როგორც ცნობილია, ამის მიზეზი, ძირითადად, შესაწამლი მანქანა-დანადგარების აჭარაში გადაგზავნა იყო, რადგან ხელისუფლებამ განაცხადა, საკურორტო სეზონის ჩაშლა გვემუქრება და ამას ვერ დავუშვებთო. სამაგიეროდ, გურულების ნერვული სისტემის მოშლამ კულმინაციას მიაღწია მხოხავი საშინელების გამო, რომელიც საწოლშიც მიცოცავდა, ჭებშიც ცვიოდა და უთვალავი რაოდენობით საცხოვრებელი სახლებისკენ ისე მოიწევდა, ნიჩბითა და ცოცხით მოგერიებას ვერ აუდიოდნენ.
დადგა ზაფხული და ივნისის დასაწყისში, გურიაში, კონკრეტულად ოზურგეთში, ამერიკული მავნებელი უკვე გამოჩნდა.
ჯერ პეპლის გამოჩენას არ ველოდი და როცა დავინახე, მსხლის ხეს რამდენიმე ტოტი შევაჭერი, რომელსაც უკვე მწვანე ფოთოლიც აღარ ჰქონდა შერჩენილი. ზედ, პეპლისგან მოქსოვილ ბუდეებში, მატლების მრავალი გროვა იყო. ყოველივე ეს ოზურგეთში, მცენარეთა დაცვის სამსახურში მივიტანე. მათ კი მხოლოდ მოისმინეს პრობლემის შესახებ და სოფლის მეურნეობის სამინისტროს სურსათის ეროვნული სააგენტოს პრესსამსახურისკენ მიგვითითეს _ ხელმძღვანელი, ვერიკო გულუა გიპასუხებთ, ჩვენ მეტი არაფერი ვიცითო. სპეციალისტი ჯუმბერ ხომერიკი ხუმრობით შემოიფარგლა, სიტუაცია შეიცვალა, ჩვენ მხოლოდ მივალთ, პეპელას ჩავეხუტებით და მერე უკან დავბრუნდებითო (?). თან თავაზიანად გვთხოვა, ეგ ნაგავი აქ არ დაგვიტოვოთ, წაიღეთ და გადააგდეთო. ეს თხოვნა ვეღარ შევუსრულეთ ბატონ ჯუმბერს და ამ ზაფხულს, იქნებ, კიდევ არაერთხელ მივიდეთ მასთან ასე “ხელდამშვენებული”, გვაინტერესებს, ხუმრობითაც როგორ ჩაეხუტება “ამერიკულ ხვითოს”.
საკვირველი ის არის, რომ აღნიშნული სამსახურის თანამშრომლები, რომლებთანაც მრავალი წლის მანძილზე, კოლეგიალური, მეგობრული ურთიერთობა გვაკავშირებს, არა ერთხელ ვხლებივართ კიდეც ქალაქსა თუ სოფელში შეწამვლით სამუშაოებზე, წელს პირმოკუმული სამინისტროსკენ მიგვითითებენ, იქ გიპასუხებენო. თავს ზევით რა ძალაა. გასაგებია, რომ მათ ამ დღეში ხალხზე და პეპლებზე “მზრუნველი” ხელისუფლება აგდებს და “გურია ნიუსიც” სსიპ სურსათის ეროვნული სააგენტოს პრესსამსახურის ხელმძღვანელს, ვერიკო გულუას დაუკავშირდა.
_ ქალბატონო ვერიკო, ამერიკული პეპელა უკვე შემოგვესია, ნიმუში ოზურგეთის მცენარეთა დაცვის სამსახურში მივიტანეთ, თუმცა, თქვენთან დაკავშირება გვთხოვეს.
პრესსამსახურის ხელმძღვანელმა ტელეფონი გაგვითიშა, მერე კი თვითონ დაგვირეკა: _ სააგენტოს მიერ დაგეგმილია დასავლეთ საქართველოში მწვანე საფარის მთლიანად შეწამვლა სპეციალური სითხით, რომელიც 400 ლიტრის რაოდენობით გადაეცემა ლანჩხუთის მუნიციპალიტეტს, 200 ლიტრი _ ჩოხატაურის მუნიციპალიტეტს, ხოლო ოზურგეთის მუნიციპალიტეტს უკვე გადაეცა 400 ლიტრი. ჩვენი სპეციალისტები ადგილზე იმყოფებიან ყველა რეგიონში (ეს სპეციალისტები როგორ პირმოკუმულებიც სხედან ადგილებზე, ზემოთ უკვე ვთქვით, მ. ჩ.).
_ მავნებელი უკვე გამოჩნდა და შესაძლოა, წელს შარშანდელზე უარესად შემოგვესიოს.
