საარჩევნო და პოლიტიკური ტექნოლოგიების კვლევითი ცენტრის დირექტორი, კახი კახიშვილი ამბობს, რომ სამართლიანი იქნება, თუ ნარმანია გადადგება დაკავებული თანამდებობიდან და ისე მოემზადება არჩევნებისთვის.
_ პირადად დავით ნარმანიას საწინააღმდეგო არაფერი მაქვს, წესიერი და კვალიფიციური ადამიანია, მაგრამ შემოგთავაზებთ ჩემს მოკრძალებული აზრს მერობის კანდიდატის დასახელების შესახებ: არჩევნები დანიშნული არ არის, საქართველოს საარჩევნო კოდექსის 165 მუხლის მე-3 პუნქტის შესაბამისად, ქ. თბილისის მერის არჩევნებს ნიშნავს საქართველოს პრეზიდენტი საქართველოს პრემიერ-მინისტრის კონტრასიგნაციით, თბილისის მერის უფლებამოსილების ვადის გასვლამდე არაუგვიანეს 60 დღისა. არჩევნების თარიღის დანიშვნის გარეშე, მერობის კანდიდატად წარმოგვიდგინეს მოქმედი მინისტრი, რომელიც არჩევნების დანიშვნამდე, მინისტრის რანგში წარმართავს საარჩევნო კამპანიას. საქართველოს საარჩევნო კოდექსის 167 მუხლის მე-3 პუნქტის შესაბამისად, თბილისის მერობის კანდიდატის სტატუსის შეუთავსებლობა თანადებობრივ მდგომარეობასთან განისაზღვრება ამავე კოდექსის 136 მუხლით დადგენილი წესით, ხოლო 136 მუხლში წერია, რომ საკრებულოს წევრობის ან მერობის კანდიდატად დასახელების შემთხვევაში თანამდებობრივი უფლებამოსილება უწყდებათ მინისტრებს (136 მუხლის, 1 პუნქტის, ბ – ქვეპუნქტი ). გასაგებია, რომ ოპონენტი განმარტავს, რომ კოალიციამ წარმოადგინა მერობის კანდიდატი, მაგრამ არჩევნები არ არის დანიშნული, ის არ არის რეგისტრირებული საარჩევნო სუბიექტად და ამიტომ მასზე არ ვრცელდება საარჩევნო კოდექსის აკრძალვები (ამას მუდმივად აცხადებდა ერთიანი ნაციონალური მოძრაობა, რაც ამ კოდექსით ნამდვილად ასეა, მაგრამ არასამართლიანი). ამავდროულად დე-ფაქტო, ამ კანდიდატს უკვე აქვს გაცხადებული საარჩევნო პოლიტიკური მიზნები და შესაბამისად, დე ფაქტო ის უკვე თავისთავად ჩაერთვება საარჩევნო კამპანიაში. აღსანიშნავია, რომ ვინაიდან, არჩევნების თარიღი ცნობილი არ არის, სხვა კანდიდატებს საარჩევნო კამპანიაში მონაწილეობის საშუალება არ აქვთ. მესმის, რომ ძალიან მომგებიანია, როდესაც მოქმედი მინისტრი, მინისტრის ამპლუაში, სახელმწიფო ბიუჯეტის ხარჯზე, სამსახურებრივი მანქანის, საწვავის და სხვა პრივილეგიების გამოყენებით მზრუნველი მინისტრის ამპლუაში გამართავს შეხვედრებს მოსახლეობასთან, მის საქმიანობას აქტიურად გააშუქებს მედია, მაგრამ რამდენად სამართლიანი იქნება აღნიშნული, რთული მისახვედრი არ არის. ჩემი აზრით, ასეთ შემთხვევაში, იკვეთება არათანაბარი გარემო. თუ კოალიციამ შეარჩია კანდიდატი, ბუნებრივია სამართლიანი იქნება, თუ ეს კანდიდატი გადადგება დაკავებული თანამდებობიდან და ისე მოემზადება არჩევნებისთვის. ახლა, რაც შეეხება იმას, რომ მერი არ არის პოლიტიკური თანამდებობის პირი და მხოლოდ მეურვეა. საქართველოს საარჩევნო კოდექსის მე 2 მუხლის, “ხ” ქვეპუნქტის შესაბამისად, პოლიტიკური თანამდებობის პირები არიან: საქართველოს პრეზიდენტი, პარლამენტის წევრი, პრემიერ-მინისტრი, მთავრობის სხვა წევრები და მათი მოადგილეები, ადგილობრივი თვითმმართველობის წარმომადგენლობითი ორგანოს წევრი და აღმასრულებელი ორგანოს ხელმძღვანელი, გუბერნატორები, აფხაზეთის და აჭარის ავტონომიური რესპუბლიკების უმაღლესი საბჭოს წევრები და მთავრობის ხელმძღვანელები. (კოდექსი ჩემი დაწერილი არ არის, თუ ვინმე სხვანაირად თვლიდა, ეს მუხლი უნდა ამოეღოთ) აქედან გამომდინარე, უნდა ეს ვინმეს, თუ არ უნდა, ქალაქ თბილისის მერი – არის პოლიტიკური თანამდებობის პირი. სხვა საკითხია, რომ მერიაში შექმნილია სამსახურები, რომელთა უფლებამოსილების ფარგლებში შედის ქალაქზე ზრუნვა და კეთილმოწყობა. ბუნებრივია, ბატონ ბიძინა ივანიშვილს, მოქმედ პრემიერს და კოალიციის ლიდერებს საარჩევნო კანონის ნიუანსების ცოდნა არ ევალებათ, არც არის საჭირო, მაგრამ მრჩევლებს და სპეციალისტებს, ხომ შეეძლოთ ამ ყველაფრის ახსნა. ამავდროულად, იმედს ვიტოვებ, რომ თვითმმართველობის არჩევნებამდე, საქართველოს პარლამენტი იზრუნებს და შეცვლის საარჩევნო კომისიების დაკომპლექტების წესებს , ადმინისტრაციული რესურსის გამოყენების მუხლებს, მერის არჩევისთვის 30% ბარიერს აწევს 50% -მდე და ასე შემდეგ, ხოლო საქართველოს იუსტიციის სამინისტრო უზრუნველყოფს ნორმალურ საარჩევნო სიას, ასეთ შემთხვევაში ნამდვილად ჩატარდება, კარგი არჩევნები, _ აღნიშნავს კახიშვილი.
