ზვიად კვაჭანტირაძე: “გამგებელი უნდა გამოცვლილიყო და ასეც მოხდა”

_ რა თქმა უნდა, საკრებულოს დღევანდელი შემადგენლობა, გულწრფელად რომ ვთქვათ, არ ასახავს ოზურგეთელების დღევანდელ სიმპათიებს და განწყობებს, იშვიათი გამონაკლისების გარდა, _ განაცხადა ზვიად კვაჭანტირაძემ.

_ ჩემი აზრით, საკრებულო მაქსიმალურად უნდა დაუდგეს გვერდით ახალ გამგებელს და დაეხმაროს მას საქმიანობაში. ამ მიზნით, კიდევ დამატებითი პოლიტიკური მექანიზმების შექმნა შიგნით საკრებულოში, რომელიც ერთმნიშვნელოვნად გახდებოდა ახალი ცენტრალური ხელისუფლების მხარდამჭერი ძალა, მისასალმებელი საქმე იქნებოდა. ვგულისხმობ, თუნდაც ქართული ოცნების მხარდამჭერი კოალიციური ფრაქციების გაძლიერებას და თუნდაც კიდევ ახალი ფრაქციის შექმნას, რაც დამატებით ინსტრუმენტს გააჩენდა მთავრობის მხარდამჭერი გადაწყვეტილებების მიღებისას.

_ ბატონო ზვიად, კოტე შარაშენიძეს კანდიდატურას ხმა არ მისცა წინა ხელისუფლებისადმი კრიტიკული დამოკიდებულებით გამორჩეულმა დეპუტატმა ლელა ნაცვალაძემ, საკრებულოში ახალშესულმა დეპუტატმა დიმიტრი კვერღელიძემაც გააკრიტიკა ახალი გამგებელი და ეს მაშინ, როცა “ერთიანი ნაციონალური მოძრაობის” დეპუტატებმა სრული მხარდაჭერა გამოუცხადა.რა ხდება?

_ დიმიტრი კვერღელიძეს დიდი ხანი არაა რაც ვიცნობ, თუმცა მისი შესაძლებლობების მჯერა და კარგი იქნებოდა, ეს შესაძლებლობები საკრებულოს მაქსიმალურად გამოეყენებინა. იგი ჩვენი კოალიციის წევრია და მთავრობის წარმატებებში ერთ-ერთი ყველაზე დაინტერესებული პირია ოზურგეთში. დიდი იმედი მაქვს, რომ ის შეძლებს პოზიტიურ ჭრილში გააგრძელოს თანამშრომლობა საკრებულოსთან და ახალ გამგებელთან. მე არ მომისმენია, სად და რა სახით გააკრიტიკა კვერღელიძემ კოტე შარაშენიძე, მაგრამ რამდენადაც ვიცი, მან მხარი დაუჭირა მის გამგებლად დანიშვნას. სხვანაირად წარმოუდგენელიც იყო. შესაძლებელია, კვერღელიძეს უფრო რადიკალური შეხედულებები ჰქონდეს საკრებულოში კოლეგებთან მიმართებაში, ვიდრე შარაშენიძეს, თუმცა 5-6 ადამიანის გარდა, არა მგონია, რომ დღეს ვინმე საკრებულოში თავის თავს „ნაცმოძრაობასთან“ აიგივებდეს. მითუმეტეს, რომ ისინი არც კი არიან ამ პარტიის წევრები.

_ თქვენ ამბობთ, რომ საკრებულოს დეპუტატები გვერდით უნდა დაუდგეს კოტე შარაშენიძეს, რამდენად წარმოგიდგენიათ „ნაცმოძრაობის“ დეპუტატების და ახალდანიშნული გამგებლის მოვალეობის შემსრულებლის საქმიანი ურთიერთობა?

_ მე, თქვენს ადგილას, დავინტერესდებოდი საკრებულოს წევრების აზრით, რამდენად აიგივებენ ისინი საკუთარ თავს “ნაცმოძრაობასთან”. მეც ძალიან მაინტერესებს ამ კითხვაზე პასუხი. რამდენადაც ვიცი, საკრებულოს წევრებს შორის  უმრავლესობა არაა პარტიის წევრი. უბრალოდ, ისინი არჩეულ იქნენ “ნაცმოძრაობის” ხელისუფლების პირობებში.  რიგგარეშე არჩევნები რომ ჩატარდეს, გასაგებია, რო სურათი რადიკალურად შეიცვლება და საკრებულოს წევრთა უდიდესი ნაწილს ამომრჩეველი გამოცვლის. მაგრამ თუ ახალი წევრები არ იქნებიან „ქართული ოცნების“ კოალიციში შემავალი პარტიის წევრები, მაგრამ ჩვენი მხარდამჭერები, მათ მაინც ოცნების საკრებულო უნდა დავარქვათ? გამგებელი უნდა გამოცვლილიყო და ასეც მოხდა. მე მახარებს, რომ საკრებულოს დღევანდელი შემადგენლობა ადექვატურ პოზიციაზე შეჯერდა. მათ ცვლილებას მხარი დაუჭირეს. სხვამხრივ,  უნდა დავლოდებოდით ახალი არჩევნებს. ეს საქმეს ვერ წაადგებოდა. ასე რომ, წინა გამგებლის გადაწყვეტლებაც გადადგომის შესახებ, ისევე როგორც საკრებულოს გადაწყვეტილება, იყო ადექვატური.

_ მეტად კრიტიკული იყო ლელა ნაცვალაძე, მისი თქმით, საკრებულოს სხდომას, რომლის დროს კოტე შარაშენიძე აირჩიეს, ერთი რამ დააკლდა: წითელი და ლურჯი დროშები და ბუშტები ერთად. ლელა ნაცვალაძემ განაცხადა, რომ კოტე შარაშენიძე ნაცმოძრაობასთან შეხმატკბილებული არის.

_ ლელა ნაცვალაძეს, მიუხედავად იმისა, რომ მასსა და კოტე შარაშენიძეს შორის დიდი გაუგებრობაა, მე პატივს ვცემ. მან იცის ამის შესახებ. იგი, არასაამთავრობო ორგანიზაციების ფარგლებში, არჩევნებში გვეხმარებოდა. მე შევეცადე, რომ ლელას და კოტეს შორის ურიერთობების გამოსწორებისთის ხელი შემეწყო… ლელა ნაცვალაძე, მართლა მებრძოლი სულის ადამიანია. არასდროს დამავიწყდება, როგორ ეულად ებრძოდა იგი “ნაცმოძრაობას” საკრებულოში. დარწმუნებული ვარ, რომ არც ახლა დაიშურებს ძალისხმევას, რომ ჩვეული შემართებით გააკრიტიკოს ყველა არასწორი მოქმედება, რომელსაც საკრებულო და გამგეობა დაუშვებს. მისი გამოსვლა ვნახე და მხარს ვუჭერ იმას, რომ გამგეობა უნდა დაინტერესდეს წინა ხელისუფლების საფინანსო-ეკონომიკური მოღვაწეობით და თუ საჭირო გახდება პრობლემების უფრო ღრმად შესწავლას შემდგომი მსვლელობა მისცეს.

კოტეს და ლელას ხასიათიდან და პიროვნული თვისებებიდან გამომდინარე, დამიჯერეთ და დარწმუნებული ვარ, რომ ბოლოსდაბოლოს ისინი აუცილებლად გამონახავენ საერთო ენას და ერთად იმუშავებენ ჩვენი, ოზურგეთის და ოზურგეთლების საკეთილდღეოდ.