_ ჯერ ბუდეში გახვეულ მავნებლებს პრეპარატი ვერ მოერევა, რადგან გამოჩენისთანავე, ერთი თუ გარეთ გამოდის, მეორე ბუდეში რჩება. ამიტომ სპეციალისტები თვითონ საზღვრავენ, როდის დაიწყონ შეწამვლის პროცესი. ეს ხდება მაშინ, როცა პეპელას გამოსვლის მაქსიმალური პერიოდია. ახლა ჩვენ რეგიონებიდან გვაქვს ინფორმაცია, უკვე არის სასიგნალო სტარტი.
_ ქალბატონო ვერიკო, შარშანაც გამუდმებით გვესმოდა პრეპარატებით შეწამვლის შესახებ, თუმცა, ხალხი მწვანე მასივების მანქანა-დანადგარით დამუშავებას ითხოვს. ეს მანქანები გასულ წელს ოზურგეთიდან აჭარაში გაგზავნეს.
_ ჩვენი სამანქანო დანადგარები მაინც ვერ შევლენ საკარმიდამო ნაკვეთებში. მოსახლეობას გადაეცემა პრეპარატები და უნდა დაამუშაონ თვითონ. თუ მხოლოდ იმას დაელოდება მოსახლეობა, რომ მანქანები ჩამოვლენ და შეწამლავენ, ასე შედეგი არ იქნება. კომპლექსური ღონისძიება ითვალისწინებს იმას, რომ მავნებელი მოისპოს მანამ, სანამ ბუდეშია. ესაა მაგალითად, გრძელ ჯოხზე დახვეულ ნაჭერზე ანთებული ცეცხლით ადგილზე მიწვა და მისსავე ბუდეში განადგურება.
_ თქვენც იგივეს გვეუბნებით, რაც მუდამ გვესმის ადგილობრივი ჩინოვნიკებისგან. ხალხი ითხოვს ეფექტურ ღონისძიებას, რის გატარების საშუალებასაც მანქანა-დანადგარი იძლევა.
_ იცით, მართლა ძალიან დიდ დროს ვერ დავკარგავ, თუ თქვენმა მეზობელმაც არ გააკეთა იგივე, რასაც თქვენ აკეთებთ, მაშინ კვლავ სკეპტიკურად განწყობილი დარჩებით და აგრესიული იქნებით ჩემ მიმართ. მე გაგეცით პასუხი.
ქალბატონმა ვერიკო გულუამ პირდაპირ დასმული კითხვები, რატომღაც სკეპტიკურად და აგრესიულად მიიჩნია, თუმცა, საბედნიეროდ, არსებობს აუდიოჩანაწერიც და რაც მთავარია, გურია, სადაც პეპელამ არაერთხელ შეაწუხა მოსახლეობა, სადაც შესაბამის სამსახურში უკვე ხმასაც არ გვცემენ და დედაქალაქში გვაგზავნიან პასუხის მისაღებად.
ჩვენ ასევე დავუკავშირდით ოზურგეთის მუნიციპალიტეტის საკრებულოს თავმჯდომარეს, ალეკო მამეშვილს და ვკითხეთ ამერიკული პეპლის საწინააღმდეგო ღონისძიებების შესახებ.
_ ბატონო ალეკო, ამერიკული პეპელას საწინააღმდეგო ღონისძიების გასატარებლად გადმორიცხულია თუ არა 90 000 ლარი, რაც ბიუჯეტში ცვლილების შედეგად შევიდა?
_ ამერიკული თეთრი პეპლის წინააღმდეგ გასატარებელი ღონისძიებებისთვის გამოყოფილი თანხა უკვე ასახულია ჩვენს ბიუჯეტში. 22 მაისს გამოცხადდა ტენდერი, ამერიკული თეთრი პეპლის წინააღმდეგ, ქიმიური მეთოდით ბრძოლის ღონისძიებების მომსახურების შესყიდვაზე. პროექტის ღირებულება გახლდათ 98 664 ლარი. გამარჯვებულია შპს “განახლება”, 77 890 ლარით.
_ რამდენი ჰექტარი ფართობი შეიწამლება?
_ მოთხოვნა დამოკიდებული იყო გასახორციელებელი სამუშაოების მოცულობაზე. ხოლო აპარატებით მოხდება 1 500 ჰა ფართობის შეწამვლა ორ ეტაპად, დანარჩენი ფართობები შეიწამლება “ტიფისა” და “დაიანას” ფუგის აპარატებით.
_ როგორ მოხდება თანხის ხარჯვის მონიტორინგი?
_ ჩემი ბრძანების საფუძველზე შეიქმნება მონიტორინგის ჯგუფი, რომელშიც გაერთიანდება გამგეობის და საკრებულოს შესაბამისი სამსახურის თანამშრომლები. მონიტორინგში, ასევე, ჩაერთვებიან სურსათის უვნებლობისა და მცენარეთა დაცვის ეროვნული სააგენტოს გურიის წარმომადგენლები.
