დედაქალაქში საცობების პობლემის მოსაგვარებლად მერია უახლოეს მომავალში ცენტრალურ უბნებში შუქნიშნების დამონტაჟებას გეგმავს. თუმცა, არასამთავრობო ორგანიზაციების წარმომადგენელთა ნაწილი, რომლებიც აღნიშნული პრობლემის მოგვარებაზე წლებია მუშაობენ, ამას საკმარისად არ მიიჩნევენ და მერიას ალტერნატიულ გზებს სთავაზობენ.
"გურია ნიუსი" დაინტერესდა, საცობების წარმოქმნის რა ძირითადი მიზეზებია დედაქალაქში და რატომ ვერ ახერხებს მერია მის აღმოფხვრას.
შეგახსენებთ, რომ 26 მაისის, ჟვანიასა და სააკაძის მოედნებზე, პეკინის, კანდელაკისა და შარტავას ქუჩებზე, შარტავას ქუჩიდან 26 მაისის მოედნამდე კოსტავას ქუჩის მონაკვეთზე და მათ მიმდებარე ტერიტორიებზე მოძრაობის განტვირთვის მიზნით გასატარებელი ღონისძიებების შესახებ დასკვნა საერთაშორისო კომპანია "A+S Consult GmbH Forschung und Entwicklung"-მა მოამზადა. კვლევა მერიამ დაუკვეთა, რომელიც მიზნად სატრანსპორტო კვანძის საცობებისგან განტვირთვას ისახავს.
საერთაშორისო კომპანია "A+S Consult GmbH Forschung und Entwicklung"-ის დასკვნა აღნიშნულ ტერიტორიებზე სატრანსპორტო საშუალებების გამტარუნარიანობის გაუმჯობესების რამდენიმე ვარიანტს ითვალისწინებს.
"შემოთავზებულ ვარიანტებს შორისაა საგზაო მოძრაობის რეგულირება, ჭკვიანი შუქნიშნების დაყენება, კუნძულების შექმნა და ა.შ. ვფიქრობთ, ერთი ყველაზე ოპტიმალურია და არჩევანს მასზე შევაჩერებთ. შესაბამისად, მანამ, სანამ ჩვენ რაიმე ინფრასტრუქტურულ გადაწყვეტილებას მივიღებთ, სწორედ, ამ მოდელს გავითვალისწინებთ. ასევე, მინდა გითხრათ, რომ მხოლოდ ინფრასტრუქტურული განვითარება ქალაქში არსებული პრობლემის მოსაგვარებლად საკმარისი არ იქნება, ძალიან მნიშვნელოვანია განვითარდეს საზოგადოებრივი ტრანსპორტიც", _ განაცხადა ვიცე-მერმა ლაშა აბაშიძემ მას შემდეგ, რაც კვლევის შედეგები მოიმინა.
თუმცა, არასამთავრობო ორგანიზაციების ნაწილი ფირქობს, რომ დედაქალაქში არსებული მდგომარეობის მოსაგვარებლად ეს საკმარისი არ იქნება და მერიას ქალაქში მოძრაობის დასარეგულირებლად გეგმის შემუშავებას და საზოგადოებრივი ტრანსპორტის განვითარებას სთავაზობს.
ევროკავშირის, ტრასეკას პროექტის რეგიონალური კონსულტანტი, ორგანიზაცია "პარტნიორობა საგზაო უსაფრთხოებისთვის" დამფუძნებელი გელა კვაშილავა "გურია ნიუსთან" საუბრისას პრობლემის ძირითად მიზეზებს განმარტავს და მისი გადაჭრის გზებს გვთავაზობს:
"პირველი პრობლემა, რაც დედაქალაქში საცობებს ქმნის, ავტომობილების რიცხვის ზრდასთან ერთად სატრანსპორტო მოძრაობის ორგანიზების არასწორი ფორმაა. თბილისს პრაქტიკულად არა აქვს ტრანსპორტის მოძრაობის ორგანიზების გეგმა როგორც საზოგადოებრივი ტრანსპორტისთვის, ასევე კერძო ავტომობილებისთვისაც. აქცენტი არ კეთდება სატრანსპორტო ინფრასტრუქტურის დაგეგმვაზე, ამას ემატება ისიც, რომ ქალაქში პარკინგის პრობლემაა. თბილისში დაახლოებით, 450 ათასი ავტომობილია, თუმცა პარკინგი მხოლოდ 40 ათასისთვისაა. ვისაც სად უნდა იქ აჩერებს და ამის რეგულირება არ ხდება. ყველაფერი ერთად კი ქაოსს ქმნის.
