ჩოხატაურელები რამდენიმე წელია, კულტურის სახლის აშენებას ითხოვენ. ეს თემა განსაკუთრებით აქტუალური არჩევნების წინ ხდება. ჯერ კიდევ "ნაციონალური მოძრაობის" დროს არსებობდა დაპირება და პროექტი, რომ ჩოხატაურს კულტურის სახლი ექნებოდა, თუმცა, ახალმა ხელისუფლებამ ძველი პროექტი დაიწუნა და მხარი ახალს დაუჭირა.
ჩოხატაურის მუნიციპალიტეტის წინა მოწვევის საკრებულოს 2013 წლის 20 ივნისის #169 ბრძანების საფუძველზე შექმნილმა კომისიამ, რომელშიც 35 წევრი იყო, გამარჯვებული ესკიზი გამოავლინა. გამოცხადებულ კონკურსში სამი პირი მონაწილეობდა _ შპს "იერი", შპს "არქილიგა", და ი.მ. გიორგი კვიწინაშვილი.
ხმათა უმრავლესობით, შპს "არქილიგის" პროექტმა გაიმარჯვა და როგორც მაშინ მაჟორიტარმა დეპუტატმა, თემურ ჭკუასელმა განაცხადა, მშენებლობა რამდენიმე დღეში დაიწყებოდა.
თუმცა, რამდენიმე დღე რამდენიმე თვედ იქცა. საბოლოდ, ტენდერი მიმდინარე წლის 16 ივნისს გამოცხადდა. შესყიდვის სავარაუდო ღირებულებად 2 076 000.00 ლარი იყო მითითებული. ტენდერში მონაწილეობა ექვსმა კომპანიამ მიიღო. გამარჯვებულად შპს NBG დასახელდა, რომელმაც სამუშაოების გახორციელებაზე პასუხისმგებლობა 1 740 000.00 ლარად აიღო. როგორც ირკვევა, გამარჯვებული კომპანია არა მისი საქმიანობით, არამედ შეთავაზებული ფასით (მონაწილეთაგან ყველაზე დაბალით), გამოვლინდა.
დეპუტატი თემურ ჭკუასელი, რომლის ნახვაც ჩოხატაურში იშვიათობას წარმოადგენს, ჯერ კიდევ ტენდერის გამოცხადებამდე, 2 ივნისს, "გურია ნიუსთან” საუბრისას ამბობდა, რომ კულტურის სახლის მშენებლობის დაწყება მისი დამსახურებაა.
" მალე ჩამოვა ტექნიკა და რამდენიმე დღეში დაიწყება კულტურის სახლის მშენებლობა.
_ კულტურის სახლის აშენების საკითხზე წინა ხელისუფლებამაც აქტიურად იმუშავა….
_ ვერ დაგეთანხმებით, იმიტომ, რომ მაშინ ეს იყო ბლეფი. არაფრის აშენებას არ აპირებდნენ, საერთოდ არ იყო ეს გათვალისწინებული.
_ პროექტი პირადად მაქვს ნანახი...
_ მე მოვიკითხე ის პროექტი და მხოლოდ ფოტო მაჩვენეს… არანაირი პროექტი არ არსებობს, სურათია მარტო. ხადურთან მაგაზე მქონდა უზარმაზარი შეხლა-შემოხლა.
_ ხადურს არ უნდოდა, რომ ჩოხატაურში კულტურის სახლი აშენებულიყო?
_ ხადური არის ფინანსთა მინისტრი და ერთი თეთრის მოცემა არ უნდა შენთვის. შემდეგ პირდაპირ მითხრა ხარჯთაღრიცხვა მომეციო. წარმოიდგინეთ _ მე, რომელსაც ამ სფეროსთან შეხება არ მაქვს, იმავე დღეს მივუტანე პროექტი მინისტრს", _ ამბობდა ჭკუასელი არჩევნების წინ "გურია ნიუსთან" საუბრისას.
ჭკუასელის ხადურთან "უზარმაზარი შეხლა-შემოხლის" შედეგი 2014 წლის 16 ივლისს ფურცელზე გაფორმდა. სწორედ ამ დღეს მოეწერა ხელი ხელშეკრულებას.
ხელშეკრულების ღირებულება 1 661 912 (ერთი მილიონ ექვსას სამოცდაერთიათას ცხაას თორმეტი) ლარია.
ამავე დოკუმენტის თანახმად, კომპანიას 25 დეკემბრამდე 1 მილიონი ლარის სამუშაოები აქვს შესასრულებელი. მეორე ეტაპი კი 2015 წლის 1 იანვრიდან 2015 წლის 25 დეკემბრის ჩათვლით არის განსაზღვრული.
მომწოდებელს აღებული აქვს ვალდებულება, რომ სამუშაოები შეთანხმებული გრაფიკის შესაბამისად შეასრულოს,
თუმცა, როგორც ირკვევა, ვალდებულებები შეუსრულებელია.
