სააფთიაქო ნარკომანიის პრობლემა საქართველოში ჯერ კიდევ აქტუალურია. დღეს არსებული ოფიციალური (დარეგისტრირებული) მონაცემების მიხედვით, საქართველოში 54 ათასი ინტრავენური ნარკომანი არსებობს. არაოფიციალურად, ალბათ, გაცილებით მეტი. ფინანსთა სამინისტროს ინფორმაციით, 2014 წლიდან 2016 წლის ჩათვლით, 36 აფთიაქში, სპეციალურ კონტროლს დაქვემდებარებული 14 590 866 ერთეული მედიკამენტი გაიყიდა ურეცეპტოდ.
2017 წელს უკანონო სამეწარმეო საქმიანობის გახორციელების ფაქტზე ფინანსთა სამინისტროს საგამოძიებო სამსახურმა, ქვეყნის მასშტაბით, 36 სხვადასხვა აფთიაქის 18 ხელმძღვანელ პირს წაუყენა ბრალი. აფთიაქის ხელმძღვანელებს, ჯამში, დაახლოებით, 15 მილიონი ლარის უკანონოდ მიღება ედებათ ბრალად. ბრალის დადასტურების შემთხვევაში, მათ 3-დან 5 წლამდე თავისუფლების აღკვეთა ემუქრებათ. აგეს თუ არა სამართლებრივად პასუხი კანონის დამრღვვმა პირებმა _ ამ კითხვით „გურია ნიუსმა“ ფინანსთა სამინისტროს საგამოძიებო სამსახურს მიმართა.
როგორც ,,გურია ნიუსთვის“ მოწოდებული ოფიციალური ინფორმაციით გახდა ცნობილი, საქართველოს ფინანსთა სამინისტროს საგამოძიებო სამსახურის წარმოებაში არსებულ სისხლის სამართლის საქმეებზე პასუხისგებაში მიცემულ პირთა უმრავლესობაზე გამამტყუნებელი განაჩენი დადგა. დანარჩენზე, მათი ინფორმაციით, გამოძიება ჯერ კიდევ მიმდინარეობს. ბუნებრივია, ჩვენ შევეცადეთ საქმესთან დაკავშრებით უფრო კონკრეტული ინფორმაციის მიღება, თუმცა დამატებითი ინფორმაციის გაცემისგან ფინანსთა სამინისტროს საგამოიებო სამსახურმა თავი შეიკავა.
,,უკანონო სამეწარმეო საქმიანობის ფაქტებზე, საქართველოს ფინანსთა სამინისტროს საგამოძიებო სამსახურის წარმოებაში არსებულ სისხლის სამართლის საქმეებზე პასუხისგებაში მიეცა 36 პირი (მათ შორის, 2017 წლის მაისში 18 პირი, რომლებიც უშუალოდ ხელმძღვანელობდნენ ქ. თბილისში მდებარე აფთიაქებს და ახდენდნენ სხვადასხვა დასახელების ფსიქოტროპული მედიკამენტების უკანონო რეალიზაციას). ბრალდებული პირების დიდი ნაწილის მიმართ თბილისის საქალაქო სასამართლოს მიერ გამოტანილია გამამტყუნებელი განაჩენი, ხოლო დანარჩენ პირებზე ამ ეტაპზე, მიმდინარეობს საქმის არსებითი განხილვა” , _ ნათქვამია ფინანსთა სამინისტროს საგამოძიებო სამსახურის მიერ მოწოდებულ განცხადებაში.
,,გურია ნიუსი“ სააფთიქო ნარკომანისთან დაკავშირებით არსებულ პრობელემებზე თამბაქოს კონტროლის ალიანსის თავმჯდომარის გიორგი ბახტურიძის ესაუბრა. მისი განცხადებით, საქართველოში სააფთიაქო ნარკომანია საფრთხის შემცველია.
,,კვლავ პრობლემად რჩება სააფთიაქო ნარკომანია. მდგომარეობა საქართველოში საკმაოდ რთულია, რასაც უამრავი ფაქტორი განაპირობებს. პირველ რიგში, აფთიაქებისთვის ის საჯარიმო სანქცია, რომელიც მოქმედებს, არ არის შემაკავებელი. ჯანსაღი ნარკოპოლიტიკის გახორციელება წარმოუდგენელი იქნება სააფთიაქო ნარკომანიის აღმოფხვრის გარეშე. მთავარია, პოლიტიკური ნება და მკაცრი კონტროლი, წინააღმდეგ შემთხვევაში, ვერანაირი ნარკოპოლიტიკა გვიშველის. პირველ ჯერზე, საჯარიმო სანქცია უნდა იყოს ძალიან მაღალი, გამეორების შემთხვევაში კი არ მხოლოდ ლიცენზია უნდა ჩამოერთვათ აფთიაქებს, არამედ ხელმძღვნელმა პირებმა პასუხი სამართლებრივად უნდა აგონ“ , – განაცხადა გიორგი ბახტურიძემ.
