სელის თესლით ორგანიზმის გაწმენდა ეფექტურ და სწრაფ მეთოდად ითვლება. ის ასევე გამოიყენება წონაში კლების ან კიდევ, წონის შენარჩუნების მიზნით. ნებისმიერი პროდუქტის მსგავსად, სელის თესლი სწორად უნდა მიირთვათ. ამიტომაც, მნიშვნელოვან ინფორმაციას გაგიზიარებთ, დღის რა მონაკვეთში ჯობს მისი მიღება და რასთან ერთად:
სელის თესლი 21-ე საუკუნეში სუპერპროდუქტად ითვლება, თუმცა 2000 წელზე მეტია, რაც მის შესახებაა ცნობილი. სელის თესლს საკმაოდ მდიდარი შემადგენლობა აქვს – 100გრ შეიცავს 20გრ ცილას, 27გრ დიეტურ ბოჭკოს, 42გრ ცხიმს. მისი კალორიული შემცველობა დაბალია – 40 კკალ ერთ სუფრის კოვზში. ასევე, იგი შეიცავს ისეთ მაკროელემენტებს, როგორებიცაა: კალციუმი, ფოსფორი, მაგნიუმი, ნატრიუმი, კალიუმი და მიკროელემენტებს: თუთია, მანგანუმი, რკინა, სპილენძი. სელის თესლი მდიდარია E, C, K, A, B ჯგუფის ვიტამინებით. შეიცავს ორგანულ მჟავებს, ფერმენტებს, ლიპიდებს და სხვა, ძალიან სასარგებლო ნივთიერებებს. მდიდარია ომეგა-3-ით, აქვს სამკურნალო თვისებები – ხელს უწყობს კუჭ-ნაწლავის ტრაქტის მუშაობას, ტოქსინების გამოდევნას, ნივთიერებათა ცვლის ნორმალიზებას, შაქრის დონის სტაბილიზაციას, ძვლოვანი ქსოვილის გაძლიერებას. სელის თესლს დადებითი გავლენა აქვს ქალის ჰორმონალურ ბალანსზე. იგი ზრდის კანის ელასტიკურობას და ანელებს დაბერების პროცესს. გარდა ამისა, გაძლევთ ხანგრძლივად დანაყრების შეგრძნებას, რაც ნიშნავს, რომ ზედმეტის ჭამა აღარ მოგინდებათ.
როგორ უწყობს ხელს სელის თესლი წონაში დაკლებას?
სელის თესლი დიდი რაოდენობით მცენარეულ ბოჭკოს შეიცავს, რაც შეუცვლელია წონის დაკლების პროცესში. კუჭში მოხვედრისას ბოჭკო ადიდებს და შთანთქავს ტოქსინებს, მავნე ქოლესტერინს, ამიაკს, ნაღვლის პიგმენტებს. შესაბამისად, წონის დაკლების პროცესი უფრო სწრაფი და უკეთესია. სელის თესლში შემავალი ბოჭკოების წყალობით ნორმალიზდება ნაწლავის მიკროფლორა. სელის თესლი ცნობილი საფაღარათო საშუალებაა, რომელიც ნაწლავის მუშაობას აუმჯობესებს.
როგორ გამოვიყენოთ სელის თესლი წონაში დასაკლებად?
წონის დასაკლებად სელის თესლს ნებისმიერი ფორმით მოიხმარენ. ჩვეულებრივ, რეკომენდებულია, მისი საკვებში დამატება. დღეში ორჯერ, 1 ჩაის კოვზი საკმარისია. გარდა ამისა, შეგიძლიათ გახსნათ 200 მლ წყალში და დალიოთ. ან კიდევ, 2 სუფრის კოვზ სელის თესლს დაასხით 1 სუფრის კოვზი მდუღარე წყალი და დატოვეთ რამდენიმე საათის განმავლობაში, სასურველია მთელი ღამით. ასეთ შემთხვევაში იგი გაღვივდება, ლორწოვან მასად გადაიქცევა, რაც შეგიძლიათ სალათებს, სმუზებსა და რძის პროდუქტებს დაუმატოთ და ისე მიირთვათ. წონაში დასაკლებად კარგ ეფექტს მისი უზმოზე მიღება იძლევა. საუზმემდე 30-40 წუთით ადრე უნდა გამოიყენოთ. მნიშვნელოვანია გვახსოვდეს, რომ სელის თესლის ყოველდღიური მიღება არ უნდა აღემატებოდეს 50 გრ-ს, ექიმები მის გამოყენებას 10 დღე გვირჩევენ, მომდევნო 10 დღე დასვენება და შემდეგ თუ სურვილი გექნებათ, ასე მონაცვლეობით გააგრძელეთ.
ვისთვის არ შეიძლება მიღება?
სანამ სელის თესლის სამკურნალო მიზნებისთვის მიღებას დაიწყებთ, უნდა მიმართოთ ოჯახის ექიმს ან გასტროენტეროლოგს. სელის თესლის გამოყენება არ არის რეკომენდებული, თუ არსებობს: პროდუქტის მიმართ ინდივიდუალური აუტანლობა, ალერგიული რეაქცია; ღვიძლის ქრონიკული დაავადება, როგორიცაა ჰეპატიტი; კუჭ-ნაწლავის ტრაქტის ზოგიერთი დარღვევა, როგორიცაა პანკრეატიტი და ქოლეცისტიტი, ნაწლავის გაუვალობა, კოლიტი მწვავე სტადიაში; ქვები თირკმელებში ან საშარდე გზებში, აგრეთვე ნაღვლის ბუშტში; ონკოლოგიური დაავადება. სელის თესლი დიდი სიფრთხილით უნდა მიირთვათ ორსულებმა, 12 წლამდე ბავშვებმა, რომლებსაც აწუხებთ ასთმა და ფარისებრი ჯირკვლის დაავადებები. სელის თესლის გადაჭარბებულმა მოხმარებამ შეიძლება გამოიწვიოს ყაბზობა ან დიარეა, მეტეორიზმი და სისხლის მიმოქცევის დარღვევა.
