15 ნოემბერს, თბილისში, "ნაციონალური მოძრაობის" აქციას, როგორც მთლიანად ქვეყანაში, არაერთგვაროვანი გამოძახილი მოჰყვა ლანჩხუთშიც. ხელისუფლება და საზოგადოების ნაწილი მიიჩნევს, რომ ეს იყო წმინდა პარტიული თავშეყრა, ზოგის აზრით კი, აქცია ემსახურებოდა ქვეყნის ერთიანობის დემონსტრირებას, მიუხედავად პარტიული კუთვნილებისა და პოლიტიკურ აზრთა სხვადასხვაობისა.
ნაციონალური მოძრაობის რაიონული ორგანიზაციის თავკაცი კახა ასკურავა: "15 ნოემბრის აქციის ლოზუნგის მიზანი და სულისკვეთება ერთი თვით ადრე იყო დაანონსებული და 
ერთადერთ რამეს _ რუსეთის მიერ ჩვენი ტერიტორიების ანექსიის გაპროტესტებას ემსახურებოდა. ხელისუფლებისა და მათი მხარდამჭერების მიერ გამოთქმულ მოსაზრებაზე, რომ ეს იყო წმინდა პარტიული აქცია, ერთი რამის თქმა შემიძლია მხოლოდ _ როცა გინდა იპოვო რაიმე მიზეზი, მას აუცილებლად გამონახავ, მით უმეტეს, ქვეყანაში ამის საკმაოდ ბევრი სპეციალისტი გვყავს.
ჩვენი ორგანიზაციის მიერ ჩატარებული 15 ნოემბრის აქცია იყო საქართველოს ერთიანობისკენ მოწოდებული. მთავარია, რომ მიზანი მიღწეულია, ტელეკომპანია BBC-იმ საკმაოდ ვრცელი სიუჟეტი მიუძღვნა 15 ნოემბრის აქციას, მაშინ, როცა ჩვენი ხელისუფლება "დაყრუებულია" და თივაში ასანთს მალავს.
ჩვენ ამ აქციით წითელი ბარათი ვაჩვენეთ ცენტრალური ხელისუფლების საგარეო პოლიტიკას. გამუდმებით გვესმის განცხადებები, რომ რუსეთთან და პუტინთან ურთიერთობებს ვალაგებთ, თუმცა, დალაგებულს ვერაფერს ვხედავთ. ამ მხრივ, ქულების ჩაწერა სურთ, რომ რუსეთში საქართველოდან რამდენიმე სახეობის პროდუქცია შედის. თუმცა, "ოცნების" მთავრობის დამსახურებად ნუ ჩავთვლით ამას და მოსახლეობასაც შეცდომაში ნუ შევიყვანთ _ რუსეთს ეს ვალდებულება საერთაშორისო სავაჭრო ორგანიზაციის წინაშე აქვს აღებული, ჩვენი ორგანიზაციაში გაწევრიანების მხარდაჭერის სანაცვლოდ.
რაც შეეხება ადგილობრივ ხელისუფლებას, ადგილზე მათ რაიმე გადამჭრელი ზომების მიღება არ შეუძლიათ. თუმცა, ჩემს მეგობრებს მინდა მოვუწოდო, რომ ნუ ლობირებენ მოღალატეობრივ პოლიტიკას, რომელსაც ივანიშვილი ახორციელებს სახელმწიფოს წინააღმდეგ.
ლანჩხუთის მუნიციპალიტეტის საკრებულოს თავმჯდომარის მოადგილემ გელა კილაძემ ასე ჩამოაყალიბა საკუთარი მოსაზრება: "ჩემი თვალსაზრისით, 15 ნოემბრის აქცია იყო წმინდა პარტიული შეკრება, "ნაცებმა" საკუთარი ძალები შეამოწმეს. ისინი ყველანაირად ცდილობენ, მოახდინონ საკუთარი თავის რეაბილიტაცია, თუმცა, არ გამოუვათ. ვთვლი, რომ "ნაციონალებს" არანაირი მორალური უფლება არ აქვთ, ისაუბრონ ქვეყნის ერთიანობაზე და მით უმეტეს, ვინმეს მოუწოდონ მისი დაცვისკენ".
ლანჩხუთელი მერი პაპუაშვილი: "არანაირი პარტიული ინტერესი არ შეიძლება დაინახო მოწოდებაში _ "არა ანექსიას". ისეთი პატრა ქვეყნისთვის, როგორიც საქართველოა, არ არის კარგი პარტიულ ჯგუფებად დაყოფა, მით უმეტეს, როცა მტერზეა საუბარი. მტრის წინაშე ყველა ერთად უნდა დავდგეთ, უნდა დავივიწყოთ წყენა და ამბიციები. თუ ერთად არ ვიქნებით, ადვილადაც მოგვერევიან. ყველაზე მეტად რუსეთს აძლევს ხელს ჩვენი შიდა დაპირისპირება და გაუტანლობა".
