ერთადერთი “ნაციონალი”, რომელიც ღონისძიებას ესწრებოდა, ჩოხატაურის მუნიციპალიტეტის გამგებელი, ლელა იმედაშვილი იყო. ერთსაათიანი კონცერტის განმავლობაში დეპუტატი და გამგებელი დარბაზში გვერდი-გვერდ ისხდნენ და საუბრობდნენ. თუმცა, როგორც ღონისძიების დასრულების შემდეგ თემურ ჭკუასელთან გავარკვიეთ, ჯერ კიდევ ერთი კვირის წინ დაანონსებული საუბარი გამგებელსა და დეპუტატს შორის, იმედაშვილის გადადგომას არ შეხებია.
_ ის საუბარი, რომელიც თქვენ გაინტერესებთ, რამდენიმე დღეში, აი, ხუთი დღის შემდეგ, შედგება თბილისში. ამაზე მოვილაპარაკეთ. ქალბატონ ლელას, დედა ჰყავს ახლა შეუძლოდ და თან დღეს შვილის დაბადების დღე აქვს _ მივულოცე კიდევაც და ამიტომ ეს გასათვალისწინებელია. ცოტა “ისეთი” საუბრები დღეს არ შეიძლება.
_ ქალბატონი ლელას მხრიდან იყოს შეხვედრის გადადების სურვილი?
_ არა, მისი მხრიდან არ ყოფილა. თვითონ გადავწყვიტე, რომ ასე მოვიქცე. თბილისში რომ ჩამობრძანდება, ვისაუბრებთ ყველაფერზე ისე, როგორც ცივილიზებულ ქვეყანაში ხდება და როგორც ნორმალურ ადამიანებს სჩვევიათ.
_ როგორ ფიქრობთ, თქვენთან საუბრის შემდეგ, იმედაშვილი თანამდებობას დატოვებს?
_ ჩემთვის და ყველაფრისთვის კარგი იქნება, რომ ეს წელიწადი ვაცადოთ ამ ხელისუფლებას და პირველი იანვრიდან ახალი ხელისუფლება შეუდგეს თავის მოღვაწეობას. თუ ეს ყველაფერი ისე იქნა, როგორც მე ვამბობ, ვიქნები ძალიან გახარებული და ქალბატონ ლელას და ყველას ძალიან დიდ მადლობას გადავუხდი.
_ თუ არ იქნა?
_ მაშინ, ორში, ბედობის დღეს შევხვდეთ და ვისაუბროთ. წინასწარ არ მინდა ამაზე საუბარი.
_ რამდენად გაქვთ იმის საფუძვლიანი ვარაუდი, რომ ლელა იმედაშვილი თანახმა იქნება, თქვენი შეთავაზების შემდეგ, დატოვოს თანამდებობა?
_ ჩემს შეთავაზებაზე არ არის საუბარი. თვითონ იტყვის, მე მგონი, ამას. ქალბატონი ლელა საკმაოდ ჭკვიანი ადამიანია და ამას თვითონ შემომთავაზებს. შეიძლება, მე საერთოდ არ დამჭირდეს არანაირი შეთავაზება. დარწმუნებული ვარ, რომ ეს ასე იქნება. წინასწარი საუბარიც ასე იყო. მითხრა, რომ ძალიან ბევრი რამეა გასაკეთებელი ჩოხატაურში. ვკითხე კიდეც, გეცოდები,-მეთქი? თქვენ არა, იმიტომ, რომ ვიცი, ყველაფერს გააკეთებთო, _ მიპასუხა.
_ როგორ გააკეთებთ, ბატონო თემურ? პრემიერის ხუთშაბათს გამართულმა პრესკონფერენციამ ხალხში ბევრი შეკითხვა გააჩინა _ პენსია ვერ იმატებს, ერთ-ერთი მთავარი დაპირება _ ტარიფების განახევრება არ ხდება…
_ ტარიფები მცირდება, პენსიაც მოიმატებს. თქვენ ეტყობა, კონფერენცია კარგად ვერ გაიგეთ. ტარიფების განახევრებაზე იყო საუბარი.
_ ჩვენც ეს აღვნიშნეთ, რომ დაპირებული განახევრება ვერ მოხდება.
_ დიახ, იყო მაგაზე საუბარი. შეიძლება განახევრება არ მოხერხდეს, მაგრამ ტარიფები აუცილებლად შემცირდება. პენსიაც აუცილებლად მოიმატებს. ოღონდ იმ ნიშნულს, რომელიც ჩვენ ვთქვით, ცოტა დრო დასჭირდება. საერთოდ კი ბევრი რამ შეიცვლება.
_ ეს ხომ ამ ეტაპზე დაპირებების ვერშესრულებას ნიშნავს?
_ შეუძლია ვინმეს საქართველოში, დედამიწის ზურგზეც, თუ გინდათ, რომ დაასახელოთ თარიღი _ აი, აქ, ამ დროს იქნება?! თარიღი არ დასახელებულა.