ამასთანავე, საზოგადოებრივი ტრანსპორტის რაოდენობაც არ არის საკმარისი. დაახლოებით, 900-მდე ავტობუსი გვჭირდება დღეს კი 550-მდე მოძრაობს და მათი დიდი რაოდენობაც გაუმართავია, რის გამოც, დედაქალაქში გადაადგილება პრობლემურია. ჩვენი რეკომენდაციაა, განახლდეს ავტოსატრანსპორტო საშუალებების პარკი. საუბარია, რომ არსებულს 150-მდე ავტობუსი დაემატება, თუმცა საკმარისი ესეც არ იქნება. შეიძლება ავტობუსებისთვის შეიქმნას სწრაფი, დამოუკიდებელი ხაზები, სადაც მათ ხელს არავინ შეუშლით. დღეს ავტობუსებს გზაზე გადაადგილებისას უამრავი წინაღობა აქვთ, "მარშუტკების", ან სხვა ტიპის ტრანსპორტისგან. ამიტომ ავტობუსების მოძრაობა უნდა განვითარდეს. მოგვარდეს პარკინგის პრობლემაც.
გარდა ამისა, პრობლემას ქმნის ისიც, რომ ქალაქი ორ ნაწილადაა გაყოფილი. მარჯვენა სანაპიროზე ცხოვრობს 350 ათასი ადამიანი, მარცხენაზე კი, 850 ათასი. ამიტომ მარჯვენა სანაპიროზე მუდმივად იქმნება საცობების პრობლემა. ამის განტვირთვაც უნდა გახდეს. ტრანსპორტი ქალაქის დაგეგმარების მთავარი ნაწილი უნდა გახდეს. დღეს კი, ტრანსპორტი ქაოტურად ვითარდება, არ არის რეგულაციები, არ არის ველოტრანსპორტის განვითარების რაიმე გეგმა და ა.შ." _ აღნიშნავს კვაშილავა.
მისივე აზრით, განვითარება სამი ძირითადი მიმართულებით უნდა წავიდეს: კერძოდ, განვითარდეს საზოგადოებრივი ტრანსპორტი, მოწესრიგდეს პარკინგი, კანონმდებლობა, რომელიც ტაქსის მძღოლებს აიძულებს, კონკრეტულ ადგილებზე გააჩერონ და არა ყველგან.
გარდა ამისა კვაშილავას მიაჩნია, რომ გერმანელი ექსპერტების მიერ შეთავაზებული რეკომენდაცია რომ ქალაქს შუქნიშნები და უსაფრთხოების კუნძულები დაემატოს, პრობლემას ნაწილობრივ მოაგვარებს.
"მნიშვნელოვანია ქალაქში ახალი შუქნიშნები და უასფრთხოების კუნძულები გაჩნდეს. ეს მოძრაობას მოწესრიგებულს და უსაფრთხოს გახდის", _ ამბობს კვაშილავა, პეკინის ქუჩიდან კოსტავას მიმართულებით გვირაბის აშენების შეთავაზებას მიზანშეწონილად არ მიიჩნევს და ამბობს, რომ აღნიშნულ მონაკვეთზე მეტი მანქანის მოზიდვას გამოიწვევს.
" ექსპერტების ნაწილმა მერიას შესთავაზა, რომ აშენდეს გვირაბი, რაც არასწორად მიმაჩნია. ეს უფრო მეტ მანქანას მოიზიდავს. ჩვენ კი პირიქით, განტვირთვა გვინდა ამ მონაკვეთის. მით უმეტეს, რომ არ არსებობს გენერალური გეგმა მოძრაობის დარეგულირებისთვის, ქალაქში ასეთი ქირურგიული ჩარევები არ უნდა განხორციელდეს. მერია არც უჭერს მხარს ამ მიმართულებას", _ ამბობს კვაშილავა და დასძენს, რომ "ქალაქს დაახლოებით წელიწადნახევარში ექნება ის გეგმა, რაც მას სჭირდება. მერიაში შექმნილია უკვე საკონსულტაციო ჯგუფი, რომლის მუშაობაშიც არასამთავრობებიც მონაწილეობენ".
