ირაკლი მელაშვილი აცხადებს, რომ უკანონო მოსმენებით მიღებული მსგავსი ინფორმაციის იმ ფორმით ტირაჟირება, როგორითაც მოხდა, მოქალაქეების უფლებების შელახვის წახალისებაა. ის ქართულ და საერთაშორისო სასამართლოებში სარჩელის შეტანას აპირებს და ამასთან დაკავშირებით განცხადებას ავრცელებს, რომელსაც “გურია ნიუსი” უცვლელად გთავზობთ:
“28 სექტემბერს, ტელევიზიებითა და საინფორმაციო სააგენტოებით გავრცელდა ფარული აუდიო ჩანაწერი, რომელშიც თითქოს გადმოცემული იყო ჩემი საუბარი ჩემი დიდი ხნის მეგობართან, “ეროვნული ფორუმის” ერთ–ერთ ლიდერთან, გუბაზ სანიკიძესთან. მიმაჩნია, რომ უკანონო მოსმენებით მიღებული ინფორმაციის ამ ფორმით ტირაჟირება სხვა არაფერია, თუ არა ხელისუფლებისა თუ კერძო პირების მხრიდან მოქალაქეების უფლებების მასობრივი შელახვის წახალისება, რაც ნებსით თუ უნებლიეთ კიდევ უფრო ზრდის უბრალო ადამიანებში დაუცველობისა თუ შიშის გრძნობის გაღვივებას და ხელს უწყობს მოქალაქეებზე ტოტალური კონტროლის სისტემის ჩამოყალიბებას.
დღეს ჩვენს თვალწინ, საქართველოში საზოგადოებივი ურთიერთობის წესად მკვიდრდება უკანონო მოსმენა, ფარული ჩაწერა, ადამიანის პირადი ცხოვრების ხელყოფა. ეს ყველაფერი ქართულ სინამდვილეში ჩვეულებრივ ამბად იქცა. ამ კონკრეტულ შემთხვევაში კი ამას ემატება ჩემს თაობაზე ცრუ ინფორმაციის გავრცელება, ჩემი პატივისა და ღირსების შელახვა.
სამწუხაროდ, მედია საშუალებებმა ეს “მასალა” აუდიტორიას მიაწოდეს როგორც უტყუარი ფაქტი, მტკიცებითი ფორმით, ჩემი გვარის და სახელის მოხსენიებით და, ხშირ შემთხვევაში, ჩემი ფოტოს გამოყენებით. მე არ ვაპირებ ჩავდგე თავის მართლების პოზიციაში, თავად დავიწყო იმის უარყოფა, რისი მტკიცების ტვირთიც ამ მასალების ფაბრიკანტების მოვალეობაა. მოგმართავთ ყველა მედია საშუალებას, რომელმაც საქართველოს მოსახლეობას მიაწოდა აღნიშნული მასალა, როგორც უტყუარი ჭეშმარიტება, ან წარმოადგინოთ მტკიცებულება ამ საუბარში ჩემი მონაწილეობის თაობაზე, ან გამოასწოროთ შეცდომა და იმავე დროს, იმავე ფორმატში, რომელშიც იქნა გაშუქებული აღნიშნული ჩანაწერი, მოსახლეობას მიაწოდოს ინფორმაცია, რომ არ არსებობს არანაირი მტკიცებულება იმის დასადასტურებლად, რომ მე ვარ ამ ჩანაწერში მოსაუბრე ერთ–ერთი პირი.
როგორც სამოქალაქო საზოგადოების წარმომადგენელს, ჩემს მოვალეობად მიმაჩნია, ვიბრძოლო ბოლომდე როგორც ქართულ, ისე საერთაშორისო სასამართლოში, რათა მიღებული იქნას ისეთი გადაწყვეტილება, რომელიც ფაქტობრივად შეუძლებელს გახდის ჩვენს ქვეყანაში უკანონო მოსმენებს, მის ტირაჟირებასა და ადამიანთა პირად ცხოვრებაში ჩარევას, ხოლო მათ, ვინც შელახა ჩემი პატივი და ღირსება, თუ ქართულით არა, საერთაშორისო სასამართლოს გადაწყვეტილებით დაეკისროთ მნიშვნელოვანი სამართლებრივი, მათ შორის, ფინანსური სანქციები,” _ აცხადებს ირაკლი მელაშვილი.
