"საქართველოს მოსამართლეთა ერთობამ" წარმოადგინა დოკუმენტი, რომელიც მოსამართლეთა დისციპლინური პასუხისმგებლობის საკითხს ეხება.
აღნიშნული პოლიტიკის დოკუმენტის მიზანია, ჩამოაყალიბოს ეფექტური და მკაფიო რეკომენდაციები, რათა სამომავლოდ დისციპლინური სამართალწარმოების სამართლებრივი საკითხები იყოს მეტად გამჭვირვალე, ევროპულ სტანდარტებტან მისადაგებული.
ორგანიზაციამ ყურადღება გაამახვილა შემდეგ ძირითად საკითხებზე: დისციპლინური წარმოების დახურული პროცედურები; ვადები; საფუძვლები და კანონის ბუნდოვანება; სამოსამართლო ეთიკისა და დისციპლინური პასუხისმგებლობის ურთიერთმიმართება; დისციპლინურ დარღვევათა პრევენცია და სადისციპლინო ორგანოს ანგარიშვალდებულება.
"საქართველოს მოსამართლეთა ერთობა" აღნიშნული პრობლემების აღმოფხვრის მიზნით წარმოადგენს შემდეგ რეკომენდაციებს:
· დისციპლინური სამართალწარმოება უნდა იყოს საჯარო, თუ მოსამართლეს მიაჩნია, რომ მისი უფლებები ირღვევა.
· დისციპლინური ორგანო უნდა იყოს ანგარიშვალდებული საზოგადოების წინაშე და უნდა ხდებოდეს დისციპლინური საქმეების განზოგადება, პრობლემების წარმოჩენა და მოსამართლეებთან მათი მიტანა.
· მოსამართლის დისციპლინური პასუხისმგებლობა უნდა დადგეს მხოლოდ სერიოზული დარღვევების დროს და იმგვარი პროცედურით, რომ უპირატესობა მიენიჭოს სასამართლო დამოუკიდებლობას.
·კანონმდებლობა უნდა აყალიბებდეს სერიოზული დისციპლინური დარღვევების სამაგალითო ჩამონათვალს, რომლის ჩადენისთვის მოსალოდნელია მოსამართლის გათავისუფლება ან მკაცრი დისციპლინური სანქცია.
·საქმის განხილვის საპროცესო ვადები უნდა გადაიხედოს და გაიზარდოს მისი კვალიფიციური შესწავლის შედეგად. დისციპლინური დარღვევები შეძლებისდაგვარად უნდა გაიმიჯნოს ეთიკის ნორმების დარღვევებისაგან. იმგვარად, რომ ეთიკის ნორმები გახდეს მოსამართლეების მიზანი, რომლისკენაც ისინი უნდა მიისწრაფოდნენ.
·უნდა დაინერგოს მოსამართლეთა საქმიანობის პერიოდული შეფასების სისტემა თავად მოსამართლეთა მიერ, რომელსაც ექნება სარეკომენდაციო ხასიათი და შეფასების შედეგები თავად მოსამართლესთან იქნება განხილული.
·დისციპლინურ საკითხებზე უნდა მოეწყოს მოსამართლეთა სწავლებები, სადაც სადისციპლინო კოლეგიის წევრებთან ერთად იქნება განხილული და განზოგადებული არსებული საქმეები კონფიდენციალობის დაცვით.
