მიუხედავად იმისა, რომ ამ ხნის განმავლობაში იგი ყოფილი ხელისუფლების მისამართით საკმაოდ მწვავე განცხადებებით გამოირჩეოდა, სამსახურიდან არავის გაუთავისუფლებია. არც მაშინ, როდესაც 2009 წლის 9 აპრილის “ნაცმოძრაობის” საწინააღმდეგო აქციების დროს, რუსთაველზე გაშლილ კარავში იჯდა.
_ დამიბარა გამგებელმა და საყვედური მითხრა _ საჯარო სამსახურში მუშაობ და ოპოზიციის აქციაზე რა გინდაო. მაშინ შევახსენე, რომ მე მაქვს კონსტიტუციით განსაზღვრული უფლებები და არც მას და არც სხვას არა აქვს უფლება, აზრის გამოხატვის თავისუფლება შემიზღუდოს, _ იხსენებს 4 წლის წინანდელ მოვლენებს ჩვენთან საუბრისას ამირან ირემაძე.
მისივე თქმით, თანამდებობაზე მუშაობის განმავლობაში კანონი არც ერთხელ არ დაურღვევია. ამბობდა იმას, რასაც ფიქრობდა და როგორც ფიქრობს, ალბათ, ეს გახდა მიზეზი იმისა, რომ მუდმივ ოპოზიციონერს უწოდებენ.
ირემაძე ხშირად აპროტესტებდა ახალი ხელისუფლების ქმედებებსაც. სწორედ ამ ფაქტს უკავშირებს ჩოხატაურის მუნიციპალიტეტის გამგებლის მოვალეობის შემსრულებლის, თამაზ ჯინჭარაძის #832 ბრძანებას (1 ნოემბერი, 2013 წელი), რომლის თანახმად ირემაძე “სამსახურის თვითნებურად დატოვების გამო მიმდინარე წლის 28 ოქტომბრიდან გათავისუფლებული იქნა დაკავებული თანამდებობიდან”.
_ 27 ოქტომბერს ჩატარებული საპრეზიდენტო არჩევნები, საერთაშორისო დამკვირვებლებმა დემოკრატიულად ჩატარებულად ჩათვალეს და დამარცხებულმა პრეზიდენტობის კანდიდატებმა გამარჯვებულს გამარჯვება მიულოცეს. რაც დასტურია იმისა, რომ საქართველოში დემოკრატია სრულად არა, მაგრამ დამკვიდრდა. თუმცა, სულ სხვა ვითარებაა ჩოხატაურში, კერძოდ, სოფელ ზოტში. საარჩევნო კომისია და “ქართული ოცნების” საარჩევნო შტაბი სოფლის რწმუნებულმა მისი კაბინეტის მომდევნო ორ ოთახში განალაგა თვითნებურად. საარჩევნო კოდექსზე და ქვეყნის კონსტიტუციაზე ფეხის დადგმით და პრაქტიკულად მის მიერ გამოგონილი კანონებით დაიქვემდებარა საარჩევნო კომისია და შტაბიც. არჩევნებამდე 10 დღით ადრე, მანვე, მისი ხელით, მარგველაშვილის საარჩევნო შტაბის ოთახში გამოაკრა 70-მდე სოციალურად დაუცველი ოჯახის პირთა ბეჭედდასმული სია და მკაცრად გააფრთხილა შტაბის და კომისიის წევრები, დაიხმარეთ ყველა ის ამომრჩეველი, რომელიც იღებს სოციალურ დახმარებას. თუ ხმას არ მოგვცემენ, უთხარით, რომ ჩვენი დანიშნული და გაორმაგებულია და ჩვენვე მოვუხსნითო. ეს ფაქტი ხმამაღლა გავაპროტესტე _ რწმუნებულს არ ჰქონდა უფლება ეს გაეკეთებინა. შეშინებული და დაბეჩავებული ხალხი ტირილით ჩამოდიოდა კიბეებზე და ხმამაღლა მოთქვამდნენ, ღმერთს ვფიცავარ, თქვენ გაძლევთ ხმას, ოღონდ არ მოგვიხსნათ დახმარება, მშიერი დავიხოცებითო. გამგეობაშიც ვიყავი და ვთქვი, რომ კანონი ირღვეოდა, _ ამბობს ირემაძე.
