დავით დარჩია ჩამოვიდა თბილისში და მეუბნება, რომ იქაური პოლიციის უფროსი მივიდა მასთან და ეუბნება, რაღა გინდა ამ პარტიაში, იქ ყველაფერი გადაწყვეტილია, ყველა პროცესი დასრულებულია, ირაკლი ალასანია იქნება პრეზიდენტი და ჯობია, იმ გუნდში წამოდი, რაღა გინდა აქო. აი, ეს ელემენტარული უყურადღებობა იყო ირაკლის მხრიდან, რაც სულ სხვანაირად გავრცელდა რეგიონებში…” – ეს სიტყვები პრემიერ-მინისტრს ეკუთვნის.
დავით დარჩიას პრემიერთან მთლად ზუსტად ვერ ჩაუტანია ამბავი, იმიტომ რომ ის “ქართული ოცნება – დემოკრატიული საქართველოს“ ოზურგეთის რაიონული ორგანიზაციის თავმჯდომარედ ჯერ არ არის არჩეული. აქედან გამომდინარე, მისი დანიშვნა და არა არჩევა, პრემიერ-მინისტრმა წინასწარ დაანონსა.
რესპუბლიკელი ტიფო მიქატაძე ჩვენთან საუბრის დროს ამბობს, რომ “რესპუბლიკურ პარტიაში” რაიონული ორგანიზაციის თავმჯდომარის არჩევა ასეთი წესით ხდება: – პარტიის წევრებისგან ირჩევა რაიონული ორგანიზაციის კომიტეტი სადაც 7 კაცი შედის და შემდეგ თავმჯდომარის არჩევა ამ შვიდი კაცისგან ხდება.
ჩვენს მიერ მოპოვებული ინფორმაციით, “ქართული ოცნება – დემოკრატიული საქართველოს” რაიონული ორგანიზაციის კონფერენციისთვის მზადება დაწყებულია და ახალი თავმჯდომარის არჩევა 26 იანვარს უნდა მოხდეს.
ჩვენ “ქართული ოცნების” ოზურგეთის რაიონული ორგანიზაციის ერთ-ერთ ლიდერს და ოზურგეთის მუნიციპალიტეტის გამგებლის მოვალეობის შემსრულებელს, კოტე შარაშენიძეს დავუკავშირდით, რომელმაც გვირჩია, სხვა საქმით დაინტერესდითო.
_ რატომ არ დაიღალეთ მსგავსი თემებით. რატომ არაფერს მეკითხებით სოფლის მეურნეობაზე, ეკონომიკაზე, რა ხდება ოზურგეთში? არ გაინტერესებთ?... და ტელეფონი გაგვითიშა. აქვე შევახსენებთ ბატონ კოტეს, რომ ჩვენთვის თემების შერჩევა მის კომპეტენციაში არ შედის. ტელეფონის გათიშვა კი მისი ნებაა, მაგრამ საჯარო პირისთვის მთლად მოსაწონ საქციელს ვერ დავარქმევთ.
“რესპუბლიკელის” მარინა სუნგულიას თქმით, ამ ეტაპზე “ქართულ ოცნებას” ოზურგეთის რაიონულ ორგანიზაციას თავმჯდომარე არ ჰყავს და ძალიან მალე მოხდება არჩევა. რაც შეეხება პრემიერ-მინისტრის სკანდალურ განცხადებას, მარინე სუნგულია ამბობს, რომ მან ეს ამბავი რამდენიმე წუთის წინ სატელეფონო საუბრის დროს გაიგო.
კოალიცია “ქართული ოცნების“ ერთ-ერთმა აქტიურმა წევრმა, რომელმაც არ ისურვა თავისი სახელი და გვარი დაგვესახელებინა გვითხრა, რომ რაც პრემიერ-მინისტრმა განაცხადა მან ორი დღის წინ იცოდა, მაგრამ კონკრეტულად არ იცის ვინ “ურჩია” “თავისუფალ დემოკრატებში” გადასვლა დავით დარჩიას.
