყვით მარტივად: ადამიანი რომ მოვა და გთხოვს, საყანე ფართობი დამიხანიო, დახვნა-დაფარცხვა-დათესვისთვის უნდა გყავდეს გამზადებულ სამი ტრაქტორი. პირველი ოპერაციაა დისკიანი ფარცხით მუშაობა, მეორე _ თითებიანი ფარცხით, მესამე ოპერაცია კი სათესი აგრეგატით უნდა ჩატარდეს. როცა ტრაქტორები სამყოფად არ გყავს და მხოლოდ სამი გაგაჩნია, ერთს ერთხელ დისკი უნდა დაამაგრო, მერე მოხსნა და ფარცხი მიაბა, შემდეგ ფარცხი უნდა მოხსნა და სათესი აგრეგატი დაამაგრო… ეს არის წვალება და წამება, რითაც ამდენ ფართობს ვერანაირად ვერ გავწვდებით. ვიმეორებ, ეს ტექნიკა არანაირად არ არის საკმარისი გურიაში ამ პროგრამის გასახორციელებლად.
რა გითხრათ, არ მაქვს დაზუსტებული პასუხი და ვერ მოგატყუებთ, _ გვითხრა ბესიკ გოგიტიძემ.
„გურია ნიუსი“ აქტიურად მიადევნებს თვალს, როგორ განვითარდება მოვლენები და წარიმართება თუ არა ორგანიზებულად პროგრამის _ „ზრუნვა სოფელზე და ფერმერებზე“, გახორციელება. ჯერჯერობით, კი იმის თქმა შეგვიძლია, რომ გურიაში, სრული გაურკვევლობაა და ფერმერებისთვის ელემენტარული ინფორმაციის მიწოდებაც ვერ ხერხდება.