ორგანიზაცია "ალიანსი უსაფრთხო გზებისთვის" გამგეობის თავმჯდომარე ეკა ლალიაშვილი "გურია ნიუსთან საუბრისას აღნიშნავს, რომ "თბილისის მერია ცდილობს მარტივი და მოკლევადიანი ხედვები განახორციელოს ამ ეტაპზე. ეს ეფექტს მოგვცემს, თუმცა იმ ფონზე, რომ ყოველწლიურად იმატებს ავტომანქანების რაოდენობა, მხოლოდ შუქნიშნებით საცობების დარეგულირება გონივრული არ იქნება. თუმცა ეს ერთ-ერთი ალტერნატივაა".
" გარდა ამისა, გერმანელი ექსპერტებისა და არა მხოლოდ მათი, ყველა ექსპერტის რეკომენდაციაა თბილისის მერიისთვის, რომ განავითარონ საზოგადოებრივი სატრანსპორტო ქსელი. ამ კვლევამდე თბილისში იმყოფებოდნენ ირლანდიიდან, დუბლინიდან ჩამოსული ექსპერტები, რომლებმაც გვირჩიეს საცობების განტვირთვის გზები. პირველი, რაც მათ გვითხრეს იყო ის, რომ ტრამვაის ქსელი მოაწესრიგებდა მოძრაობას. იმის გამო, რომ დედაქალაქში არ არის მოწესრიგებული საზოგადოებრივი სატრანსპორტო საშუალებები, დღის წესრიგში დადგა ავტომანქანების შეძენის საკითხი, რამაც გაზარდა მარჯვენასაჭიანი ავტომობილების რაოდენობაც, რადგან ეს უფრო იაფია. ხალხს სჭირდება ალტერნატიული ტრანსპორტი, რადგან საზოგადოებრივი ტრანსპორტი ვერანაირად ვერ აკმაყოფილებს მოსახლეობის მოთხოვნას. 2 წელი გავიდა, რაც დედაქალაქის ეს ხელისუფლება მოვიდა და უფრო სწრაფი რეაგირებაა საჭირო. დროც აღარ გვრჩება, ჩვენ კი ამ ეტაპზე მხოლოდ კვლევებით შემოვიფარგლებით.
მერია გვეთანხმება, რომ მოსაწესრიგებელია საზოგადოებრივი ტრანსპორტი, თუმცა ჩვენ ამ დრომდე არ გვაქვს პასუხი, რატომ არ დაიძრა ეს პროცესი. შარშან გვესმოდა, რომ 150 ავტობუსი უნდა შემოეყვანათ, თუმცა, ამდენი თვეა ველოდებით. ეს 150 ავტობუსიც კი ვერაფერს უშველის არსებულ მდგომარეობას, იმდენად მოძველებულია ავტოპარკი თბილისში. ეს მხოლოდ შეავსებს ავტოპარკს და მდგომარეობას ვერანაირად ვერ გააუმჯობესებს. ჩვენ უფრო მასშტაბური მიდგომა და ინვესტიცია გვჭირდება პრობლემის მოსაგვარებლად", _ აღნიშნავს ლალიაშვილი.
გარდა ამისა, ექსპერტს მიაჩნია, რომ უნდა არსებობდეს ქალაქში მოძრაობის სისტემა და ამის ფარგლებში მთლიანი ინფრაქტრუქტურა დაიგეგმოს.
"კარგი იქნება, მერიამ სამოალაქო სექტორტანაც გაიაროს კონსულტაციები, სანამ დაგეგმავს მომდევნო წელს და დადვაცნოს თავისი გეგმები. ეს პრაქტიკა გააუმჯობესებს და გამჭვირვალეს გახდის მისი მოქმედების სტრატეგიას და შეკითხვებზე, თუ რა იგეგმება მერიის მიერ მომდევნო წლებში, საგზაო მოძრაობის უსაფრთხოების თვალსაზრისით, ყველასთვის ნათელი გახდება", _ აღნიშნავს ლალიაშვილი.
