ღონისძიების დამთავრებისთანავე “გურია ნიუსისთვის” ცნობილი გახდა, რომ სკოლის მოსწავლეებმა ღონისძიებაზე ლექსები უხვად მიუძღვნეს რამაზ ნიკოლაიშვილს, მეტიც, ლექსების შინაარსში რამაზ ნიკოლაიშვილის ქება-დიდება ისმოდა. ამასთანავე, ერთერთი ლექსით მას ამავე გიმნაზიის ეზოში მეორე კორპუსიის მშენებლობა თხოვეს, რაზეც ნიკოლაიშვილს ასეთი პასუხი გაუცია:
_ მე ვერაფერს დაგპირდებით, იოცნებეთ და აგისრულდებთ, ვიოცნებოთ ყველამ ერთადო, _ რასაც იქ მყოფთა სიცილი მოჰყოლია.
“გურია ნიუსი” შეეცადა წყაროს მიერ მიწოდებული ინფორმაცია გადაემოწმებინა და სკოლაში მივიდა, რომელიც დაკეტილი დახვდა. მაგრამ, მოვახერხეთ ამავე სკოლის ერთ-ერთი თანამშრომლის ჩაწერა, რომელიც ამ ფაქტს ადასტურებს.
“გურია ნიუსი” მის ვინაობას არ ამხელს იქედან გამომდინარე, რომ შეიძლება რამაზ ნიკოლაიშვილის მეორე ვიზიტის დროს ის უკვე იქ აღარ მუშაობდეს. თავდაპირველად, ჩვენმა წყარომ მეხსიერების “დაქვეითება” მოიმიზეზა და განაცხადა, ბევრი არაფერი მომხდარა, იხუმრა კაცმაო. ამბის მოყოლაზე მხოლოდ მას შემდეგ დაგვთანხმდა, რაც პირობა მივეცით, რომ მის ვინაობას არ გავამხელდით.
_ ნამდვილად იყო დღეს თქვენს სკოლაში სტუმრად რამაზ ნიკოლაიშვილი მეუფესთან ერთად?
_ იყვნენ სხვა მამაოებიც, მეუფე და რამაზ ნიკოლაიშვილი, სხვა არავინ. არაფერი ცუდი არ უთქვამს ბატონ რამაზს, პირიქით, ყველაფერ კარგს დაგვპირდა.
_ რას დაგპირდათ?
_ ბევრს არაფერს. ბავშვებმა ითხოვეს რაღაცეები და მათ დაპირდა, რომ აგისრულებთ ყველაფერსო.
_ მაინც რას თხოვდნენ ბავშვები რამაზ ნიკოლაიშვილს?
_ ბავშვებმა მოთხოვეს კორპუსის მიმატება და მან ისეთი რაღაცა თქვა, ალბათ გაიხუმრა, არ ვიცი, მოკვდნენ სიცილით…
_ რა თქვა ასეთი?
_ ვიოცნებოთ ყველამ ერთად და სურვილებიც აგისრულდებათო, მეც ვიოცნებებ, რომ აგისრულოთ სურვილებიო. ეს რომ თქვა, მოკვდნენ სიცილით.
_ ვინ ესწრებოდა ღონისძიებას?
_ მეუფე, მამაოები და ნიკოლაიშვილი.
_ ისინი ისმენდნენ ამ ყველაფერს?
_ კი, აბა რა, ერთად იყვნენ, მაგრამ ცუდად არაფერი უთქვამს იმ კაცს, ნაღდად ვიოცნებებ, რომ გავაკეთო მაგი კორპუსიო და თქვენი სურვილებიც ახდესო. აგი თქვა და რაა ამაში ცუდი ისეთი? ახლა “ოცნება” კი იცით ვინცაა, მაგრამ ამას სეიოზულად კი არ უთქვია. ბავშვებმა გამოუთქვეს ლექსები და ლექსებით მიმართეს.
_ ლექსში მართლა იყო ტექსტი, სადაც ბატონ რამაზს კორპუსის მიშენებას თხოვდნენ?
_ კი, იყო, ლექსში იყო, ხო. 10 ლექსი მიუძღვნეს მასეთი, სადაც რამაზ ნიკოლაიშვილს მიმართავდნენ, თხოვდნენ და მანაც დაპირდა. ამ ლექსებში შეიყვანეს ტექსტი, რომ აგვიშენეო, მან უთხრა _ ვიოცნებოთ და აგვისრულდებაო.
ამ ფაქტის გასარკვევად “გურია ნიუსი” წმინდა ნინოს სახელობის სასულიერო გიმნაზიის დირექტორს, მარინა ტრაპაიძეს დაუკავშირდა.
_ მეუფე გვესწრებოდა ჩვეულებრივად, მეოთხე კლასის გამოშვება იყო.
_ ბატონი რამაზ ნიკოლაიშვილი არ გესწრებოდათ?
_ რა ხდება? რაშია საქმე? რა გნებავთ?
_ ქალბატონო მარინა, ეს ღონისძიება ბატონ რამაზ ნიკოლაიშვილს მიუძღვნეს?
_ რანაირად მელაპარაკებით? რატომ უნდა ეკუთვნოდეს მეოთხე კლასის გამოშვების ღონისძიება რამაზ ნიკოლაიშვილს?
_ ქალბატონო, მარინა, ჩვენ გვაქვს ინფორმაცია, რომ სკოლის მოსწავლეებმა ლექსები რამაზ ნიკოლაიშვილს მიუძღვნეს. ადასტურებთ ამ ინფორმაციას?
_ საერთოდ არ მაქვს სურვილი ამ თემაზე გესაუბროთ.
_ რატომ?
_ არ ვიძლევი საერთოდ კომენტარს. მობრძანებულიყავით და გენახათ.
_ რომ დაგეპატიჟებინეთ, მოვიდოდით.
_ არ ვადასტურებ მაგ ინფორმაციებს და ზოგადად არ ვართ გამჭვირვალე. მე ვარ სასულიერო სკოლის დირექტორი. აქ არაფერი ისეთი არ ხდება, რომელიც შეიძლება რაიმეს ეწინააღმდეგებოდეს. ეს არის სასულიერო პირის სკოლა, სადაც დაცულია ყველაფერი ისე, როგორც საჭიროა.
_ ბატონი რამაზი ხშირად გსტუმრობთ?
_ არ მაქვს მაგ კითხვაზე პასუხი.