_ პეპელა უკვე გამოჩნდა. როდის დაიწყება სამუშაოები?
_ თეთრი პეპლის წინააღმდეგ სამუშაოები მუნიციპალიტეტის მთელ ტერიტორიაზე მომავალი კვირიდან დაიწყება. შეწამვლა მოხდება, როგორც “სოლო” აპარატებით, ისე “ტიფისა” და “დაიანა ფუგის” აპარატებით.
მკითხველს შევახსენებ თითქმის ათეული წლის წინანდელი, ოზურგეთის რაიონული გამგეობის დადგენილების შესახებ, რომელიც მცენარეთა დაცვის სამსახურის მიერ 2001-2002 წლებში გაწეულ მუშაობასა და გახორციელებულ ღონისძიებებს ეხება _ სამუშაო რვეულში ნაპოვნი მასალა ტყუპისცალივით ჰგავს დღევანდელი ხელისუფლების მიერ მიღებულ დადგენილებებს, ანუ ამერიკული პეპლის წინააღმდეგ ბრძოლა იგივე ტემპით, იგივე ქმედებით არც წინ მიდის და არც უკან.
მივყვეთ ტექსტს, რომელიც რაიონის გამგეობის დადგენილებას გვამცნობს: “არასაკმარისად იქნეს მიჩნეული მცენარეთა დაცვის სადგურის მუშაობა 2001-2002 წლებში და დაევალოს სოფლის მეურნეობისა და სურსათის სამმართველოს, მცენარეთა დაცვის სამსახურის მუშაობის გაუმჯობესებისა და 2000 წელს გასახორციელებელ ღონისძიებათა სრულყოფილად ჩატარების მიზნით, გაძლიერდეს სამმართველოს ხელმძღვანელი და მაკოორდინირებელი ფუნქცია, მკვეთრად გამოჩნდეს მცენარეთა დაცვის სამსახურის საკარანტინო ინსპექციის მიერ ჩატარებულ სამუშაოთა ხარისხობრივი და რაოდენობრივი მაჩვენებლები. მიზანშეწონილად ჩაითვალოს სოფლად პროგნოზისა და სიგნალიზაციის წარმომადგენელთა ფუნქციების აღდგენა, რისთვისაც სოფლის მეურნეობისა და სურსათის სამმართველოს მიერ შერჩეულ იქნას (შესაბამისად, სოფლის გამგებელთან სახელშეკრულებო ურთიერთობის საფუძველზე) სიგნალიზაციისა და პროგნოზის მიმწოდებელ პიროვნებათა კანდიდატურები.”
მკითხველს შევახსენებ, რომ დადგენილებაში სხვა პუნქტებიცაა, მაგრამ ყურადღებას ამ უკანასკნელს მივაპყრობ, სადაც ნათლად ჩანს, რომ გაცილებით ორგანიზებულად და მეტი კონკრეტიკით უდგებოდნენ მავნებელთან ბრძოლის საქმეს. მითუმეტეს, მაშინ ჯერ კიდევ არ იყო ტყე-ველი ამერიკული პეპლისგან ასე გადახრული.
P.S. როცა სტატიაზე მუშაობა დავასრულე, ჩვენდა გასაკვირად და გასახარადაც, გავიგეთ, რომ ამ წერილის მომზადების დღეს, 8 ივნისს, დღის მეორე ნახევარში, სოფლის მეურნეობის მინისტრი ზაზა გოროზია უკვე ოზურგეთის მუნიციპალიტეტის სოფელ ოზურგეთში იმყოფებოდა და პეპლების საწინააღმდეგო მუშაობის დაწყება გახსნილად გამოაცხადა.
ადგილობრივ სამსახურებთან თუ სამინისტროსთან “გურია ნიუსის” ორდღიანი კითხვა-პასუხის რეჟიმში ყოფნის ამბავი, არა მგონია, ჩიტს მიეტანა გოროზიასთან, რადგან ეს ფრთოსანი თეთრ პეპელას არ ჭამს და შესაბამისად, არც მისი ყოფნა-არყოფნის ამბავი აწუხებს. არც პეპელა მიფრინდებოდა იქ, აგერ ვართ და მომწამლეთო. აი, პეპელასთან ჩახუტების ნოვატორული იდეის ავტორს და მის მეგობრებს კი შეიძლებოდა, შეესრულებინათ სიგნალიზაციის მიმწოდებელი პიროვნების როლი. სხვათა შორის, რაიონის გამგეობის ათი წლის წინანდელ დადგენილებაში ასეთი პუნქტიც არის _ “მიზანშეწონილად ჩაითვალოს სოფლად პროგნოზისა და სიგნალიზაციის წარმომადგენელთა ფუნქციების აღდგენა, რისთვისაც სურსათის სამმართველოს მიერ შერჩეული იქნას სიგნალიზაციისა და პროგნოზის მიმწოდებელ პიროვნებათა კანდიდატურები”.
