საქართველოს კონსტიტუცია 1995 წლის 24 აგვისტოს იქნა მიღებული. ის განამტკიცებს ადამიანის საყოველთაოდ აღიარებულ უფლებებსა და თავისუფლებებს.
კონსტიტუციის მიღებიდან დღემდე საქართველოს სახელმწიფოს ძირითად კანონში არაერთი ცვლილება და დამატება გახორციელდა.
როგორც ცნობილია, პარლამენტში ინიცირებულია კანონპროექტი, რომლის მიხედვითაც ცვლილებები, შესაძლოა, კონსტიტუციის იმ თავში შევიდეს, რომელიც ადამიანის უფლებებს შეეხება.
რა ცვლილებებია მოსალოდნელი საქართველოს კონსტიტუციის მე-2 თავში და რა სახელდება ამ ცვლილებების მიზეზად _ამ საკითხზე „გურია ნიუსს“ „ახალგაზრდა ადვოკატების“ კონსტიტუციონალისტი, გიორგი ლაბაძე ესაუბრა.
ლაბაძის თქმით, ადამიანი კონსტიტუციური დაცვის ობიექტია, მიუხედავად იმისა, არის თუ არა ის, საქართველოს მოქალაქე.
„კონსტიტუციურად არსებობს ორგვარი უფლებები. ადამიანის უფლებები და მოქალაქეების უფლებები. მოქალაქეების უფლებები არის პოლიტიკურ-საზოგადოებრივი უფლებები. მაგალითად, პოლიტიკური პარტიის ჩამოყალიბება, საჯარო სამსახურში დასაქმება, რეფერენდუმში მონაწილეობის მიღება. ეს უფლებები არის პოლიტიკური უფლებები, რასაც ვერ გამოიყენებს ვერავინ, გარდა, საქართველოს მოქალაქისა. რაც შეეხება ადამიანის უფლებებს, ეს რეგულირდება კონსტიტუციის ფარგლებში. ყველა ადამიანის უფლება არის, რომ საკუთარი უფლებები დაიცვას. ის, რომ ადამიანის ყველა უფლება დაცული უნდა იყოს, მიუხედავად იმისა, მოქალაქეობა ექნება მას თუ არ ექნება, ადასტურებს კანონი საკონსტიტუციო სასამართლოს შესახებ. ეს კანონი განსაზღვრავს სასამართლოსთვის მიმართვის გზებს. 39-ე მუხლით რეგულირდება იმ პირთა წრე, რომელთაც შეუძლია იდავონ სასამართლოში. ეს პირთა წრე იყო, ადრე მხოლოდ საქართველოს მოქალაქეები, თუმცა 2010 წელს სასამართლომ თავად გააუქმა ეს ჩანაწერი და ახალი გადაწყვეტილებით დადგინდა, რომ ყველა ადამიანს, მიუხედავად მისი ეროვნების და საცხოვრებელი ადგილისა, შეუძლია, საკუთარი უფლებების დასაცავად მიმართოს საქართველოს საკონსტიტუციო სასამართლოს. ეს კიდევ ერთხელ მიანიშნებს იმაზე, რომ მიუხედავად მოქალაქეობისა, ადამიანი არის კონსტიტუციური დაცვის ობიექტი“, _ ამბობს ლაბაძე.
„ახალგაზრდა ადვოკატების“ კონსტიტუციონალისტის თქმით, საქართველოს მოქმედ კონსტიტუციას ადამიანის უფლებების შესახებ არსებულ თავში ხარვეზები აქვს, რისი გამოსწორებაც შესაძლებელია აპრილში მოხდეს.
„მოქმედი კონსტიტუციის მე-2 თავი იწყება საქართველოს მოქალაქეობის საკითხით, რაც სტრუქტურულად არის ხარვეზი და ახალი კონსტიტუციის რედაქციაში, რომელიც ინიცირებულია პარლამენტში და აპრილისთვის უნდა შევიდეს ძალაში, თუ მას უმრავლესობა მხარს დაუჭერს, უფლებების თავი დაიწყება ადამიანის პირადი ღირსებით“, _ ამბობს ლაბაძე და განმარტავს, რომ „კონსტიტუციის უფლებების თავი უნდა დაიწყოს პატივისა და ღირსების საკითხით, რადგან უფლების თავია. ახალი რედაქცია, რომელიც ინიცირებულია, მიისწრაფვის იმისკენ, რომ მისი მოქმედების სფერო ყველა ადამიანზე გავრცელდეს“.
