დასრულების შემდეგ, კვლავ გაიტანეს დაკითხვის ოქმი გვერდით ოთახში. 5 წუთის შემდეგ მეც იქ შემიყვანეს, სადაც დამხვდა 3 პირი. ერთ-ერთის მითითებით დავჯექი დივანზე. გვეედით დამიჯდა პიროვნება რომელმაც თავის უკანა არეში თმაში წამავლო ხელი და ძლიერად გადამიწია უკან. ამ დროს ჩემს წინ, სამოქალაქო ფორმაში ჩაცმულმა პირმა, რამდენჯერმე დამარტყა სახეში ხელი და თან მეუბნებოდა დამეწერა ის, რასაც ისინი მეტყოდნენ.
ამავე დროს, ჩამარტყა ფეხი მარცხენა ფეხის წვივის გვერდით ძლიერად, რა დროსაც, პიროვნება რომელსაც ჩემი თმები ეჭირა ხელში უფრო ძლიერად ცდილობდა ჩემს დამორჩილებას. ყოველ შეკითხვას, რომელიც მათი მხრიდან ისმებოდა ვითომდა დანაშაულის დასადასტურებლად, მე უარვყოფდი, რასაც მოსდევდა ჩემი სიტყვიერი და ფიზიკური შეურაცხყოფა. მათ დამიდეს მაგიდაზე დაკითხვის ოქმი, რომლის წაკითხვის უფლება არ მომცეს და ფიზიკური ზეწოლით მომაწერინეს ხელი.”
პირველ სექტემბერს, ძარცვის ბრალდებით დაკავებული ბექა ჯიქიძე ამ შინაარსის საჩივარს თბილისის მთავარი სამმართველოს იზოლატორიდან წერს და ამბობს, რომ ის პოლიტიკური ნიშნით დაიჭირეს. ჯიქიძე “ქართული ოცნების” ახალგაზრდული ფრთის კოორდინატორია.
ბექა ჯიქიძის განცხადებით, 01 სექტემბერს, დაახლოებით 18:00 საათზე, ვარკეთილის მეტროსთან მდებარე “ქართული ოცნების” ოფისიდან თავის მეგობრებთან: ედგარ დარიხინთან, ირაკლი ჩითინაშვილთან და ნიკა კობახიძესთან ერთად, სახლში ბრუნდებოდა. ამ დროს, ისინი პოლიციის ფორმაში ჩაცმულმა ორმა პიროვნებამ გააჩერა, რომლებმაც განაცხადეს, რომ “არსებობდა რაღაც პრობლემა”, თუმცა სხვა არაფერი დაუკონკრეტებიათ.
„გადაგვიღეს 4 ჩვენგანს ფოტოები. ამის შემდეგ, მათ გამოიძახეს დამხმარე ჯგუფი. დაახლოებით 2-3 წუთში მოვიდა ვერცხლისფერი ავტომობილი დაბურულშუშებიანი, რომელშიდაც ყოველგვარი ახსნა განმარტების გარეშე ჩაგვსვეს და მიგვიყვანეს ვარკეთილში მდებარე შუა მთის ქუჩაზე არსებულ პოლიციის განყოფილებაში”, _ აცხადებს ბექა ჯიქიძე და დეტალურად აღწერს პოლიციაში განვითრებულ მოვლენებს.
„გამომძიებელმა, რომელმაც თავისი სახელი და გვარი არ გაამხილა, პირდაპირ განმიცხადა, რომ მე ვიყავი დამნაშავე. კერძოდ, თითქოს მე ჩამედინოს ძარცვა. დაკითხვის ოქმი, ისე რომ ხელი არ მომიწერია, აიტანეს ზემო სართულზე, სადაც რამდენიმე წუთის შემდეგ მოხდა ჩემი აყვანა. ოთახში იმყოფებოდა 4 პიროვნება. ერთ-ერთმა ჩემს მიმართა გამოამჟღავნა განსაკუთრებული აგრესიულობა, რაც გამოიხატებოდა შემდეგში: მიყვიროდა ხმამაღლა, რომ ჩემს მიერ მიცემული ჩვენება მათ არ აკმაყოფილებდათ და დამიწყო ხმამაღლა გინება. ასევე, აღნიშნულმა პიროვნებამ, ხელი გამარტყა ძლიერად მარცხენა სახისა და ყურის არეში. პარალელურად, მაიძულებდა, მიმეცა ისეთი ჩვენება, როგორსაც ის მეტყოდა. წარმომიდგინეს თავისი ვერსია, რომ ვითომცდა მქონდა დანა და გიორგი ჟვანიასთან ერთად ჩავიდინე ძარცვა. ასევე განმიცხადეს, რომ მათ ჰქონდათ კადრები, სადაც დასტურდებოდა ჩემი დანაშაულის ჩადენის ფაქტი. თუმცა, აღნიშნული კადრები ვერ იარსებებდა, რადგან დანაშაული არ ჩამიდენია და ამ მიზეზით მათ ვერ წარმომიდგინეს აღნიშნული ვიდეო ჩანაწერი,” _ აცხადებს ჯიქიძე მურთაზ ზოდელავას, გიგა ბოკერიას, გიორგი ტუღუშისა და მანანა კობახიძის სახელზე დაწერილ საჩივარში.
მთავარი სამმართველოს დროებითი მოთავსების იზოლატორში მყოფი პატიმარი აცხადებს, რომ ის აიძულეს, ვიდეო კამერის წინ ეთქვა ის ვერსია, რაც პოლიციის თანამშრომლებმა შესთავაზეს.
“რადგანაც მე დამნაშავე არ ვიყავი და დანაშაული არ ჩამიდენია, მათ მიერ შემოთავაზებული ვერსიები ამერია და ჩაწერა მოახდინეს ორჯერ. აქვე აღვნიშნავ, რომ პოლიციელების ამოცნობა, რომლებიც ჩემს მიმართ ძალადობას ახორციელებდნენ თავისუფლად შემიძლია.”
ბექა ჯიქიძის ინტერესებს სასამართლოში, “ქართული ოცნების” ადამიანის უფლებათა დაცვის კომიტეტის წარმომადგენლები დაიცავენ.
