“ქართულ ოცნება” და ლანჩხუთიდან გაგზავნილი სიები

გავრცელებული ინფორმაციით, “ქართულ ოცნებაში” გარკვეული გაუგებრობების მიზეზი ლანჩხუთიდან გაგზავნილი სიებია. ამ სიაშია მოხვედრილი ის ადამიანები, რომლებზეც სურთ აქცენტის გაკეთება რეგიონში ბიძინა ივანიშვილის დასაყრდენებს. თუმცა, იგივეს არ ფიქრობენ “ქართული ოცნების” სათავო ოფისში. ამასთან დაკავშირებით სკანდალურ მასალას გაზეთი “ქრონიკა” ავრცელებს. წერილში ინკოგნიტო წყარო, რომელიც, სავარაუდოდ, გურულია, დეტალურად შიფრავს ივანიშვილის გუნდში “გურიასთან დაკავშირებული დაპირისპირების დეტალებს”:

_ რას წარმოადგენს ადიკო ივანიშვილი (ბიძინა ივანიშვილის ძმა. რედ.)?

_ არაფერს… ის იყო ჩვეულებრივი ადიკო ურეკში და თავისი ძმის წყალობით გაიკეთა სახელი. დღეს ყველა საკითხი მან რატომ უნდა გადაწყვიტოს გურიაში?! დღეს სერიოზულად არავინ არაფერს აკეთებს ივანიშვილისთვის ამ რეგიონში. აი, მამუკა არეშიძეს საერთოდ აღარ ეკითხებოდნენ. ერთმა ჩამოიტანა სია, გინდათ თუ არა, ეს ხალხი უნდა ჩავრთოთ საქმეშიო. სულ 8 კაცი ეწერა. ვკითხე, იცნობ ამ ადამიანებს-მეთქი? მე არა, ხალხი იცნობსო. ბიჭო, იქნებ, ადიკოს ატყუებენ, ან თვითონ ადიკო იტყუება,-მეთქი? კაი, ერთი, გაჩუმდი, ყველაფერი კარგად იქნებაო. საერთოდ, რომ იცოდეთ, “ნაციონალებს” ყველაზე დიდი გართულება აქვთ მაჟორიტარებზე, მაგათ ლანჩხუთში ჰყავთ გია თვალავაძე, ადგილიდან ვერ დაძრავენ ესენი, ძალიან კარგი სახელი აქვს ხალხში _ უამრავ ადამიანს ეხმარება. ზოგს ოპერაცია სჭირდება, ზოგს ისე უნდა დახმარება. ერთი სიტყვით, ძალიან ძნელია მაგასთან ბრძოლა. თვითონ ბიძინას მომხრეები ამბობენ, როგორ უნდა შევებრძოლოთ გიას, რა ნამუსითო? იცი, როგორი შთაბეჭდილება მრჩება? ივანიშვილის კოალიციას გადაწყვეტილი აქვს, როგორმე არჩევნებამდე მიიტანოს სული, რომ ფული არ დაკარგოს, მერე კი წავა ყველა თავისი გზით. ახლა მამუკა არეშიძემაც მიატოვა რეგიონები, მოიყვანეს ირაკლი ჩიქოვანი, ყველაფერი გაჩერდა. მამუკას რომ გაუშვებენ, დევდარიანს რომ გაუშვებენ, ვის ტოვებენ?

ამასთან დაკავშირებით გამოცემა “ქართული ოცნების” რეგიონული საკითხების აწ უკვე ყოფილი ხელმძღვანელის, მამუკა არეშიძის კომენტარსაც ავრცელებს:

_ მამუკა, რატომ წამოხვედი “ქართული ოცნებიდან”?

_ არა, არა, “ქართული ოცნებიდან” არ წამოვსულვარ, მე დავტოვე რეგიონების კოორდინატორის პოსტი. ეს ადრევე იყო ჩაფიქრებული და მიმდინარეობდა გადაბარება. მე “ქართულ ოცნებაში” ვრჩები, მაგრამ რეგიონებს აღარ ვუხელმძღვანელებ.