NBG ჩარიცხული 300 ათასი ლარიდან მხოლოდ 50 ათასი ლარის სამუშაოები აქვს შესრულებელი, რაც მხოლოდ საძირკვლის გათხრით არის შემოფარგლული.
იმის გარკვევა, თუ რატომ არ გრძელდება სამუშაოები და რატომ არღვევს კომპანია ვალდებულებებს შეუძლებელი აღმოჩნდა. კომპანიის ვებ გვერდი არ მუშაობს. არც მითითებული ტელეფონის ნომრებია სწორი.
როგორც გავარკვიეთ, კომპანიის მფლობელი მურად ენდელაძეა. მისი წარმომადგენელი და ასპროცენტიანი წილის მმართველი კი ნუგზარ ენდელაძეა.
აღნიშნულ პირებს NBG-მდე სხვა კომპანია _ ბაღდათრემშენი ჰქონდათ, რომელსაც ყველაზე მეტი სამუშაო 2010-2012 წლებში აქვს შესრულებული. ბაღდათრემშენს, წლების წინ სხვადასხვა კომპანიები სახელმწიფო შესყიდვების სააგენტოშიც უჩიოდნენ. მაგალითად, 2012 წლის 17 თებერვალს შპს"დ.გ.ევროკომპანიმ" საჩივარში მიუთითა, რომ ტენდერი, სადაც ბაღდათრემშენმა გაიმარჯვა, სწორად არ ჩატარდა.
_ მივიღეთ მონაწილეობა ტენდერში სპა 120003240, სადაც, ჩვენი აზრით, არასწორად მოხდა გამარჯვებულის გამოვლენა. შემსყიდველს მოთხოვნაში მითითებული ჰქონდა, რომ პრეტენდენტს შესრულებული უნდა ჰქონოდა ბოლო ორი წლის განმავლობაში გახორციელებული, მინიმუმ, ერთი პროექტი არა ნაკლებ 500 000 (ხუთასი ათასი) ლარის ღირებულების, რაც შპს "ბაღდათრემშენს"არ გააჩნია. აქედან გამომდინარე, მოვითხოვთ შპს "ბაღდათრემშენის"დისკვალიფიკაციას, _ აღნიშნული იყო საჩივარში, რომელიც შესყიდვების სააგენტომ არ დააკმაყოფილა.
როგორც "გურია ნიუსმა" გაარკვია, NBG დღესაც აქტიურად იგებს ტენდერებს, რასაც, როგორც გვეუბნებიან, მის მიერ შეთავაზებული დაბალი ფასი განაპირობებს:
_ ერთგვარი კარუსელია. ამ კომპანიას ექნება ბევრი დაუსრულებელი სამუშაო. იღებს ახალს, აიღებს ფულს, დაამთავრებს იმ თანხით ძველს, მერე იწყებს სხვას და ასე გრძელდება. სამწუხაროდ, მსგავსი კომპანიების გამო, ნორმალური კომპანიები მუშაობას ვერ ახერხებენ, _ აღნიშნა ჩვენთან საუბარისას ერთ-ერთი მსხვილი სამშენებლო კომპანიის დირექტორმა.
ჩოხატაურის მუნიციპალიტეტის გამგებელი, ირაკლი კუჭავა ამბობს, რომ ამ საკითხზე აქტიურად მუშაობენ:
_ პრობლემები ნამდვილადაა. არ გამოვრიცხავ, რომ ტენდერში გამარჯვებულ კომპანიასთან ხელშეკრულება შევწყვიტოთ კანონით გათვალისწინებულ ფარგლებში, _ გვითხრა კუჭავამ.
ხელშეკრულებაში კი, რომელიც უკვე დარღვეულია შემსრულებლის მხრიდან, გარკვევით წერია, რომ შემსრულებელი ვალდებულია, სამუშაოები განახორციელოს შეთანხმებული გრაფიკის შესაბამისად. ეს გრაფიკი კი ამ ეტაპისთვის 300 000 ლარის უკვე შესრულებულ სამუშაოს ითვალისწინებს. შესაბამისად, ხელშეკრულების თანახმად, შემსყიდველს უფლება აქვს, შეწყვიტოს ხელშეკრულება თუ პირობები დარღვეულია.
როგორც კუჭავამ გვითხრა, კომპანიის წარმომადგენლებთან შეხვედრა ამ კვირაში მოხდება და დეტალები ამის შემდეგ გაირკვევა.
აღსანიშნავია ისიც, რომ მშენებლობის ზედამხედველი, ცოტა ხნის წინ პოლიციისთვის გაწეული წინააღმდეგობისა და შეურაცხყოფისთვის დააპატიმრეს.
"გურია ნიუსი" ამ თემაზე მოკვლევას აგრძელებს.
