“კონტროლის პალატა სოფლის მხარდამჭერი პროგრამის თანხებით დაინტერესდეს”

კონტროლის პალატამ დაკითხვაზე “თავისუფალი დემოკრატების” ოზურგეთის რაიონული ორგანიზაციის გამგეობის წევრი ვანო ხომერიკი და ამ პარტიის წევრი, ოზურგეთის მუნიციპალიტეტის მერიის თემის პირველადი ორგანიზაციის კოორდინატორი გელა ბურჯანაძეც დაიბარა.

“გამოსვლისას მითხრა კახა საჯაიამ, როცა დაბლა ჩახვალ, “გურია ნიუსის” ჟურნალისტები დაგხვდებიან. არაფერი გამოგრჩეს სათქმელი, მე კი თქვენს ინტერვიუს “გურია ნიუსის” ვებგვერდზე მალე ვიხილავო”, _ გვითხრა ვანო ხომერიკმა.

თავისუფალი დემოკრატების ოზურგეთის რაიონული ორგანიზაციის გამგეობის წევრი ვანო ხომერიკი “გურია ნიუსთან” საუბარში აცხადებს, რომ ის თავის საქმიანობას აუცილებლად გააგრძელებს: _მინდა თქვენი გაზეთის საშუალებით განვაცხადო _ აღნიშნული კომპანია, რომელიც მიმდინარეობს კონტროლის პალატის მიერ, მიმართულია იმ ხალხის დასაშინებლად, რომელიც იკრიბება “ქართული ოცნების” გარშემო. მინდა აღვნიშნო, რომ კონტროლის პალატის წარმომადგენელთან დაბარებული პიროვნებები არ უნდა გადიოდნენ პოლიციის კორდონს, არ უნდა ხდებოდეს ასეთი ჩხრეკა _ თავი შეურაცხყოფილად ვიგრძენი, ეს ყველაფერი მაგონებს, 30-იან წლებს, როდესაც ხალხს იბარებდნენ უწყებებით, ოღონდ იმ განსხვავებით, რომ ისინი უკან, სახლში აღარ ბრუნდებოდნენ.

მინდა მივმართო, ხელისუფლებას, რომელსაც პრეტენზია გააჩნია ევროატლანტიკურ ალიანსის და ევროკავშირის წევრობაზე _ თუ ეს ქმედება დემოკრატიულია, ამას საზოგადოება განსჯის და, აგრეთვე, ის საერთაშორისო ორგანიზაციები, რომლებიც თვალყურს ადევნებენ საქართველოში მიმდინარე პროცესებს. ვიმედოვნებ, რომ ისინი დადებენ შესაბამის დასკვნებს, რამდენად დემოკრატიულად შეიძლება ჩაითვალოს ზემოთ აღნიშნული კამპანია, რასაც ხელისუფლება აკეთებს კონტროლის პალატის მეშვეობით.

ასევე, მინდა, მივმართო ხელისუფლებას და კონტროლის პალატას _ რატომ არ ინტერესდებიან სოფლის მხარდაჭერის პროგრამებში დახარჯული თანხებით, რამდენად არის ის მიზნობრივად გახარჯული, იქნა თუ არა თუნდაც ერთი ფაქტი შესწავლილი ამ თანხების ხარჯვასთან დაკავშირებით, ჩაატარეს ერთხელაც კი მონიტორინგი? კანონმდებლობით სწორედ კონტროლის პალატის პირდაპირი მოვალეობაა, ზემოთ აღნიშნული თანხების მიზნობრიობის და შესრულებული სამუშაოების ხარისხის შესწავლა, ვინაიდან თანხა სახელმწიფო ბიუჯეტიდან გამოიყოფა, _ ამბობს ხომერიკი “გურია ნიუსთან” საუბარში და დაკითხვის პროცესებზე საუბრობს, _ დაკითხვა მიმდინარეობდა დაახლოებით ორი საათის განმავლობაში. სანამ დაკითხვა დაიწყებოდა მოვითხოვე ჟურნალისტების დასწრებაც, მაგრამ კონტროლის პალატის წარმომადგენლის კახა საჯაიასგან მივიღე უარი. აღარაფერი მითქვამს, რადგან აზრი არ ჰქონდა.