_ ვიცი, რომ ადიკო ივანიშვილი ერეოდა რეგიონებში, მუშაობის საშუალებას არ გაძლევდა და ამიტომ შეეშვი ამ საქმეს.

_ არა. ერეოდა,-მეთქი, ვერ გეტყვი, საერთოდ არ გამოჩენილა.

_ მამუკა, რაღაც წყენა იყო?

_ წყენა იყო, ამას მარტო შენ გეუბნები… ჩამოვიდა გურიიდან კაცი, ჩამოიტანა ადიკოს წერილი და გამომიცხადა, იქ მე უნდა ვიყოო. თვითონ ადიკოს არც დაურეკავს, არც დამლაპარაკებია. ჩვენ შორის დამთავრდა ყველაფერი.

_ შენსა და ადიკოს შორის დამთავრდა ყველაფერი?

_ კი, ჩემი მეგობარი იყო… მოვიდა კაცი იმისი სახელით, _ მე უნდა ვიყო “ქართული ოცნების” უფროსი ამ რეგიონშიო. კი, ბატონო, იყოს, მე რა გავაკეთო?

ჩვენ გვქონდა ინფორმაცია, რომ ლანჩხუთის მაჟორიტარად ივანიშვილის გუნდს შესაძლოა “უცნობი”, იგივე გია გაჩეჩილაძე დაესახელებინა. თუმცა, ამაზე შოუმენს უარი უთქვამს, ლანჩხუთში თუ წავალ მხოლოდ კონცერტისა და შოუს ჩასატარებლად, აბა, პოლიტიკაში მე რა მინდაო.

არსებული ინფორმაციით, ბიძინა ივანიშვილის გუნდის “ლანჩხუთურ საქმეებს” ამჟამად ნესტორ მგელაძე კურირებს. ყოველ შემთხვევაში, კულუარებში სწორედ მას ასახელებენ ადიკო ივანიშვილთან დაახლოებულ პირად. ბატონი ნესტორი გასულ საპარლამენტო არჩევნებზე კენჭს იყრიდა, მაგრამ ბოლო მომენტში კანდიდატურა მოხსნა. იგი ცნობილი ჟურნალისტის, ნატო ონიანის მეუღლეა და წარმოშობით აცანელია. მართალია, ადიკო ივანიშვილის კარზე ქალაქ ლანჩხუთის ყოფილი გამგებელს, სოსო ბოლქვაძეს ყველა დასახელებულზე მეტად მიესვლება, მაგრამ, როგორც წყარო ამბობს, ეს უკანასკნელი პოლიტიკაში ჩართვას არ აპირებს და სამშენებლო სფეროში რჩება.

ამ ეტაპზე კვლავაც გაურკვეველია, თუ ვინ უხელმძღვანელებს “ქართულ ოცნებას” ლანჩხუთში. დასახელებულია რამდენიმე გვარი, ამათგან რეალურად აფასებენ გია ქურიძის, ნესტორ მგელაძისა და იური მანთიძის კანდიდატურებს.

დასასრულ, კიდევ ერთი ინფორმაციაც: გავრცელებული, მაგრამ დაუდასტურებელი ცნობით, თვის დასაწყისში დაკავებული ოპოზიციონერის, მერაბ ქარჩავას ინტერესებს “ქართული ოცნების” მიერ დაქირავებული ადვოკატი დაიცავს. შეგახსენებთ, რომ ქარჩავა ნარკოტიკების აღმოჩენის ბრალდებით დააკავეს, თუმცა, ოპოზიციამ თავიდანვე ფაქტს პოლიტიკური სარჩული მისცა _ ცნობილია, რომ ოპოზიციონერი ბიძინა ივანიშვილის გუნდში მოიაზრებოდა და ამას გარდა, მისი სიძე პოლიტიკაში მოსული ბიზნესმენის დაცვაში მუშაობს.