_ “ქართული ოცნების” წინასაარჩევნო პროგრამაში არც ის იყო ნათქვამი, რომ ეს დაპირებები 4 წელზე გაიწელებოდა…
_ ის ნიშნულები, რომელზეც ვსაუბრობდით, არის მაქსიმუმ წელიწადნახევრის საქმე.
_ ჩვენ ძალიან ბევრი ვისაუბრეთ არჩევნებამდე _ კონკრეტულად ჩოხატაური რა ცვლილებებს უნდა ელოდოს? ბევრი უმუშევარია, ბევრი სოციალურად უმძიმეს პირობებში ცხოვრობს. თქვენ როგორც დეპუტატს, გაქვთ კონკრეტული გეგმა ამ სიტუაციიდან გამოსასვლელად?
_ ჩოხატაურის რაიონზე, რა თქმა უნდა, მოიაზრება ეს ყველაფერი. რაც საქართველოს მასშტაბით გაკეთდება კარგი _ ის გაკეთდება ჩოხატაურშიც. მე, უბრალოდ, შევეცდები, რომ ჩოხატაურში უფრო მეტი გაკეთდეს და ეს მე მოვახერხო. რაც შეეხება პრობლემებს, ძალიან კარგად ვიცი, რაც ხდება. უამრავი, წარმოუდგენლად დიდი პრობლემაა, მაგრამ უნდა დავიწყოთ ნელ-ნელა, გაზაფხულიდან ყველაფერი როგორც ვთქვით, ისე იქნება _ დაპირებული ტექნიკა, საწვავი, რაც გლეხს და სოფლის მეურნეობას სჭირდება, ჩამოვა. გარკვეულ ადამიანებთან უკვე მაქვს საუბარი, რომ ინვესტიციები მოვიზიდო აქ. ასევე მაქვს საუბარი დაწყებული და ამას აუცილებლად გავაკეთებ, რომ მოხდეს გორაბერეჟოულის ტექნიკუმის რეაბილიტაცია..
_ ტყე-პარკის აღდგენას ფიქრობთ?
_ დიახ. მინდა ისეთ ადგილად გადაიქცეს, რომ ჩოხატაურში მოსული ადამიანი აუცილებლად მივიდეს იქ.
_ გეგმები გასახორციელებლად კონკრეტული საფუძველი გაქვთ?
_ ვისაც ეს ხელეწიფება, ვსაუბრობ სამინისტროებზე, ვისაც ამისთვის გამოყოფილი აქვთ თანხები, ისინი უნდა შევაწუხო და ორშაბათიდან (საუბარი ჩაწერილია 23 ნოემბერს) ზუსტად ამას ვიწყებ. სასესიო კვირა არ მაქვს და ვარ თავისუფალი. შევაწუხებ იმდენად, რომ მაქსიმუმი გამოვტყუო. მერე კიდევ მაქვს რაღაც ჩანაფიქრები და ვნახოთ, რა გამოგვივა.
_ ბატონო თემურ, წინა ხელისუფლებამ ჩოხატაურის კულტურის სახლის პროექტი გააკეთა და დაანონსდა, რომ მშენებლობა არჩევნების შემდეგ დაიწყებოდა. რა ინფორმაცია გაქვთ ამ საკითხთან დაკავშირებით _ მშენებლობა დაიწყება?
_ მაგასაც გავარკვევ ძალიან მალე. კულტურის სახლი, რა თქმა უნდა, კარგი და აუცილებელია, მაგრამ ის, რაც დღეს ვნახე, ნათელი დასტურია იმისა, რომ ამ ადამიანებს კულტურის სახლის არქონა ხელს არ უშლის, იყვნენ ძალიან ძლიერები, კარგები და ხალისიანები. ამიტომ, მე მაინც მიმაჩნია, რომ კულტურის სახლი, რა თქმა უნდა, საჭიროა, მაგრამ ჯერ სხვა პრობლემების გადაჭრაა უფრო აუცილებელი, _ გვითხრა დეპუტატმა.
მართალია, დეპუტატი ცვლილებებს გეგმავს, თუმცა ამბობს, რომ წელს ჩოხატაურში სიტუაცია არ შეიცვლება და დასძენს, რომ ეს ყველასთვის კარგი იქნება. კონკრეტიკისგან შორს არის ლელა იმედაშვილი. მისი თქმით, დეპუტატთან შეხვედრა მისი მიზეზით არ გადადებულა. ჩოხატაურის გამგებლის თქმით, ჭკუასელს შეხვდება იქ და იმ დროს, სადაც თავად მოისურვებს:
_ ქალბატონო ლელა, დეპუტატის შეთავაზების შემდეგ, წლის ბოლომდე გადადგებით თუ არა?
_ მოდით, დღეს პოლიტიკაზე ნუ ვისაუბრებთ. დღეს გიორგობაა. ყველას გილოცავთ, წარმატებებს, ღვთის წყალობას და ძლიერებას გისურვებთ. კიდევ ერთხელ ვიმეორებ _ დამიტოვეთ უფლება, რომ პოლიტიკურ საკითხებზე ჩემი კომენტარები გავაკეთო ბატონ თემურთან საუბრის შემდეგ.