ზოტის რწმუნებულის ყოფილი თანაშემწე სხვა დარღვევებზეც საუბრობს და აღნიშნავს, რომ ამ ყველაფრის გაპროტესტება გახდა მისი სამსახურიდან გათავისუფლების მიზეზი:
_ ვფიცავარ ზოტში არსებულ ორ სამლოცველოს, სრულ ჭეშმარიტებას გეუბნებით. არჩევნებამდე ორი დღით ადრე, საარჩევნო კომისიის წევრებმა საკუთარი ხელით დაწერეს გადასატანი ყუთის განცხადებები. მათ შორის ორი ამომრჩეველი ფსიქიკურად დაავადებული იყო. ასეთ ამბავს რომ შევესწარი, საარჩევნო კომისიას შევეწინააღმდეგე, განცხადება ვინ დაწერა,-მეთქი. კომისიის წევრებმა მიპასუხეს, დედამისი ჩააგდებს ბიულეტენს “ქართული ოცნების” სასარგებლოდ, ვინაიდან ფულს მთავრობა აძლევსო. რომ ვერაფრით დავიყოლიე კომისია, ტელეფონით დაურეკე ჩოხატაურის “ქართული ოცნების “შტაბის ხელმძღვანელს კუჭავას და პრობლემა მოგვარდა _ აღნიშნულ ორ ავადმყოფთან გადასატანი საარჩევნო ყუთი არ მიუტანიათ. არჩევნებზე, ჩემი სიძე ბურჯანაძის პარტიის დამკვირვებელი იყო ზოტში. ეს ფაქტები მანაც იცოდა და ამაზე მასაც ჰქონდა განცხადებები. სწორედ ეს გახდა მიზეზი, რომ გამგებელმა არჩევნების მეორე დღეს სამსახურიდან გამათავისუფლა, _ ამბობს ირემაძე.
ამირან ირემაძე ჯინჭარაძის ბრძანების გასაჩივრებას აპირებს და დარწმუნებულია, რომ სასამართლო მის სასარგებლო გადაწყვეტილებას გამოიტანს: _ აუცილებლად შევიტან სარჩელს სასამართლოში. სიძე არ არის ჩემი ოჯახის წევრი. მე რა შუაში ვიყავი? ეს იგივეა, სტალინის პერიოდში რომ დაიჭერდნენ პიროვნებას და შემდეგ მიაყოლებდნენ მის ბიძაშვილს, მამიდას. ღრმად ვარ დარწმუნებული ეს არაფერში სჭირდებოდა დღევანდელ ხელისუფლებას და მმართველ კოალიციას. ჩემზე გატარებული სასჯელი უკანონოა და სულ მალე თავისუფალი სასამართლო გამამართლებს. ბრძანებაში მიწერია, რომ ვითომ თვითნებურად დავტოვე სამსახური. ეს რომ სიცრუეა და გამოგონილი ჭორია, ზოტის მოსახლეობამ კარგად იცის. აქვე ერთ დავამატებ _ ზოტში ბატონმა მარგველაშვილმა აიღო ხმების 76%. იმას ზევით პროცენტობა ლეონიდ ბრეჟნევის ეპოქასთან მიგვიყვანს. საყოველთაოდ ცნობილია, რომ დედამიწაზე არ არსებობენ ბრძენი ერები და ასევე აბსოლუტურად ბრძენი პოლიტიკური პარტიები და ბრძენი პრეზიდენტობის კანდიდატები. ჩემი ქვეყნის კონსტიტუციაში არც ერთი პარტია არ წერია და არც მისი პრივილეგიის შესახებაა ნათქვამი არაფერი. ასეთი იყო საბჭოთა კონსტიტუციის მე-6 მუხლში _ კომუნისტური პარტია. ამიტომ დროა, ზოტის ამომრჩეველს მიეცეს უფლება, 21-ე საუკუნეში მისთვის მისაღები პარტია ან კანდიდატი აირჩიოს თავისუფლად. თორემ ერთ მშვენიერ დღეს ზოტის მართლაც და ნიჭითა და ზრდილობით დაჯილდოებული ხალხი, განსაკუთრებით ახალგაზრდობა, რკინის ღობეებს გადალეწავს, _ დასძენს ირემაძე, რომლის თქმით, იმ შემთხვევაში, თუკი სამართალს ვერ იპოვის, პროტესტის უკიდურეს ფორმას მიმართავს და თბილისში, რუსთაველზე თავს დაიწვავს.