პირველად გასაუბრება დაიწყო პოლიტიკური სახის კითხვებით, რაზეც ვუთხარი ბატონ კახას, რომ დაბარებული ვიყავი პარტიის ფინანსებთან და არა პარტიის საქმიანობასთან დაკავშირებით. ამის შემდეგ, ძირითადად, პარტიის ფინანსური მხარით დაინტერესდა, ასევე, პირადი და ოჯახის შემოსავლებით _ მეკითხებოდა, იხდიდნენ თუ არა პარტიის წევრები საწევროს. ვუპასუხე. ასევე, აინტერესებდა, იყო თუ არა პარტიაში რაიმე სახის გადმორიცხვა და ანაზღაურება, ფინანსური ოპერაციები ხდებოდა თუ არა პარტიის წევრებთან მიმართებაში, რა სახის სამუშაოებს ასრულებდნენ ისინი, არის თუ არა გაფორმებული საიჯარო ხელშეკრულება ოფისის ფართის მეპატრონესთან, რაზეც ვუპასუხე, რომ ეს ყველაფერი გაფორმებულია პარტიის ცენტრალურ ოფისთან, ასევე კომუნალური გადასახადების გადახდაც ხდება ცენტრალური ოფისი მიერ.

_ თქვენი აზრით, მიიღო თუ არა საჯაიამ ის ინფორმაცია თქვენგან, რაც აინტერესებდა?

_ არ ვიცი.

_ იყო თუ არა ზეწოლა ან მუქარა?

_ მუქარას ადგილი არ ჰქონია. რამდენჯერმე ერთი და იგივე კითხვა დამისვეს სხვადასხვა კონტექსტში, რაზეც ვპასუხობდი, რომ აზრი არ აქვს კითხვების გამეორებას, რადგან ამ კითხვებზე მე, ფაქტობრივად, უკვე გაგეცით გაგეცით პასუხი,-მეთქი.

_ გააგრძელებთ თუ არა საქმიანობას ისევ?

_ კი რა თქმა უნდა. გამოსვლისას მითხრა კახა საჯაიამ, როცა დაბლა ჩახვალ, “გურია ნიუსის” ჟურნალისტები დაგხვდებიან, არაფერი გამოგრჩეს სათქმელი, მე კი თქვენს ინტერვიუს “გურია ნიუსის” ვებგვერდზე ვიხილავო.

გელა ბურჯანაძე: _ საათნახევრის განმავლობაში ვიმყოფებოდი დაკითხვაზე. რა თქმა უნდა, მეც გამჩხრიკეს. პირი, რომელმაც დამკითხა, გაგა ჩაქსელიანად გამეცნო. დაკითხვის პროცესი ნორმალურად წარიმართა, ყოველგვარი ზეწოლისა და მუქარის გარეშე.

_ რა აინტერესებდათ თქვენგან?

_ ჩემგან აინტერესებდათ ინფორმაცია პარტიის ფინანსური მონიტორინგის შესახებ, მაგრამ როცა პარტიაში ჩემი თანამდებობა გაიგეს, კითხვები შემდეგ სხვაგვარად დასვეს _ რას ნიშნავდა პირველადი ორგანიზაციის კოორდინატორობა, ანუ რა მევალებოდა. მე ვარიგებდი სააგიტაციო მასალას, აინტერესებდათ, ავიღე თუ არა ამაში ფული. შემდეგ დაინტერესდნენ ჩემი პირადი შემოსავლებით.

_ გააგრძელებთ თუ არა პარტიულ საქმიანობას?

_ აუცილებლად. თანაც, უფრო ენთუზიაზმით და გაათმაგებულად, _ გვითხრა ბურჯანაძემ.