“გურია ნიუსის” ინფორმაციით, ხელისუფლებას გადაწყვეტილი აქვს, რადაც არ უნდა დაუჯდეს, საჩხერეში ნებისმიერი გზით დაამარცხოს ბიძინა ივანიშვილი და მისი მაჟორიტარი. ისინი დიდ საგონებელში არიან ჩავარდნილები და ეძებენ განსაკუთრებულ კანდიდატს საჩხერისთვის. ჩვენი წყაროს ცნობით, საჩხერეში წაგების შემთხვევაში, ნებისმიერს, ვისაც იქ არჩევნებზე ზედამხედველობას ჩააბარებენ, პასუხი მთელი სიმკაცრით მოეთხოვება.
“გურია ნიუსის” ინფორმაციით, კოალიცია “ქართულმა ოცნებამ”, შესაძლოა, საჩხერის მაჟორიტარ დეპუტატად პარტია “ქართული ოცნება _ დემოკრატიული საქართველოს” თავმჯდომარე, მანანა კობახიძე დაასახელოს.
ჩვენი წყაროს ცნობით, ეს ვერსია სერიოზულად განიხილება “ქართულ ოცნებაში” და ამას პირადად ბიძინა ივანიშვილი უჭერს მხარს. შეგახსენებთ, რომ მანამდე საჩხერის მაჟორიტარობის კანდიდატად, ბიძინა ივანიშვილის მეუღლე, ეკატერინე ხვედელიძე განიხილებოდა.
როგორც ჩანს, ბიძინა ივანიშვილს, ამ ეტაპზე, მეუღლის პოლიტიკაში სრული დატვირთვით ჩართვა არ სურს, მაგრამ უპირატესობას მაინც პოლიტიკაში ქალების მოსვლას ანიჭებს.
ინფორმაციის გადასამოწმებლად, “გურია ნიუსი” “ქართული ოცნება _ დემოკრატიული საქართველოს” თავმჯდომარეს, მანანა კობახიძეს დაუკავშირდა.
_ რაც შეეხება საჩხერის მაჟორიტარობას, არ ვიცი საიდან გაქვთ ეგ ინფორმაცია, მე ნამდვილად არაფერი ვიცი.
ერთი, რის თქმაც ზუსტად შემიძლია, მე წავალ ყველგან, სადაც ჩემს ყოფნას საჭიროდ ჩათვლის კოალიცია “ქართული ოცნება”, ჩვენი პოლიტსაბჭო და ბატონი ბიძინა ივანიშვილი. მზად ვარ, წავიდე ნებისმიერ რაიონში და იქ ვიყარო კენჭი, სადაც საჭირო ვიქნები. სულერთია, საჩხერე იქნება, გარდაბანი, ახალციხე თუ სხვა, მზად ვარ, ნებისმიერი ადგილიდან ვემსახურო ქართველ ხალხს”,_ განუცხადა მანანა კობახიძემ “გურია ნიუსს”.
ვნახოთ, რა გადაწყვეტილებას მიიღებს “ქართული ოცნების” პოლიტსაბჭო და ბიძინა ივანიშვილი. არანაკლებ საინტერესოა ხელისუფლების გადაწყვეტილებაც.
როგორც საქართველოს პარლამენტის რეგიონული პოლიტიკის, თვითმმართველობისა და მაღალმთიანი რეგიონების კომიტეტის თავმჯდომარემ ვახტანგ ბალავაძემ “გურია ნიუსს” განუცხადა, ჯერ მმართველ პარტიას არ უმსჯელია მაჟორიტარ კანდიდატებზე.
_ ჩვენ არ დავარღვევთ ვადებს, ვადებში ჩავჯდებით და კანდიდატებსაც დავასახელებთ, რასაც ოფიციალურად გავაჟღერებთ _ განაცხადა ბალავაძემ.
“გურია ნიუსის” კითხვაზე, _ ეყოლებათ თუ არა მათ ახალი, აქამდე უცნობი სახეები, ვახტანგ ბალავაძემ განაცხადა, რომ აუცილებლად ეყოლებათ.