ჩოხატაურის მუნიციპალიტეტის გამგებლის მოვალეობის შემსრულებელი, თამაზ ჯინჭარაძე ამბობს, რომ ირემაძის გათავისუფლებას პოლიტიკასთან კავშირი არ აქვს:
_ სამსახურში არ დადიოდა და ამის გამო გათავისუფლდა. 5 დღის გაცდენა საკმარისია იმისთვის, რომ პირი სამსახურიდან გაუშვა, _ ამბობს ჯინჭარაძე.
_ ბატონო თამაზ, გათავისუფლებამდე, მაგალითად, სამი დღის გაცდენის შემდეგ გაფრთხილება თუ მიეცით?
_ რად უნდა გაფრთხილება? ისედაც ვიცოდი და რწმუნებულმაც განცხადებით მომმართა, რომ არ დადიოდა. ავტომატურად მოხდა ეს ყველაფერი.
_ თავად ირემაძე ამ ფაქტს პოლიტიკას უკავშირებს და ამბობს, რომ თანამდებობიდან მისი გათავისუფლება კონკრეტული შეცდომების ხმამაღლა მითითებას და მისი სიძის მიერ ბურჯანაძის მხარდაჭერას მოყვა.
_ არაფერ შუაში არ არის ეგ. თვითონ რას ლაპარაკობს, არ ვიცი, მაგრამ ჩემთან რომ შემოვიდა, ვუთხარი, თანამდებობიდან ვათავისუფლებდი იმის გამო, რომ სამსახურში არ დადიოდა და არა პოლიტიკური აქტიურობიდან გამომდინარე, რადგან ჩემთვის მნიშვნელობა არ აქვს, ბურჯანაძესთან იქნება თუ სხვა პარტიასთან. საერთოდ, პარტიულ საქმიანობაში არ ვერევი. იმიტომ გავათავისუფლე, რომ სამსახურში არ დადიოდა. სხვათა შორის, რომ შემოვიდა ჩემთან, ისიც კი მითხრა გაზეთში უნდა დავწერო შენი სიტყვები, ისეთი კარგი შეხვედრა გამართე ზოტში და ისე მიმართე მოსახლეობასო. ახლა კი, როცა საქმე საქმეზე დგება, ამ ადამიანის ყველანაირი აზრი სუბიექტურია.
_ ესე იგი, პოლიტიკური ნიშნით არ გაგითავისუფლებიათ?
_ არა. რა სისულელეა. პოლიტიკური გადაწყვეტილება რომ მიმეღო, რა პრობლემა იყო, მაგრამ როდის მიმიღია მსგავსი გადაწყვეტილებები?! გამორიცხულია. ზოტში როცა ავედი, მოსახლეობას ვუთხარი _ არ აქვს მნიშვნელობა რამდენ პროცენტს აიღებს მარგველაშვილი. მე მაინც გავაკეთებ იმას, რაც მევალება,-მეთქი, _ აღნიშნა ჯინჭარაძემ ჩვენთან საუბრისას.
ახალგაზრდა იურისტთა ასოციაციის ოზურგეთის ოფისის ხელმძღვანელი, თამაზ ტრაპაიძე ამბობს, რომ გამგებელს კანონი არ დაურღვევია: “საჯარო სამსახურის შესახებ კანონის 99-ე მუხლის მე-4 პუნქტის თანახმად: მოხელე, რომელიც თვითნებურად (5 დღეზე მეტი ხნით) მიატოვებს სამსახურს, განთავისუფლებულად ჩაითვლება სამსახურის თვითნებური დატოვების მეორე სამუშაო დღიდან. ამდენად სამართლებრივად შესაძლებელი იყო, გაეთავისუფლებინათ საჯარო მოხელე აღნიშნული მუხლის საფუძველზე. რაც შეეხება სტატიაში მოყვანილ სხვა დარღვევებს, იგი სხვა დავის საგანს წარმოადგენს და სამართლებრივად მათზე აპელირება სწორი არ იქნება”, _ გვითხრა ტრაპაიძემ.
