გამოხმაურება “გურია ნიუსის” ვებგვერდზე გამოქვეყნებულ მასალას (“შაშიაშვილმა ხელისუფლებას და ივანიშვილს მაჟორიტარი კანდიდატები დაუწუნა”) მოჰყვა, სადაც შაშიაშვილი ამბობს: “ძალიან ვწუხვარ, მაგრამ ვისაც ბიძინა ივანიშვილი ასახელებს კანდიდატებად, ეს არ არის საქართველოს პარლამენტი. საქართველოს პარლამენტში უნდა იყვნენ იურისტები, ეკონომისტები, ფილოსოფოსები, სოციოლოგები, ფსიქოლოგები, პოლიტოლოგები. ძლიერ ჟურნალისტს რა უნდა პარლამენტში?! რა უნდა ძლიერ ექიმს პარლამენტში?!”
“გურია ნიუსმა” ამ თემასთან დაკავშირებით კომენტარი ელისო ჩაფიძეს თხოვა.
_ ქალბატონ ელისო, რა კომენტარს გააკეთებდით ბატონ თემურ შაშიაშვილის განცხადებაზე იმასთან დაკავშირებით, რომ პარლამეტში ძლიერი ჟურნალისტების ადგილი არ არის?
_ ვერანაირ კომენტარს ახლა ვერ გაგიკეთებთ. იმიტომ კი არა რომ რაღაც… უბრალოდ, კომენტარი რაც გავაკეთე სოციალურ ქსელში, მგონი საკმარისია. არ მიწყინოთ, ძალიან გთხოვთ. მე არ ვაპირებ რაღაც კონფრონტაცია მქონდეს იმ ადამიანებთან, მაგრამ უბრალოდ როდესაც თავს დამესხმება ვინმე, აუცილებლად გავცემ პასუხს, იმიტომ რომ დასახელებულ ადამიანებს შორის, ჟურნალისტი გახლავართ მხოლოდ მე. თუ ბატონი თემურისთვის ნახევარი წლის წინ გმირი ჟურნალისტი ვიყავი, ისევე როგორც მიხეილ სააკაშვილისთვის, როდესაც პოლიტიკური ბრძოლაში კონკურენტი ხდები, რატომ აკეთებენ ასეთ კომეტარებს, ჩემთვის გაუგებარია.
მე მის საქმიანობასთან დაკავშირებით არ ვისაუბრებ, მაგრამ თუ გახდება ეს საჭირო, მხოლოდ იმ შემთხვევაში.
_ თქვენ განაცხადეთ: “სხვებზე მეტი ინფორმაცია მაქვს და არავის ვურჩევ, რომ მისი გამოყენება მაიძულონ პოლიტიკურ პროცესში.” თუ გაქვთ ისეთი ინფორმაცია, რაც ახლავე შეიძლება მივაწოდოთ საზოგადოებას?
_ არანაირ განსაკუთრებულ ინფორმაციაზე არ არის საუბარი. ბოლო 20 წელი რაც ხდებოდა საქართველოში, ამას ვგულისხმობდი. ბუნებრივია, უფრო მეტი ინფორმაცია თქვენც გაქვთ, ჟურნალისტი ხართ. კონკრეტულად რომელი თანამდებობის პირი რას აკეთებდა კონკრეტულ მომენტში, რამდენად კარგი იყო ქვეყნისთვის მისი ქცევა, რამდენად ასრულებდა მასზე დაკისრებულ მოვალეობას, რა ინტერესები ჰქონდა საერთოდ, ქვეყნისთვის საკუთარი თავისთვის, აი ეს არის საინტერესო. სამწუხაროდ, მაქვს ძალიან დიდი ინფორმაცია, მაგრამ როგორი ფორმით უნდა მივაწოდო საზოგადოებას, ამაზე საუბარი იმ შემთხვევაში შეიძლება, როდესაც დადგება ამ ადამიანების კანდიდატურები. მე არაფერს ვმალავ, უბრალოდ ხაზს ვუსვამ, რომ მაქვს სხვებზე მეტი ინფორმაცია, ისევე, როგორც თქვენ, იმიტომ, რომ ჟურნალისტი ხართ.
ბევრი გამოძიება ჩამიტარებია. არ არის საჭირო ვილაპარაკო ამის შესახებ მაინცდამაინც. იმ წლებში, ვწერდი რა ხდებოდა ტყიბულში, ქუთაისში, საქართველოს პარლამენტში. ნებისმიერს შეუძლია ამოიღოს ეს მასალები, ნახოს და წაიკითხოს.
